¹ Ya diki ziti shɔng ɓoo diki tukeni ɓɔɔ bele shaani bubula ɓe yisiti ɓani ɓa. Yubɔrɔ firisiyi ɓɔɔ shɔng labiniyi yii sing bee dɔ̃rɔng ɓe yii daa yii Yeso a sɔɔ nung wu vɔɔ ɓe. ² Aruviya yii de shãngke ni, "Ɓa a diki bele ɓa, aruɓe peleni bang da yupa ɓa a titi shɔngzeng yii ɓa." ³ Alaɓe Yeso wu sii dong a Betani a Simon shɔng vi bii yee, alaɓe yii wɔ̃ng ye a yuu teburu, sooye ɓɔɔ eke ni nung sũnunu ɓe shaa yãa vɛ̃ɛni a gugu Alabasta, ɓi nati a wu nung. Wãnke gugu ɓi a sɔɔ tɛ̃ɛ nati ɓi a wu yuu. ⁴ Shɔngɓɔyi ani amɔni ɓe yii lese yato, Yii shãng a yii nung ni, "Ɓi vii shĩnke shɔng lese nung sũnunu ɓemi viya? ⁵ Shɔng na maale nung sũnunu ɓemi wu saka wu jãa dinari la kop atu maani, a sɔɔ aa shɔng rangyi," Yii sɔɔ bɔ̃ɔse wu yãa a yuu. ⁶ Yeso sɔɔ shãng ni, "Nɔ yaa wu ta ɓĩni. Nɔng yɔre wu aruviya? Peleng mi vii tɔ̃ɔving. ⁷ Shɔng rang yii ni nɔ ni diki-di, nɔ na kase ye nɔ sɔɔ pele yii viɓe tɔ̃ɔving, N bibi ɓa diki-di nɔng zeng ɓa. ⁸ Pele viɓe likɔtɔ wu pele ye. Sɔ̃ɔreng nung ye a bii aru gbãni. ⁹ Nungoko N gãale nɔ, mɔngɓe shɔng na waa ruu tɔ̃ɔving ɓemi ye a koodang a walikãng, shɔng shãng viɓe sooye ɓemi pele ɓe, aru shɔng yeni nugn a wuni." ¹⁰ Yahuda Iskariyoti, goro a titi kop atu ziti, ke a wa yubɔrɔ firisiyi bii aruɓe daa aa wu yii ɓe. ¹¹ Alaɓe yuborɔ firisiyi yii tãa ye, yii pele puru yato a sɔɔ vaase wu ni ying a wu saka. A gaa bee ni dɔ̃rɔng ɓe daa kpaa ke wu aa wu yii ɓe. ¹² A diki shɔni ɓe shaani bubula ɓe yisiti ɓa ani ɓa, alaɓe yii aa vii ani jaa mɛrɛ Tukeni ye, wu jaadɔɔyi yii gãle wu ni, "Mɔ kase wo wa gongte mɔng a mɔngɓe we, aruɓe mɔ daa shaa vishãng ɓee diki Tukeni weya?" ¹³ Shong wu jaadɔɔyi ziti a gãle yii ni, "Nɔ wata a vusu ɓundang, shɔngɓɔɔ too gugu mɛɛ ing kɔse ni nɔni. Nɔ dũng wu. ¹⁴ Na ɓoo yee ye, nɔ dũng nɔ sɔɔ shãngshe shɔng yee ɓi ni, 'Shɔng Mangteni vi tɔɔni, "N jaaka rooni zangti weya ɓe N daa waa shaa vishãng Tukeni ni N jaadɔɔyi ni?'" ¹⁵ N tase nɔ bɔrɔ jaaka ɓe shɔng gongte ye tɔ̃ɔving a lapa. Nɔ gongte mɔng ɓi a mɔngwa." ¹⁶ Wu jaadɔɔyi yii wa ke a ɓoo ɓundang