¹ A ɓaa kop atu ziti mi yii yãa a yãwe a sɔɔ aa yii kaaka ni kaaka naa yii kese vĩnivĩvĩ rãmangyi walikãng yii sɔɔ gante zɔng vɔɔ ɓewe ya. ² A shongyi yii waayã aru roonikpanti ɓee Laa yii sɔɔ gante shɔngɓe yii vɔɔ. ³ A gãale yii ni, “Nɔ na too viɓɔɔ ɓa a nɔ dɔ̃rɔng-kɔ bala, kɔ jeduku, kɔ bubula, kɔ saka, kɔ vi tuseni ɓɔɔ ɓa. ⁴ A yee ɓe nɔ na ɓooye, nɔ wɔ̃ng a mɔni wu laɓe nɔng yaa mɔng ɓi ɓe. ⁵ A mɔngɓe shɔng na de te nɔ ɓa, nɔ na de yaa tipi ɓini, nɔ kute nɔ zangbu dɔɔ wu ko ing wɔ̃ng vi taseni a yii yuu." ⁶ Yii sɔɔ daa mɔngɓi a waa jekooyi, a waayãa polo ruu tɔ̃ɔving a sɔɔ gante shɔng a mɔngɓe weya. ⁷ Alaɓe Hiridu yuranko tãa viɓe ing watĩng ye walikãng, viɓi aa wu zaani, A ruviya shɔngɓɔɔ yii tɔɔni Yɔhana yupa ye a yusa, ⁸ shɔngɓɔɔ yii jɔ ni ɓi Iliya ke ke, shɔngɓɔyi sɔɔ tɔɔni ɓi goro a titi shɔngzeniyi ɓe sii tɛ̃tɛ̃ yupa. ⁹ Hiridu shãng ni, N zĩng Yɔhana yuu. Ɓiwe N tãa zɔng vĩmi a wu yuu weya?" A sɔɔ bee dɔ̃rɔng ɓe daa ze wu ɓe. ¹⁰ Alaɓe wu shɔng rɔɔkeniyi yii zuse, yii gãale wu viɓe yii pele ɓe walikãng. Sɔ waani yini a yãwe, yii sɔɔ waa ɓani shɔng zeni ɓa a tipi ɓe shɔng ɓaani Baseda. ¹¹ Alaɓe mɔɔ tãa vĩmi ye, yii dũng wu a tũmpu. A te yii ɛni a sɔɔ gãale yii aru roonikpanti ɓee Laa, a sɔɔ gante shɔngɓe yii kase ganteni ɓe. ¹² Hami alaɓe diki kpaa ye wu ɛ sɔ̃niyãa ɓe, kop atu ziti ɓemi yii ɛ wu bii a gãale wuni, "Vaase mɔɔ yãa ta aruɓe yii daa waa jekooyi ɓɔɔ tipiyi aruɓe yii daa kpaa mɔng rooni ɓɔɔ vishaani, aruviya wo a mɔngɓe shɔng ɓa ani ɓa. ¹³ A sɔɔ gãale yii ni “Nɔ aa yii viɓɔɔ ta yii shaayi” Yii shãngni, "Wo viɓɔɔ ɓa ɓe jãa bubula maani ɓɔɔ jezũng ziti ɓa-na ɓa wo waa woo vishang aru shɔngɓemi yii walikãng ɓa." ¹⁴ (Amɔni shɔngzeng yii wa labong maani kɔtɔ). A gãale wu jaadɔɔyi ni, “Shĩng yii ta yii wɔ̃ng a tipi totok wu wa la ziti atu kop.” ¹⁵ Yii pele ananko, a shĩng shɔng wɔ̃ng a tipi. ¹⁶ A too bubula maani mi ɓɔɔ jezũng ziti ɓemi, a peng nung a koolapa, a tɛ̃ɛreyi zuuku a sɔɔ daale takata a aa wu jaadɔɔyi aru yii a mɔɔ. ¹⁷ Yii shaa walikãng a puuyi, shɔng sɔɔ muse gãasi ɓe yaase-ɓe waa ɓiti kop atu ziti ɓe daaleni ɓi. ¹⁸ A ɛ alaɓe Yeso ing gɔɔre Laa wu a bĩni, wu jaadɔɔyi yini wuni. A yɛ̃ɛ yii ni “Mɔɔ yii shãngni miko weya?” ¹⁹ Yii kase wuni, "Yɔhana shɔng batizima. Shɔng gãasi yii tɔɔ ni ɓi Iliya, shɔng gãasi yii tɔɔni ɓi goro a titi shɔngzeniyi ɓe yii sii tɛ̃tɛ yupa." ²⁰ A sɔɔ yɛ̃ɛ yii ni “Nɔ bibi nɔ tɔɔni miko