¹ Alaɓe Yeso sɔɔ Kafanahum ye a diki pota ɓe dase ke, yii tãa ke ni wu a yee. ² Shɔng muse a mɔni vɛ̃ɛni ɓe shɔng de kpaa mɔng ɓa, kɔ a yɔ̃rɔng, a sɔɔ shãngshe yii ruu Laa. ³ Shɔng veeye ɓɔɔ yii e wu bii a ese shɔng bii ɓooni; shɔngzeng dɛ̃ɛro yii too wu. ⁴ Alaɓe yii de kpaa waani wu bii ɓa aru mɔɔ, yii luu nungɓɔ a lapa jaaka a Yeso kaa bii, a tũmpu ɓe yii puuye, yii lɔɔre sii ɓe shɔng bii ɓooni sii roo ani ɓe. ⁵ Aɓe ze yii shĩngni gn ye, Yeso gãle shɔng bii ɓooni, "Jaa, shɔng yaase mɔ ruvĩni ye." ⁶ Hami shɔng labiniyi ɓe yii wɔ̃ng a mɔng ɓi, yii tɔngse a yii sĩngsĩng, ⁷ "Aru vi shɔng vere mi da shãng yãa a nemi viya? Too ruubɔng yeǃ Ɓiwe da yaase shɔng ruvĩni weya na ɓa Laa ko goro ɓa? ⁸ Ɓani jang ɓaseni ɓa Yeso ze a suru viɓe ying lere a yii titi. A gãleyi ni, "Aru vi nɔng lere aru vĩmi a nɔ sĩngsĩng viya? ⁹ Ɓivi kpãa a mɔng viya, shɔng gãle shɔng bii ɓooni, 'Shɔng yaase mɔ ruvĩni ye,' kɔ shɔng tɔɔ ni, "Yupaa ta, mɔ too mɔ sii mɔ kn viya'? ¹⁰ Aruɓe nɔ da ze ke ni Jaa shɔngzeng kaaka ani a koodanga wu yaase shɔng ruvĩni," a gãle shɔng bii ɓooni, ¹¹ "N gãle mɔ, yupa ta, mɔ too mɔ sii, mɔ wa mɔ yee." ¹² Yupa a yii watĩng ɓani jang ɓaseni ɓa a too wu sii, a waa yee, yii de yii naa ni a yãa a dore Laa, a shãng ni, "Wo de ze zɔng viɓɔɔ ɓa ana ɓemi ɓa." ¹³ Ke gaa tɔti a waa yãa waapo, mɔɔ e wu bii a sɔɔ manteyi vi. ¹⁴ Laɓe ing dase ɓe, a ze Laawi Halafa jaa wɔ̃ng a mɔng teni saka vii tipi a gãle wu, "Dũng ta." Yupa kiti a dũng wu. ¹⁵ Yeso wu a mɔng shaani vishang a Laawi yee ni shɔng teni saka vii tipi vɛ̃ɛni ɓɔɔ shɔng ruvĩniyi yii de shaa vishangni ni wu jaadɔɔyi, aruviya yii vɛ̃ɛni ying dũng wu. ¹⁶ Alaɓe shɔng labiniyi, Farisayi, ying ze Yeso ing shaa vishang ni shɔng ruvĩniyi ɓɔɔ shɔng teni saka vii tipi yii, yii de gãle wu jaadɔɔ yini, "Aru vi ing shaa vishang ni shɔng teni saka vii tipi ɓɔɔ shɔng ruvĩni yii viya?" ¹⁷ Alaɓe Yeso tãa vimi ye a gãleyi ni, "Shɔngɓe yii kaaka a bii ni yii bee shɔng gãng ɓa; ɓi shɔngɓe yii vɔɔ ko shee yii bee ke. N de e ɓa ing ɓaa shɔng tɔ̃ɔving yii yãa ɓa, N e aru shɔng ruvĩniyi." ¹⁸ Yɔhana jaadɔɔyi ɓɔɔ shɔng Farisayi yii ziyãa kɔtɔ. Shɔngɓɔɔ yii e ke a gãle wu ni, "Aru vi Yɔhana jaadɔɔyi ɓɔɔ shɔng Farisayi jaadɔɔyi yii ziyãa, mɔ jaadɔɔ yii sɔɔ ziyãa ɓa viya?" ¹⁹ Yeso gãleyi ni, "Shɔng wani mɔng gbare yii da ziyãa kɔtɔ alaɓe shɔng gbare dong ni yini ya? Shɔng gbare na dong ni yini, yii da ziyãa ɓa. ²⁰ Diki teni ɓe shɔng da too shɔng gbare a yii bii a wani yini, a diki wa ko, ying ziyãa. ²¹ Shɔngɓɔɔ daa yaare yeleni polo fara ɓa ni gɓengti fara ɓa. Na pele ye ananko gɓengti fara ɓi ing tãleye, polo a bii gɓengti, tãni ɓi ing sɔɔ jãa ɓe tũmpu. ²² Shɔng da tɛ̃ɛ polo mɛɛ rɛni la ɓa a vusu gɓengti gugu ɓa. Na ɓa ananko ɓa mɛɛ rɛni la ɓi ing wɔ̃nke gugu shɔng kpaa gugu ɓa ni mɛɛ rɛni la ɓini tɔti ɓa. Vi peleni wuko, polo mɛɛ rɛni la shɔng tɛ̃ɛ a polo gugu." ²³ A diki Wɔ̃keni Yeso sɔɔ titi kulu zee, wu jaadɔɔyi sɔɔ watĩng ni kake ni yuu zee alaɓe yii de tuke ni ɓe. ²⁴ Shɔng Farisayi shãngshe wu ni, "Ze pĩn, aru vi ying pele viɓe rudani de ya ɓa a diki Wɔ̃keni ɓa viya? ²⁵ A gãleyi ni, "Nɔ de ɓale viɓe Dawuda pele alaɓe tãa wɔ̃ko ɓa ya, wu bibi ni shɔng veeye ɓe yini wuni- ²⁶ Aɓe ɓoo Laa yee alaɓe Abiyata wuko yubɔrɔ firisi, a shaa bubula ɓe a Laa watĩng, ɓe rudani zãre kɔtɔ shɔngɓɔɔ wu shaa wu na ɓa firisiyi ɓa, shaa ke a sɔɔ a shɔngɓe yini wuni ɓe?" ²⁷ Yeso shãngni, "Shɔng pele diki Wɔ̃keni aru shɔngzengyi, ɓa shɔngzengyi aru diki Wɔ̃keni ɓa. ²⁸ Arugoko, Jaa Shɔngzeng wuko Daayere, ɓɔɔ diki Wɔ̃keni."