¹ Yeso gaa a manteyi ni yãagani. A gãleyi ni, "shɔng vereɓɔɔ shɔ la a guru, a gbãa too ɓee kãngni rɛni la. A maa mɔng dengni shɔng a sɔɔ aa shɔng guru gaaniyi a naa. A waa zanti amɔng ɓɔɔ. ² Be la tiseye, shong wu jaa shongni a shɔng gaani guruyi bii wu wa tese wu rɛni la a guru ɓi pota. ³ Yii sɔɔ too wu ke, a nung wu, a sɔɔ lante wu ni gaa naa waati. ⁴ De sɔɔ shong wu jaa shongni ɓɔɔ ni tɔti, yii lese wu a yuu a sɔɔ pele wu vi yuusɛ̃ɛ a bii. ⁵ Sɔɔ shong ɓɔɔ tɔti. Yii sɔɔ nung ɓemi vɔɔ. Yii kpãare gãsi shɔngyi jɔ ananko, yii nung ɓɔɔ yii a sɔɔ nung gãsi yii vɔɔ. ⁶ Wu shɔngɓɔɔ ani goro ɓe daa shong wu ɓe. Wuko jaa ɓe tũmpu ɓe shong wu a yii bii ɓe. A shãngni, 'Ying ang jaa ɓɔrɔ kɔtɔ a bii.' ⁷ "Shɔng gaani guru ɓi yii gãle we ni, 'Ɓemi wuko shɔng shaani vi vɔɔ ɓi. Nɔ eta, wo nung wu vɔɔ, aruɓe wu vi vɔɔ daa wɔ̃ng wo ɓe.' ⁸ Yii yiiwu, a nung wu vɔɔ, a loke wu a kuku guru ɓini. ⁹ Na ananko, ɓivi shɔng guru ɓi daa pele viya? Ing e ang lese shɔng gaani guruyi ang sɔng aa shɔngɓɔɔyi guru ɓi. ¹⁰ Nɔ de ɓale labini ɓemi ɓaya? 'Tara ɓe shɔng maani mɔng yii bɛ̃ɛ ɓe wuko wɔ̃ngye tara yãkati. ¹¹ Ɓemi ke a Daayere bii, sɔɔ wɔ̃ng vii zãni bii a wo nung.'" ¹² Atũmpu vimi yubɔrɔ Yahudayi yii bee dɔ̃rɔng ɓe yii daa yii Yeso aruviya yii ze ni ing shãng ruu ni yãagani a yii yuu ko. Aruɓe yii zaa mɔɔ. Yii yaa wu a sɔɔ wayi waani. ¹³ Yii sɔɔ shong shɔng Farisa ɓɔɔyii ni Hiriduyayi a wu bii aruɓe yii daa lanse wu ni wu yãa shãngni ɓe. ¹⁴ Alaɓe yii e ye, yii shãngshe wu ni, "Shɔng manteni vi, viɓe shɔngzeng yii shãng ɓe yɔre mɔ ɓa aruviya mɔ rɔɔ shɔngɓɔɔ ɓa. Nungoko mɔ mante shɔng dɔ̃rɔng Laa. Likɔtɔ wo shoore Kaisa saka vi tipi ya kɔ wo na shoore wu ɓa?" ¹⁵ Yeso ze ye yii ɓi shɔng lakeni shɔng a gãleyi ni, "Aruvi nɔng mang viya? Nɔ eseng dinari mi aruɓe N daa ze ɓe." ¹⁶ Yii sɔɔ ese Yeso ni goro. Sɔɔ gãleyi ni, "Bemi ɓiwe nungsusuru ɓɔɔ rĩng weya?" yii de tɔ̃ɔ ni "ɓi Kayisa ɓe." ¹⁷ Yeso gãleyi ni, "Nɔ aa Kayisa viɓe na ɓi Kayisa ɓee, nɔ sɔɔ aa Laa viɓe naɓi Laa ɓee." Bii de za yii ni a wu ni. ¹⁸ Amɔng shɔng Sadukiyi, ɓe yii shãngni, yuni paa yusa ɓa ani ɓa, yii e wu bii. A yɛ̃ɛ wu, ni, ¹⁹ "Shɔng manteni vi, Musa binkewo ni, 'Shɔngɓe zũngɓi na vɔɔ ye sɔɔ yaa sooye ye a tũmpu, wu jaa ɓa ani ɓa, zũngɓi wu sɔɔre sooye ɓi aruɓe da yese zũnɓi jaa ɓe.' ²⁰ Zũngɓɔɔ yii sii ani nawa tati, shɔng shɔɔni yɛ̃ɛ sooye a sɔɔ vɔɔ ke, jaa ɓa. ²¹ ɓee ziti sɔɔre wu a sɔɔ vɔɔ jɔ, jaa ɓa, ɓee tati tɔ anankɔ. ²² Yii nawa tati ɓemi yii de yaa jaa ɓa. A tũmpu ɓini kãng, sooye ɓi sɔɔ vɔɔ jɔ. ²³ A yuni paa a yusa, yii na yupa ye tɔti, daa wɔ̃ng we soo weya? Aruviya yii zũng nawa tati walikãng yii yɛ̃ɛ wu kɔtɔ ana yii soo." ²⁴ Yeso gãleyi ni, "Ɓemi ɓa viɓe shĩike nɔng yĩngke