¹ Yeso yaa mɔng ɓi a waa kaa tipi Yahudayi ɓɔɔ dang yoo Urudu, mɔɔ sɔɔ e wu bii tɔti. A sɔɔ manteyi vi tɔti, anaɓe pele dikidi ɓe. ² A mɔni shɔng Farisayi yii de e wu bii yii maase wu a sɔɔ yɛ̃ɛ wu ni, "Rudani zãre veeye kɔtɔ wu lante wu sooye ya?" ³ A kase yii ni, "Muusa shãngshe nɔ nuko viya?" ⁴ Yii shãng ni, "Muusa dare veeye dɔ̃rɔng kɔtɔ wu binke labini yaani naa wu sɔɔ langte wu." ⁵ "Ɓi nɔ lakeni sĩngsĩng ko shĩng ke binke nɔ rudani ɓemi." Yeso sɔɔ gãleyi ni, ⁶ "A gaani takeni koodanga, 'Laa take yii veeye ɓɔɔ sooye.' ⁷ Aru viɓe miko veeye ing yaa yeɓi ni yĩnɓi, wu sɔɔ wɔ̃ng a yãawe ni wu sooye ni. ⁸ Yii zitimi ying wɔ̃ng bii goro.' Yii tɔ ɓa ziti ɓa, yii wɔ̃ng ye bii goro. ⁹ Arugoko viɓe Laa na ɓaseye a yãawe, shɔngɓɔɔ na vaase ɓa. ¹⁰ Alaɓe yii a vusu yee, wu jaadɔɔyi yii de yɛ̃ɛ wu ni tɔti aru vimi. ¹¹ A gãleyi ni, "Shɔngɓe na yaa wu sooye naa ye sɔɔ yɛ̃ɛ sooye ɓɔɔ ye pele kɔng ye a wu yuu." ¹² Sooye na sɔɔ yaa jere ye sɔɔ yɛ̃ɛ jere ɓɔɔ ye, pele kɔngye." ¹³ Yii ese wejaa kpatakpa aruɓe daa lii yii ni naa ɓe, wu jaadɔɔyi yii sɔɔ kɔseyi yãa. ¹⁴ Alaɓe Yeso ze vĩmi ye, a lese yato a sɔɔ shãngshe yii ni, "Nɔ yaa wejaa kpatakpa ta yii eng bii, nɔ na sɔɔ zãareyi ɓa, aruviya Laa roonikpanti ɓi shɔngɓe yii wɔ̃ng ana yii ni ɓe. ¹⁵ N gãlenɔ nungoko, shɔngɓe na de te Laa roonikpanti ɓa ana wejaa kpatakpa ɓa ing ɓoo ɓa tĩngkirĩng." ¹⁶ A sɔɔ too wejaa kpatakpa ɓi yii a naa ɓala a tɛ̃ɛreyi zuuku aɓe shĩngsheyi naa a bii. ¹⁷ Alaɓe gaa wu kn ni ye ɓe, shɔngɓɔɔ de yuni a kute a wu tĩng a yɛ̃ɛ wu ni, "Shɔng manteni Tɔ̃ɔving, N daa pele ki vi N kpaa surubi ɓe dongo viya ?" ¹⁸ Yeso gãle wu ni, "Aruvi mɔ ɓang ni shɔng tɔ̃ɔving viya? Shɔngɓɔɔ ɓa tɔ̃ɔving ɓa na ɓa Laa ko goro shee ɓa. ¹⁹ Mɔ ze rudaniyi yeː Mɔ na nung vɔɔ ɓa, mɔ na pele kɔng ɓa, mɔ na ɓɔɔ ɓa, mɔ na a yãa ɓa a viɓe ɓa nanko ɓa, mɔ na bang shɔngɓa, mɔ aa mɔ daa ɓɔɔ mɔ naa ɓɔrɔ a bii." ²⁰ Shɔng veere ɓi shãng ni, "Shɔng manteni vi, N dũng viɓemiyi ye a laɓeng ing dong jesang." ²¹ Yeso mile wu a sɔɔ kase wu. A