ɓi. Yii kpaa viɓi walikãng anaɓe gãle yii ɓe, yii sɔɔ gongte vishãng Tuukeni a mɔni. ¹⁷ Ning lasãni, e ning kop atu ziti ɓemi yini. ¹⁸ Alaɓe yii wɔ̃ngre ye a yuu teburu yii sɔɔ de shaa vishang, Yeso gãleyi ni, "Nungoko N gãle nɔ, shɔng goro ɓe ing shaa vishãng ni mini ing maleng." ¹⁹ Yii walikãng yii wɔ̃ngni viki yato, yii goro-go yii tɔɔ wu ni, "Nungoko ɓa miko ɓa ya?" ²⁰ Yeso sɔɔ koseyi a shãng ni, "Ɓi goro a titi kop atu ziti ɓemi, shɔngɓe ing daa bubula ni mini hami a pii. ²¹ Aruviya Jaa Shɔngzeng daa waa anaɓe shɔng binke aru wuni ɓe. Ɓivi nugn kɔngni shɔnɓe ing maale Jaa Shɔngzengǃ Likɔtɔ shɔng na de ye wu ɓa." ²² Laɓe yii de shaa vishang ni, Yeso too bubula, a shĩng pãnti ani, a daale ke. A aa yii a sɔɔ shãng ni, "Te vimi ta. Ɓemi wuko N bii." ²³ A too waa mɛɛ, a dɔɔre Laa, a aa yii, yii sɔɔ ɓoo walikãng. ²⁴ A gãleyi ni. "Bemi ɓing kpaa maani yãa, kpaa ɓe shɔng tɛ̃ɛre aru shɔng vɛ̃ɛni. ²⁵ N gãle nɔ nungoko, N ɓoo rɛni nung la ɓemi tɔ ɓa na ɓa waa diki ɓe N ɓoo polo a Laa roonikpanti ɓa." ²⁶ Alaɓe yii tãng soo ye, yii waa Kɔpɔ Zaitun. ²⁷ Yeso gãleyi ni, "Nɔ walikãng nɔng wete, aruviya shɔng binke ni. 'N nung jaaganiva mɛrɛ ying sɔɔ sate fɔɔ.' ²⁸ Atũmpu ɓe N na yupa ye, N waa Galili a nɔ tĩng." ²⁹ Bituru gãle wu ni, "Kɔ shɔng wete walikãng, N bibi N wete ɓa." ³⁰ Yeso gãle wu ni, "N gãale mɔ nungoko, Lami-ananko, a zii mi- banti kn daa kaa yãa ɓa yaa ziti ɓa na ɓa mɔ lere yãa aru mini yaa tati ɓa." ³¹ Bituru sɔɔ shãng ni kaka a shãng ni, "Kɔ N vɔɔ kɔtɔ ni mɔni, N daa paa yãa ɓa aru mɔni ɓa. Yii walikang yii aa yãa ananko. ³² Yii e mɔngɓe shɔng ɓaani Gasamani, Yeso sɔɔ gãle wu jaadɔɔ yii ni, "Nɔ wɔ̃ng ta a mɔmi N waa gɔ̃ɔreni pĩn." ³³ A too Bituru, Yakubu, ɓɔɔ Yɔhana ni wu ni a sɔɔ gaa kpaareni ɓɔɔ yɔreni yuu vɛ̃ɛni. ³⁴ A gãleyi ni, "N surubi duuye ye vɛ̃ɛni, ana N kpa vɔɔni ye. Nɔ shii ta a mɔmi nɔ sɔɔ shĩng nung." ³⁵ Ɓe waa ye a tĩng pota, Yeso wete a tipi a gɔ̃ɔre Laa ni nang wɔ̃ng kɔtɔ la mi wu daseng. ³⁶ A shãng ni, "Abba, Daa ,vii walikãng de kpãa ɓa ni mɔ ni . Too jeewa ɓemi