¹ Alaɓe yie e Urushalima ye, yii kpaa maani ni Betafaji ɓɔɔ Betanya a Kɔpɔ Zeitu, Yeso sɔɔ shong wu jaadɔɔyi ziti ² a gãleyi ni, "Nɔ waa ta jekɔɔ ɓe a wo tĩng wa. Alaɓe nɔ na ɓoo ye, nɔng kpaa jaa lakoropi ɓe shɔng de vɔ̃ng ɓa alaɓɔ ɓa. Nɔ kale ke nɔ eseng ni. ³ Shɔngɓɔɔ na yɛ̃ɛ nɔ ye "nɔng pele vimi aru viya?' nɔ shãng ni, "Ɓi Daayere kase ke ɓani jang ɓaseni ɓa ing sɔɔre kɔtɔ a mɔmi." ⁴ Alaɓe yi waa kpaa jaa lakoropi ɓi ye shɔng maa a yãa dɔ̃rɔng, yii sɔɔ kale wu ke. ⁵ Shɔngɓɔɔyi ɓe yii shii a mɔni yii shãngsheyi ni, "Ɓivi nɔng pele mi viya, nɔng kale jaa lakoropi ya?" ⁶ Yii de shãngsheyi ni anaɓe Yeso gãleyi ɓe, shɔng ɓiyi yii sɔɔ yayi yii wayi mɔng waani. ⁷ Yii de ese lakoropi ɓini a Yeso bii a yɔɔle yii fara a yupa, sɔɔ wɔ̃ng a yupa ni. ⁸ Shɔngzeng vɛ̃ɛni yii yɔɔle yii fara a yuu dɔ̃rɔng, shɔngɓɔɔ yii sɔɔ yɔɔle ɓalayi ɓe yi kake a jĩngti ɓe. ⁹ Shɔngɓe yii waa awu tĩng ɓe ɓɔɔ shɔngɓe ying dũng wu yii langke yãa ni, "Hosanaǃ Pãnti ɓi shɔngɓe e a Daayere rĩng ɓe. ¹⁰ Pãnti ɓi eni roonikkpanti ɓee wo daa Daudaǃ Hosana a lapaǃ" ¹¹ Yeso sɔɔ ɓoo vusu Urushalima a sɔɔ waa ɓoo vusu jaaka Laa ang mile viɓeyi yii a vusu ɓe. Ni lasãani, a waa Betani ni wu jaadɔɔyi kop atu ziti mi ni. ¹² Ni gandi ɓɔɔ alaɓe yii a dɔ̃rɔng waani Betani, de tãa wɔko ni. ¹³ Ang ze la sĩngri ɓɔɔ fefe ɓe ɓalayi ani ɓe, a waa ke wu ze kɔ daa kpaa sĩngri ɓɔɔ kɔtɔ a laɓini, alaɓe e ye a mɔni ɓe, de kpaa viɓɔɔ ɓa ani ɓa a ze ɓala ko shee, aruviya ɓa la rɛni sĩngri ɓi ɓa. ¹⁴ A shangshe la ɓini, "Shɔngɓɔɔ daa shaa mɔ rɛni tɔ ɓa." Wu jaadɔɔyi yi tãa ruuɓi. ¹⁵ Yii de e Urushalima ni, de ɓoo jaaka Laa ni a gaa langte shɔng maleni ɓɔɔ shɔng wooni viyi a vusu jaaka Laa. A dɔ̃ɔle teburu ɓee shɔng saka kɔseniyi ɓɔɔ ladɔng ɓe shɔng ɓe ying male koro ɓe ¹⁶ De yaa shɔngɓɔɔ ɓa yii too viɓɔɔ a jaaka Laa ɓe shɔng daa maale ɓe ɓa. ¹⁷ A manteyi vi a shãng ni "Shɔng de binke ɓani, "Shɔng ɓang yee ni, mɔng gɔ̃ɔreni Laa aru shɔng yãakooyi waalikãng ɓaya?" Nɔ sɔɔ rise ye mɔng vɔɔni shɔngɓɔɔyii." ¹⁸ Yubɔɔrɔ Firisiyi ɓɔɔ labiniyi yii tãa viɓe shãng ɓe, a sɔɔ ɓẽe dɔ̃rɔng ɓe yii daa lese wu ɓe. Yii zaa wu aruviya mɔ walikãng viɓi aa yii vi zaani bii a wu vi manteni. ¹⁹ Alaɓe lasãani tiseye, yii yaa ɓundang ɓi. ²⁰ Alaɓe yii de knni ni gandi, yii de ze la sĩngri ɓini vɔɔye ni wu dĩngli ni. ²¹ Bituru de yee nugn ni a shãng ni, "Rabbi, mile pĩnǃ Laa sĩngri ɓe mɔ lese mi vɔɔye." ²² Yeso koseyi ni , "Nɔ azɔng a Laa. ²³ N shangshenɔ ye nungoko shɔngɓe na shãngshe kɔpɔ ɓemi ye, 'Yupa ta mɔ waa sho a mɛɛ waapɔ,' na de sɔɔ shang ɓa ni lereni ɓa a wu sĩngsĩng ɓa sɔɔ azɔng ye ni viɓe shãng ɓemi ing wɔ̃ng kɔtɔ, ɓi viɓe Laa ing pele ɓe ko. ²⁴ Arugoko N shangshe nɔː viɓe nɔ na gɔ̃ɔreye nɔ bee ye ang bii, nɔ azɔng ni nɔ kpaa ye, ing wɔ̃ng nɔ ɓe kɔ. ²⁵ Nɔ na shiiye nɔng gɔ̃ɔre Laa, nɔ yaase shɔngɓe yii pele nɔ ruvĩni, aruɓe nɔ Daayere ɓe a koolapa daa sɔɔ yaase nɔ ruvĩni jɔ ɓe" ²⁶ "Nɔ na de sɔɔ yaase shɔng ruvĩni ɓa, nɔ Daayere ɓe a koolapa ɓe daa yaase nɔ jɔ ɓa." ²⁷ Yii de e Urushelima ni tɔti. Alaɓe Yeso de knni a mɔng gɔ̃ɔreni Laa, yubɔrɔ firisi, labiniyi, ɓɔɔ shɔngbɔrɔɓɔyi yii e wu bii. ²⁸ A shãngshe wu ni, "Ni kaaka naa ɓewe ya mɔng pele viɓemiyi weya, ɓiwe sɔɔ aa mɔ kaaka naa peleni weya?" ²⁹ Yeso gãleyi ni, "N yɛ̃ɛ nɔ ruu ɓɔɔ goro. Nɔ gãleng N sɔɔ shãngshe nɔ mɔng ɓe N kpaa kaaka naa peleni viɓemiyi. ³⁰ Baptizima ɓee Yɔhana, ke a lapa ya kɔ a shɔngzengyi bii? Nɔ kaseng ta." ³¹ Yii tongse ruuɓi a yii nung a sɔɔ gongse yãa a shãngni, "Wo na shãng ye ni, 'A koolapa', N tɔɔ ni, Aruvi wo de azɔng ɓa a wuni ɓa viya?" ³² Wo na sɔɔ shãng ye ni, ke a shɔngzengyi bii'... ." Ying zaa shɔngzeng, aruviya shɔng walikãng yii azɔng ye ni Yɔhana ɓi shɔngzeni. ³³ Yii sɔɔ kose Yeso a sɔɔ shãng ni, "Wo de ze ɓa." Yeso sɔɔ gãleyi ni, "N bibi ing gãle nɔ ɓa, kɔ ing kpaa kaaka naa peleni viɓemi a mɔ weya ɓa."