gãle wu ni, "Vii goro yase mɔ. Mɔ maale mɔ vii naa walikãng mɔ sɔɔ aa shɔngrangyi, mɔng sɔɔ kpaa kaa vɔ̃seni a koolapa. Alawa ko mɔ e, mɔ sɔɔ dũng." ²² Aru rushãngni ɓemi zaa watĩng a sɔɔ ke ni yato viki, aruviya wu vi naa ani vɛ̃ɛni. ²³ Yeso de ranungni ang mile wu Jaadɔɔyii ang shãng ni, "kpãa kɔtɔ shɔng vii naa yii ɓoo Laa roonikpantiǃ" ²⁴ Bii sɔɔ zaa wu jaadɔɔyi aru wu ruu shãngni. Yeso sɔɔ gãle tɔti ni, "Wejaayi, kpãa kɔtɔ shɔng wu ɓoo Laa roonikpantiǃ ²⁵ De kpãa ɓa gbankurumɛ̃ wu ɓoo nungɓo jeleng ɓa ɓe shɔng vi naa daa ɓoo Laa roonikpanti ɓe." ²⁶ Bii zaayi vɛ̃ɛni yii sɔɔ shãngshe we ni, "Ɓiki wee daa kpeng weya?" ²⁷ Yeso mile yii ke a sɔɔ gãleyi ni, "Ni shɔngzengyi kpãa kɔtɔ, ɓa ananko a Laa bii ɓa. Aruviya vi walikãng de kpãa ɓa a Laa kaa bii. ²⁸ Bituru gaa shãngshe wu ni, "Mile pĩn, wo yaa wo vii ye walikãng wo dũng mɔ ye." ²⁹ Yeso shãng ni "N shãngshe nɔ nungoko, shɔngɓɔɔ ɓa ɓe daa yaa wu yee kɔ zũngɓi kɔ naaɓi kɔ yĩngɓi kɔ yeɓi, kɔ wu jaa kɔ tipi aru mini ɓɔɔ ing polo ruu tɔ̃ɔving ³⁰ ɓe daa te dɔɔ yɔɔni ɓa ɓe jãa ya la maani a koo ɓemi ɓaː yeeyi ɓɔɔ zũng ɓɔɔ naayi ɓɔɔ yĩngti jaayi ɓɔɔ jaayi ɓɔɔ tipi, ni kpãareni, ɓɔɔ tɔti a koo ɓe daa e ɓe, suru dongo. ³¹ Aruviya shɔngɓe vɛ̃ɛni yii sii shɔɔni ying sɔɔ ni tũmpu, shɔngɓe yii sii a tũmpu yii wɔ̃ng shɔɔni." ³² Yii a dɔ̃rɔng waani paa Urushalima, Yeso de kn ni a yii tĩng. Viɓi zaa wu jaadɔɔyi bii, shɔngɓe yii sing dũng wu a tũmpu yii de sɔɔ zaa vɔɔ ni. Yeso sɔɔ too kop atu ziti ɓemiyi ni kati tɔti a gaa yii gãleni viɓe daa sɔɔ watĩng ni wu ni ɓe. ³³ "Mile pĩn, wong waa paa Urushalima, shɔng sɔɔ a jaa shɔngzeng a yuubɔrɔ firisiyi ɓɔɔ shɔng labiniyi naa. Ying lese wu ang nung wu vɔɔ yii sɔɔ aa wu a Shɔngɓe yii de ze Laa ɓa yii naa. ³⁴ Ying base wu, yi tulewu sãari a bii, ying nung wu ni dĩngre, ang sɔng nung wu vɔɔ. A tũmpu diki tati wu sɔɔ yupa." ³⁵ Yaakubu ɓɔɔ Yɔhana, Zabadi Jaa yeeyi, yii de e wu bii ni ang gãle wu ni, "Shɔng manteni, wo kase mɔ pele wo viɓe wɔng yɛ̃ɛ mɔ ɓe." ³⁶ A gãleyi ni, "Nɔ kase N pele nɔ viya?" ³⁷ Ying kose wu ni, "Mɔ yaa wo wo wɔ̃ng ni mɔni a mɔ bongni, goro a mɔ nashang, goro ɓɔɔ a mɔ nagãng. ³⁸ Yeso sɔɔ koseyi ni, "Nɔ de ze viɓe nɔng yɛ̃ɛng ɓa." Nɔ daa zenung ɓooni jewa ɓe N ɓoo kɔtɔ ya kɔ shɔng pele nɔ batizima ni viɓe shɔng peleng baptizima ni?" ³⁹ Yii de shãngshe wu ni, "Wong zenung kɔtɔ" Yeso sɔɔ shãngshe yii ni, "jewa ɓe ing ɓoo, nɔng ɓoo kɔtɔ, ɓɔɔ batizima ɓe shɔng pelen ɓe, shɔng pele nɔ batizima ɓi kɔtɔ jɔ. ⁴⁰ Wɔ̃ngni ang kaa nashang ɓɔɔ ka nagãng ɓang ɓe ing aa ɓa, ɓi shɔngɓe shɔng sii gonteyi ye ɓe." ⁴¹ Alaɓe gãsi jaadɔɔyi kop yii tãa ruu ɓemi ye, yii gaa yato leseni vɛ̃ɛni ni Yaakub ɓɔɔ Yɔhana. ⁴² Yeso sɔɔ ɓayi yãa a wu bii a shãng ni. "Nɔ ze ni shɔngɓe yii roo ladong a shɔngɓe yide ze Laa ɓa yuu yii mareyii, yii bɔrɔ shɔng ladong yii tase kaaka naa ayi yuu. ⁴³ Ɓa ananko a nɔ titi ɓa. Shɔngɓe na kase wu wɔ̃ng bɔrɔ a nɔ titi wuko wu wɔ̃ng nɔ jaa shoni, ⁴⁴ shɔngɓe na kase ke wu wɔ̃ng shɔni a nɔ titi wuko wu wɔ̃ng ana foo ɓe shɔng walikãng. ⁴⁵ Aruviya Jaa Shɔngzeng de e ɓa shɔng wu pele wu shoni ɓa, e wu pele shɔng shoni, wu aa wu yuu ana shɔng kpenseni aru shɔngzeng vɛ̃ɛni." ⁴⁶ Yii e Jeriko. Alaɓe yaa Jeriko ye ni wu jaadɔɔyi ɓɔɔ bɔrɔ mɔɔ, Timawusi jaa, Batalamawu, shɔng nung bãati ɓe gɔ̃ɔre vi, wɔ̃ng a yãa dɔ̃rɔng. ⁴⁷ Alaɓe tãaye ni ɓi Yeso shɔng Nazara, ang gaa langni yãa ang shãng ni, "Yeso, jaa Dauda, tãng nugn kɔngni taǃ" ⁴⁸ Shɔngzeng vɛ̃ɛni yii de kɔse wu yãa, a gãle wu ni wu zĩng yãa ta. De sɔɔ lang yãa ni tɔti ni kaaka ni, "Dauda Jaa, tãng nugn kɔngni taǃ" ⁴⁹ Yeso shii a sɔɔ shãng ni, "Nɔ ɓawu yãa ta." Yii de ɓaa shɔng nung bãati ɓemi yãa ni, ni, "Maa nung taǃ Yupa taǃ De ɓa mɔ yaa ni a mɔni," ⁵⁰ A loke wu fara ni gaa, a yupa pila, a sɔɔ e Yeso bii. ⁵¹ Yeeso kose wu a sɔɔ gãle wu ni, "Mɔ kase N pele mɔ viya?" Shɔng nung bãati ɓemi kose wu ni, "Rabbi, N kase ing kpaa zeni mɔng." ⁵² Yeso sɔɔ gãle wu ni, "Waa ta. Mɔ gn shĩngni gante mɔ ye." Ɓani jang ɓaseni ɓa kpaa zeni mɔng tɔti, a sɔɔ dũng wu a dɔ̃rɔng.