¹ Alaɓe Yeso de knni fefe ni mɔng gɔ̃ɔreni, wu jaadɔɔ ɓɔɔ gãle wu ni, "Shɔng manteni vi, ze lileni tara ɓɔɔ lileni jaaka ɓemiyi pĩnǃ" ² Yeso gãle wu ni, "Mɔ ze bɔrɔ jaaka ɓemi yi ye ya? Shɔng yaa tara ɓɔɔ ɓa a yuu wee ɓe shɔng daa zileyi ɓa a tipi ɓa." ³ Alaɓe wɔ̃ng ye a yuu Kɔpɔ Zaitun ɓe a dang mɔng gɔ̃ɔreni, Bituru, Yakubu, Yɔhana ɓɔɔ Andarawu yii de yɛ̃ɛ wu ni a vɔ̃seni, ⁴ Gãle wo ta, vĩɓemiyi yii daa watĩng ala weya? Ɓivi taseni ɓewe daa tase ke viɓemiyi yii kpaaye wu watĩng viya?" ⁵ Yeso gaa a shãngshe yii ni, "Nɔ kɔɔ bii aruɓe shɔngɓɔɔ na wũngte nɔ ɓa. ⁶ Shɔng vɛ̃ɛni ying e ning ing rĩng ang shãng ni, "N ɓi wuko,' yii sɔɔ wũngte shɔng vɛ̃ɛni. ⁷ Alaɓe nɔ na tãa ruu siiyi ye ɓɔɔ yãa kpatakpa aru siiyi ye, nɔ na zaa vɔɔ ɓa, vĩɓemiyi yii watĩng kɔtɔ, sɔ̃ɔniyãa de e pĩ ɓa. ⁸ Aruviya lakoo ying yupa a yuu lakoo, roonikkpantiyi a yuu roonikpantiyi. Tipi ing zite a mɔng tɔtɔki, ɓɔɔ tɔti luni wɔ̃ko. Bemiyi ɓi gaani kpãareni yeni jaa. ⁹ "Nɔ kɔɔ bii. Ying aa nɔ a shɔng ladongyi bii, ying nung nɔ a mɔng gɔ̃ɔreni laa. Nɔng shii a gomnayi ɓɔɔ kpantiyi tĩng aru mini, ana vi taseni a yii bii. ¹⁰ Shɔng waa polo ruu Laa shɔɔni a lakooyi walikãng. ¹¹ Alaɓe yii na yii nɔ ye yii sɔɔ aa nɔ ye, nɔ na yɔɔre yuu ɓa ni viɓe nɔ daa shãng ɓa. Aruviya a la wa, shɔng aa nɔ viɓe nɔ daa shãng ɓe kɔtɔ; ɓa nɔ ko daa shãng ni nɔ yuu ɓa, ɓi Suru ɓe Tɔ̃ɔving. ¹² Zũng ying lese wee a yii nung ang nung wee vɔɔ, yeejaa jɔni wu jaa. Jaa ying yuse yeejaa ɓɔɔ yĩngti jaa yii shĩng shɔng nung yii vɔɔ. ¹³ Shɔngzeng vɛ̃ɛni ying bɛ̃ɛ nɔ aru ing rĩng. Shɔngɓe na tiiye waa sɔ̃reni yãa ye, shɔngwa ko ing kpeng. ¹⁴ "Alaɓe nɔ na ze nanka vi leseni shii ye a mɔngɓe de lii ɓa wu shii a mɔni ɓa ɓe." (Shɔng ɓaleni wu too ruumi) "Shɔngɓe yii a Yahuda yii yuu yuu kɔpɔyi, ¹⁵ Shɔngɓe wu na a yuu yee na lɔɔ tipi yee ɓa kɔ wu too viɓɔɔ a vusu yee ɓa, ¹⁶ shɔngɓe wu nasi a gaa wu na sɔɔ ɓa aru wu too fara kukuni bii ɓa. ¹⁷ Ɓivi nugn kɔngni soo jaa yato ɓɔɔ shɔngɓe yii dong aa jaa ming a diki wa yiiǃ ¹⁸ Nɔ gɔ̃ɔre Laa ni vimi na watĩng ɓa