¹ Yeso ɓoo mɔng gɔɔreni tɔti, shɔngɓɔɔ ani wu na vɔɔkɔ. ² Shɔngɓɔɔ yii tɛ̃ɛre wu nung a bii yii ze dɔɔɓe daa gante wu a diki Wɔ̃keni aru ɓe yii daa kpaa dɔ̃rɔng wu langseni ɓe. ³ Yeso gãle shɔngɓe wu naa vɔɔkɔ mi, "Yupa ta mɔ shii a shɔng titi." ⁴ A sɔɔ gãle shɔngɓi yini, "Likɔtɔ shɔng pele viɓe tɔ̃ɔving a diki wɔ̃keni ya kɔ shɔng lese shɔ̃ng; shɔng kpense shɔng ya kɔ shɔng nung vɔɔ?" Yii sɔɔ wɔ̃ng sĩngsĩngsĩng. ⁵ A mileyi ni yato leseni, a lese yato aru yii yato rãani, a sɔɔ gãle shɔngɓi ni, "Dĩng mɔ naa ta." Dĩng naa kiti, wu naa sɔɔ gante ke. ⁶ Shɔng Farisayi yii ke gaa ɓani jang ɓaseni ɓa a wa ɓase yãa ni Hiruduyi aruɓe yii daa kpaa dɔ̃rɔng ɓe yii daa nung wu vɔɔ ɓe. ⁷ Yeso, ni wu jaadɔɔyi, yii wa kaa mɛɛ waapo, bɔrɔ mɔɔ ɓe yii ke a Galili ɓɔɔ Yahuda yii dũng wu ⁸ shɔngɓɔɔ yii ke tɔti a koo Urushalima ɓɔɔ a Idumiya a wa Urudu ni kaa Taya ɓɔɔ Sidon. Alaɓe yii tãa ruu viɓe pele ɓe ye, bɔrɔ mɔɔ e wu bii. ⁹ A gãle wu jaadɔɔyi ni yii kpaa tuusi ɓe tɔkɔlɔng ta aruviya wu bibi aru ɓe mɔɔ daa nɔɔ wu ɓa. ¹⁰ Aruviya gante shɔng vɛ̃ɛni, ɓe shĩng ke shɔngɓeyi vɔɔ kpãreyi yii e wu bii aru ɓe yii da lii wu naa a bii ɓe. ¹¹ Laɓe vĩnivĩvĩ suruyi yii ze wu ye, yii wete a wu watĩng a kaa yãa ni kaaka, a shãng ni, "Mɔ ɓi Jaa Laa" ¹² A waase yii yãa ni yini daa ɓa shɔng ze wu zɔng ɓa. ¹³ A wa yuu kɔpɔ, a ɓaa shɔngɓe kaseyi ɓe, yii sɔɔ e wu bii. ¹⁴ Rɔɔ kop atu ziti (ɓe ɓayi ni jaarɔkeni) aruɓe yii daa wɔ̃ng ni wuni wu sɔɔ shongyi yii waare ruu ɓe, ¹⁵ yii sɔɔ kpaa kaaka dɔ̃rɔng langteni rãmang yi. ¹⁶ Rɔɔ kop atu zitiː Simani ɓe a wu rĩng ni Bituru; ¹⁷ Yaakubu Zabadi jaa, ɓɔɔ Yɔhana Yaakubu zũnɓi, ɓe a wu rĩng ni Bonagisi, ɓe wuko, jaa zãala, ¹⁸ ɓɔɔ Andarawu, Filipi, Batalamawo, Matiyu, Toma, Yaakubu Halafa jaa, Tadawu, Simani Ziloti, ¹⁹ ɓɔɔ Yahuda Iskariyoti ɓe ing maale wu ɓe. ²⁰ Sɔɔ wa yee, mɔɔ sɔɔ dũng wu tɔti, a shĩng ke yii de kpaa ɓa a shaa bubula ɓa. ²¹ Alaɓe wu shɔng yee yii tãa ruumi ye, yii wa ni ying yiwu kɔtɔ, aruviya, yii tɔɔ ni, "Viɓe N pele mi ɓa ni wu zeni ɓa." ²² Shɔng labiniyi ɓe yii e a Urushalima yii shãng ni, "Balzabul a wu vusu bii" yii shãng tɔti "Kese rãmang ni kaaka yubɔrɔ rãmang" ²³ Yeso ɓa yi yãa a shãngsheyi ruu ni yãa gãni, "Shelan daa lante Shelan nuko viya? ²⁴ Roonikpanti ɓe na vaseye a yii nung, roonikkpanti ɓi da shii ɓa. ²⁵ Yee ɓe na vaseye a yi nung yee, yee ɓi da zenung shii ni ɓa. ²⁶ Shelan na yupa ye a wu yuu na sɔɔ vase bii ye, da zenung shii ni ɓa, wu sɔ̃ni yãa e ye. ²⁷ Shɔngɓɔɔ da zenung ɓooni shɔng ɓe kaaka abii vɛ̃ɛni yee ɓa wu ɓɔɔ wu vi ɓa na de maa shɔng kaaka ɓi kɔtɔ shoni ɓa, alaɓi ko ing sɔɔ see wu vi yee walikãng. ²⁸ Nung goko N gãle nɔ, shɔng yaase jaa shɔngzengyi ruvĩni kɔtɔ, kɔ zɔng ruɓɔng ɓewe ya ɓe yii shãng, ²⁹ shɔngɓe na too ruɓɔng Suru Tɔ̃ɔving shɔng da yase wu ruvĩni ɓa, wu ruɓɔng ɓe a wu yuu da sɔ̃ɔ yãa ɓa" ³⁰ Yeso shãng vĩmi aruviya yii shãng ni "Wu nanka suru a bii. ³¹ Yĩngɓi ɓɔɔ zũngɓiyi yii e a shile a gaa, a shɔng yãa a wu ni, ni yii kase wu zeni. ³² Mɔɔ wɔ̃ng a wu kaa bii a sɔɔ shãngshe wu ni, "Inna ni zũngwayi ɓɔɔ nawayi yii shile a gaa, ying ɓe mɔ mɔng." ³³ A kaseyi ni, "Ɓi we maanaa ɓɔɔ mazũngyi weya?" ³⁴ A mile shɔngɓe yii knte wu a titi ɓɔɔ shɔngɓe yii wɔ̃ngre a wu bii a shãng ni, "Mile pĩn, maanaa ɓɔɔ mazũng yii ko miǃ ³⁵ Aruviya shɔngɓe na pele viɓe Laa kase ye, shɔng wa ko mazũng, ɓɔɔ maana, ɓɔɔ maanaa."