ɓaya, aruviya nɔ de ze labini kɔ Laa kaaka ɓa? ²⁵ Aruviya yii na yupa ye a yusa, ying yɛ̃ɛ we ɓa kɔ shɔng aa we a gɓare ɓa, ying wɔ̃ng ana Laa shɔng shoniyi a koolapa. ²⁶ Aru vɔɔ ɓe shɔng yuse yii paa ɓe, nɔ de ɓale ɓa a labini Muusa ɓaya, binkeni aru jĩnti, anaɓe Laa shãng yãa ni wuni a gãle wu ni, 'Mikong Ibirayi Laa ɓɔɔ Ishaaku Laa ɓɔɔ Yakuubu Laa'? ²⁷ Wu ɓa shɔngɓe yii vɔɔ ye Laa ɓa, wu ɓi shɔng surubiyi Laa. Nɔ yĩngke ye nungoko. ²⁸ Shɔng labini ɓɔɔ e ke a tãa yii viɓe ying tɔngse ɓe; ang ze ke Yeso koseyi ye ɓatata. A yɛ̃ɛ wu, "Bi rudani ɓewe bɔrɔngbɔ a titi walikãng weya?" ²⁹ Yeso kose wu ni, "Ɓe bɔrɔngbɔ wuko, 'Tãa ta, Israila, Daayere wo Laa, Daayere wu goro. ³⁰ Mɔ kase mɔ Daayere Laa ni mɔ sĩngsĩng walikãng, ni mɔ suru ni walikãng, ni mɔ lereni ni walikãng, ni mɔ kaaka ni walikãng.' ³¹ Rudani ɓe ziti wuko, 'Mɔ kase mɔ shɔng yãakasi yee ana mɔ yuu.' Rudani ɓɔɔ ɓa ɓe jãa ɓemiyi ɓa." ³² Shɔng labiniyi yii shãngni, "Shɔng manteni viǃ Mɔ shãng ye nungoko ni Laa wu goro, ni shɔngɓɔɔ ɓa ani a wu kaa bii ɓa. ³³ Shɔng wu kase wu ni sĩngsĩng ni walikãng ɓɔɔ ni zeni ni walikãng ɓɔɔ ni kaakani walikãng, ɓɔɔ tɔti kaseni we shɔng yãa kasi yee ana mɔ yuu wuko jãa vi ani shareni ɓɔɔ vi shareniyi walikãng." ³⁴ Alaɓe Yeso ze ye aa kaseni yãa kpɛ̃ɛni, a gãle wu ni, "Mɔ ɓa fefe ni roonikpanti ɓe Laa ni ɓa." A tũmpu ɓi, shɔngɓɔɔ de zenung yɛ̃ɛni Yeso ruuɓɔɔ tɔɔ ɓa. ³⁵ Alaɓe Yeso sing manteni vi a kati mɔng gɔ̃ɔreni, a shãngni, "Nuko vi shɔng labiniyi yii shãng ni Kirisi ɓi Dawuda jaa viya? ³⁶ Dawuda ni wu yuu, a vusu Suru Tɔ̃ɔving, shãng ni, 'Daayere gãleng ing Daayere, "Wɔng ta ang nashãng wu waa laɓe N shĩng mɔ shɔng pɔngyi a mɔ yuu dɔɔ.'" ³⁷ Dawuda ni wu yuu ɓa wu ni, 'Daayere,' nuko vi Kirisi daa wɔ̃ng Dawuda jaa viya?" Mɔɔ vɛ̃ɛni yii pele puru yato wu tãa ni. ³⁸ A wu vusu manteni Yeso shãng ni, "Mɔ shĩng a shɔng labiniyi bii, ɓe yii kase yii kn a vusu bɔrɔ farayi yii sɔɔ shɔng jii yii yãa a nungmɔɔyi, ³⁹ yii sɔɔ kase wɔ̃ngni a bɔrɔ ladongyi a mɔng gɔ̃ɔreni ɓɔɔ mɔng bɔrɔ amɔng bii tɔ̃ɔreni." ⁴⁰ Yii sɔɔ ɓung soo vɔɔ yii yee, yii sɔɔ gɔ̃ɔre Laa gbĩntang aruɓe shɔng da ze ye ɓe. Shɔng ɓemi ying te leseni vɛ̃ɛni." ⁴¹ Amɔng ɓini Yeso wɔ̃ng a mɔng waa ani vii a kati mɔng gɔ̃ɔreni; sing mile shɔng alaɓe ying loke saka a vusu waa vi ani. Shɔng vinaayi vɛ̃ɛni yii tɛ̃ɛ saka vɛ̃ɛni. ⁴² Amɔng ɓi shɔng soo vɔɔ rang ɓɔɔ e a shĩng nɛrɛng kɔpɔ ziti, wa nera goro kɔtɔ. ⁴³ A ɓa wu jaadɔɔyi yãa a gãleyi ni, "Nungoko N shangshe nɔ, soo rang soo vɔɔ ɓemi aa viɓe jãa shɔng gãasi ɓe yii tole kɔtɔ walikãng a vusu waa vi ani ɓemi. ⁴⁴ Aruviya yii walikãng yii aa ayi titi vinaa vɛɛni. Soo vɔɔ ɓemi, awu titi rang, shĩng saka ɓe a wu naa walikãng ɓe sii daa wɔ̃ngni ɓe."