a la ladu ɓa. ¹⁹ Aruviya ɓewa ɓi bɔrɔngɓɔ diki ɓe kpãareni, zɔng ɓe de watĩng ɓa a viɓe yii gaani takeni, ɓe Laa take ɓe, awa hami, ɓa, kɔ daa wɔ̃ng tɔti ɓa. ²⁰ Na ɓa Daayere gɔ̃ɔ diki ɓemiyi kɔtɔ ɓa, shɔngɓɔɔ ɓa goro ɓe daa kpeng ɓa. Aru shɔng rɔɔkeniyi ko she, ɓe rɔɔyi ɓe, gɔ̃ɔ diki ɓiyi. ²¹ Shɔngɓɔɔ na sɔɔ shãngshe nɔ ye ni, 'Ze pĩn, wuko Kirisi mi, kɔ 'Ze pĩn, wuko wu waaǃ' Nɔ na azɔng ɓa. ²² Aruviya Kirisi yãajiniyi ɓɔɔ shɔngzeni yãajini ying ke yii sɔɔ aa vi taseni ɓɔɔ vi bii zaani aruɓe yii daa lake shɔng, na wɔ̃ng ye, kɔ ɓi shɔngɓe shɔng rɔɔyi ɓe. ²³ Nɔ kɔɔ biiǃ N shangshe nɔ viɓemiyi ye aru viɓe yii daa e atĩng. ²⁴ "Atũmpu kpãareni ɓe diki wayi, 'la ing sɔɔ rii viki zii, shele ing sɔng puse mɔng ɓa, ²⁵ Seng ying lɔle a lapa, kaaka ɓee lapa ying zite.' ²⁶ Alaɓi ko ying sɔɔ ze Jaa Shɔngzeng teni a yãasi ni bɔrɔ kaaka ɓɔɔ bongseni. ²⁷ Alaɓi ko wu sɔɔ shong wu shɔngshoniyi wu sɔɔ muse shɔngɓe shɔng rɔɔyi a kaa zãasi yãa dɛ̃ɛro, viɓe yii sɔ̃ɔni yãa kati koodanga wu waa sɔ̃ɔni yãa lapa. ²⁸ Nɔ too manteni a la sĩngri. Alaɓe wu nasɛ̃ng na kpɛ̃ɛye sɔɔ tɛ̃ɛre wu ɓalayi, nɔ sɔɔ zeke ni kpee kpaaye. ²⁹ Jɔ ananko, alaɓe nɔ na ze viɓemi yii de watĩng ni, nɔ zeke kpaaye, maani ni yɔ̃rɔng ni. ³⁰ N shangshe nɔ nungoko, lakoo mi daa sɔ̃ɔ yãa ɓa na ɓa vĩɓemiyi walikãng yi watĩng ɓa. ³¹ Koolapa ni koodanga yĩng dase, N ruu bii ing dase ɓa. ³² Aru diki waa kɔ la waa, shɔngɓɔɔ ɓa goro ɓe ze ɓa, kɔ Laa shɔng shoni ɓe yii a koolapa, kɔ wu Jaa, ɓi Daa ko shee ze. ³³ Nɔ wɔ̃ng ni zeniǃ Nɔ shĩng nung, aruviya nɔ de ze ɓa kɔ ɓi la ɓe we ya ɓa. ³⁴ Wɔ̃ng ana shɔng veeye ɓe waa zanti, a yaa wu yee a shĩng wu jaa shoni yubɔrɔ yee ɓe, shɔng ɓe weya ni wu vipeleni ni, a sɔɔ gãale shɔng gaani yɔ̃rɔng yee ni wu wɔ̃ng ni zeni. ³⁵ Arugoko nɔ wɔ̃ng ni zeni aruviya nɔ de ze laɓe yubɔrɔ shɔng yee daa e ɓa; kɔ daa wɔ̃ng ni lasãani ya, kɔ yuu titi zi ya, kɔ alaɓe banti kn kaa yãa, kɔ ni gandi. ³⁶ Na e ye tɛ̃ti, nɔ na yaa wu ɓa wu kpaa nɔ a nurong ɓa. ³⁷ Viɓe N gãale nɔ N gãale shɔngzeng walikãngː Nɔ wɔ̃ng ni zeniǃ"