ta ang kaa bii. Ɓa N kaseni ɓa, ɓi mɔ ɓe." ³⁷ A e tɔti a kpayi a nurong, a gãle Bituru ni, "Simon, mɔ a nurong ya? Mɔ daa gaa ɓa ɓee la saka goro ɓaya? ³⁸ Mɔ shĩng nung mɔ sɔɔ gɔ̃ɔre Laa aruɓe mɔ daa ɓoo ɓa a vusu maaseni ɓa. Suru kase kɔtɔ ananko, bii sɔɔ jile kɔtɔ." ³⁹ A sɔɔ ke tɔti a wa gɔ̃ɔre Laa, a pase tɔti ruu goro miko. ⁴⁰ Alaɓe e ye tɔti, a kpayi a nurong, aruviya yii nung kpite ye. Yii de ze viɓe yii daa gãle wu ɓa. ⁴¹ A e tɔti ɓee tati a gãleyi ni, "Nɔ dong roo nurong ang sɔɔ wɔ̃ke ya? Tiseyeǃ La tiseye. Mile pĩnǃ Shɔng maale Jaa Shɔngzeng ye a shɔng ruvĩniyi naa. ⁴² Nɔ yupa ta; wo waa ta. Ze pĩn, shɔngɓe ing maaleng mi kpaye maani." ⁴³ Alaɓe wu dong a yuu yãa shãngni, Yahuda, goro a titi kop atu ziti mi, de jãani, ɓɔɔ mɔɔ vɛ̃ɛni ni wuni ni yeewa ɓɔɔ je bala a naa, yii ke a yubɔrɔ firisiyi, shɔng labiniyi, ɓɔɔ shɔngbɔrɔyi bii. ⁴⁴ Hami wu shɔng maaleni taseyi vi taseni, a gãle yii ni, "Shɔngɓe nang kɔ̃ɔ wu ye bii ɓi shɔng ɓi ko. Nɔ yii wu shɔng gaani mɔng yii waa ni wu ni." ⁴⁵ Alaɓe Yahuda too ye ɓe, ɓani jang ɓaseni ɓa e Yeso bii a shãng ni, "Rabbi," a sɔɔ kɔ̃ɔ wu. ⁴⁶ Yii de sɔɔ waare naa ni a yii wu. ⁴⁷ Shɔng goro ɓɔɔ ɓe shii a yii kaa bii ɓe zɔ̃ wu yewaa a koo a sɔɔ zĩngse yubɔrɔ firisi jaa shoni yuu shoo. ⁴⁸ Yeso gãleyi ni, "Nɔ e N bii anaɓe shɔng e shɔngɓɔɔ yuu, ni yeewaa ɓɔɔ bala, nɔ ying ya?" ⁴⁹ Alaɓe N ni nɔ ni diki di N sii manti vi a jaaka Laa, nɔ de ying ɓa. Vimi kn tĩng aruɓe ruu Laa daa wɔ̃ng anaɓe shɔng shãng ɓe." ⁵⁰ Shɔngɓe yini Yeso ni walikãng yii da wu a sɔɔ yule a kati. ⁵¹ Jekasa ɓɔɔ, ɓe tuse fara puru ɓe sii gn a bii ko shee, sing dũng Yeso. Alaɓe shɔng yii wu ye ɓe, ⁵² a ya wu fara bii a sɔɔ yuu zũng waati. ⁵³ Yii tese Yeso a tĩng a waare wu yubɔrɔ firisi bii. A mɔng ɓi yii muse mɔngoro ni wu ni walikãng yubɔrɔ firisiyi, shɔngbɔrɔyi, ɓɔɔ shɔng labiniyi. ⁵⁴ Hami Bituru dũng wu atũmpu fefe, fefe ɓe waa yubɔrɔ firisi yɔ̃rɔng ye. A wɔ̃ng a shɔng gaaniyi titi, de bise bii ni a nung yaa. ⁵⁵ Hami yubɔrɔ firisi ɓɔɔ shɔng ladong Yahudayi walikãng yii bee yãa shãngni a Yeso yuu aruɓe yii daa nung wu vɔɔ ɓe. A de kpaa ɓa goro ɓa. ⁵⁶ Aruviya shɔngzeng vɛ̃ɛni yii shãng ruu yãa jĩngni a wu yuu, yii yãa shãngni ɓi de ɓase ɓa. ⁵⁷ Shɔngɓɔɔ yii yupa a shãng yãa jĩngni a wu yuu; yii shãng ni, ⁵⁸ "Wɔ tãake ing shãng ni, 'N wãnke jaaka Laa ɓe shɔng maa ni naa, a diki tati wu sɔɔ maa ɓɔɔ ɓe shɔng de maa ɓa ni naa ɓa."' ⁵⁹ Ni ɓe tɔti yii yãa shãngni ɓi de ɓase ɓa. ⁶⁰ Yubɔrɔ firisi yupa a yii titi a sɔɔ yɛ̃ɛ Yeso, "Mɔ yãa kooni ɓani ɓaya?Ɓivi shɔng ɓemiyi ying shãng a mɔ yuu viya?" ⁶¹ Tãa mɔng ni shoo a de koo yãa ɓɔɔ ɓa. Yubɔrɔ firisi yɛ̃ɛ wu ruu tɔti a shãng ni, "Mɔ ko Kirisi, Shɔng Pãnti Goro mi Jaa ya?" ⁶² Yeso gãle wu ni, "Ɓi Miko; mɔng sɔɔ ze Jaa Shɔngzeng alaɓe wɔ̃ng ye a kaa nashãng ɓee kaaka teni ni yãasi ni a koolapa." ⁶³ Yubɔrɔ firisi tãa wu fara a shãng ni, "Wo dong bee tɔti shɔng ani yãa shãngni ɓe weya? ⁶⁴ Nɔ tãa ruu rubɔng ɓi ye. Nɔng too vi a wu yuu viya? Yii walikang yii lese wu ana shɔngɓe waa ye shɔng nung wu vɔɔ ɓe. ⁶⁵ Shɔngɓɔɔ yii gaa tuleni wu sãari a bii a sɔɔ kuuke wu watĩng a sɔɔ nung wu ni yii naa a shãng ni, "Shãng zuru yãa taǃ" Shɔng gaani ɓi yii too wu a sɔɔ, nung wu. ⁶⁶ Alaɓe Bituru dong a yɔ̃rɔng yee, goro a titi yubɔrɔ firisi jaa sooye shoni e wu bii. ⁶⁷ A ze Bituru de bise bii ni, a shĩngshe wu nung a bii dɔrɔrɔ a shãng ni, "Mɔ jɔ ni shɔng Nazara, Yeso ko." ⁶⁸ A paa yãa a kati, a shãng ni, "N de ze wu ɓa kɔ N too viɓe mɔng shang aru ni ɓa. A sɔɔ ke a yɔ̃rɔng yee. Banti kn sɔɔ kaa yãa ke. ⁶⁹ Jaa shoni sooye mi ze wu a sɔɔ gaa shãngsheni shɔngɓe yii shii a mɔni, "Shɔng veeye ɓemi wu ɓi yi goro ɓɔɔ koǃ" ⁷⁰ A paa yãa tɔti. La wodot shɔngɓe yii shiile a mɔni yii gãle Bituru ni, "Nungoko mɔ goro a yii titi, aruviya mɔ jɔ shɔng Galili ko." ⁷¹ A gaa leseni wu yuu a sɔɔ teng Laa ni, "N de ze shɔngɓe nɔng shãng ruu aru wu ni ɓe ɓa." ⁷² Ɓani jang ɓaseni ɓa banti kn ɓi sɔɔ kaa yãa ɓee ziti. Bituru sɔɔ yee nugn ni ruu ɓe Yeso gãle wu ni, "Banti kn ing kaa yãa ya ɓa ziti ɓa, mɔng paa yãa aru mini yaa tati," Wu bii vɔɔ ke a sɔɔ kaa yãa vɔɔ.