weya" Bituru kase wu ni, “Kirisi ɓee Laa” ²¹ A sɔɔ kɔse yii yãa ni yii na gãale shɔngɓɔɔ ɓa, ²² A shãng ni “Jaa Shɔngzeng ing kpãare aru vi vɛ̃ɛni shɔngbɔrɔyi ɓɔɔ yubɔrɔ firisiyi ɓɔɔ shɔng labiniyi ying ɓɛ̃ɛ wu, yii sɔɔ nung wu vɔɔ a diki tati ing sɔɔ yupa” ²³ A sɔɔ gãale yii walikãng ni, "Shɔngɓe na kase ke wu dũng, wu ɓɛ̃ɛ wu yuu sasat wu sɔɔ too lajisheni dikidi wu sɔɔ dũng. ²⁴ Shɔngɓe na kase ke wu kpengse wu surubi ing kpaa ɓa, shɔngɓe na sɔɔ ɓɛ̃ɛ wu surubi ye aru mini ing kpaa kɔtɔ. ²⁵ Ɓivi shɔngzeng daa kpaa ke na tole vi koodanga ye walikãng na sɔɔ loke kɔ daa wu surubi ye viya? ²⁶ Shɔngɓe na tãng yusɛ̃ ye ɓɔɔ N ruu shãngniyi, Jaa Shɔngzeng ing tãa wu yusɛ̃ jɔ alaɓe na ɛye ni wu bongseni ɓɔɔ wu Daa bongseni ɓɔɔ wu tɔ̃ɔving shɔng shoniyi. ²⁷ Nungoko N gãale nɔ, shɔngɓɔɔ ani ɓe yii shiile a mɔmi ɓe ying vɔɔ ɓa na ɓa yii ze roonikpanti ɓee Laa ye ɓa. ²⁸ Hami a tũmpu diki nawa dɛ̃ɛro ɓe Yeso shãng ruumiyi, a too ni wuni Bituru ɓɔɔ Yɔhana ɓɔɔ Yakubu a vɔ̃ng lapa kɔpɔ aru wu gɔ̃ɔre Laa. ²⁹ Alaɓe wu a Laa gɔ̃ɔreni, wu watĩng kɔse, wu farabi sɔɔ rii puru shang. ³⁰ Zepĩn, shɔngzengyi ziti ying shãng yãa ni wuni, Musa ɓɔɔ Iliya, ³¹ ɓe yii ke a vusu bongseni, yii shãng yãa ni wuni aru wu waani, ɓe kpaaye wu sɔ̃ɔre yãa a Urushalima. ³² Hami Bituru ni shɔngɓe yii sii ni wuni nurong kpite yii ye a bii, Alaɓe yii yupa ye ɓe, ying ze wu bongni a sɔɔ ze shɔngzengyi ziti ɓe yii shiile ni wuni. ³³ Alaɓe yii de waani fefe ni Yeso ni, Bituru shãngni “Yubɔrɔ, likɔtɔ ɓe wɔ a mɔmi. Yaa wo ta wo gonte kute tati, goro mɔ ɓe, goro ɓɔɔ Musa ɓe, goro ɓɔɔ Iliya ɓe" (De ze viɓe ing shãng ɓa.) ³⁴ Alaɓe de shãng viɓemi ni, yãasi ɛke a kuuyi, yii sɔɔ zaa vɔɔ aɓe yii ɓoo vusu yãasi ɓe. ³⁵ Yiri yãa ke a vusu yãasi ɓi a shãngni” Ɓemi ɓi N Jaa, ɓe shɔng rɔɔ wu; nɔ weshoo a wuni.” ³⁶ Alaɓe yiri yãa ɓemi shãng ye ɓe, shɔng kpaa Yeso a bĩni. Yii wɔ̃ng kiriki a de gãale shɔngɓɔɔ ɓa a diki waayi ɓa aru viɓe yii ze ɓe. ³⁷ Ni gandi ɓɔɔ, alaɓe yii lɔɔ ye a yuu kɔpɔ, mɔɔ vɛ̃ɛni yii kpaa wu. ³⁸ Zepĩn, shɔngɓɔɔ a vusu mɔɔ lang yãa, a shãng ni “Shɔng manteni vi, N gɔ̃ɔre mɔ kɔtɔ mɔ zeng jaa, wu ko N jaa goro tĩngtĩng. ³⁹ Zepĩn, sũru sɔɔ dũngni wuni a sɔɔ langke yãa ɓani jang ɓaseni ɓa, a shĩng wu vɔɔleni a sɔɔ ke a wu yãa fukuku. Kpãa kɔtɔ wu yaa wu sɔɔ shĩngke jɛ̃ɛle bii ɓa dang ɓa. ⁴⁰ N gɔ̃ɔre mɔ jaadɔɔyi ye yii kese wu ni gaa, yii de zenung ɓa. ⁴¹ Yeso kase yãa a sɔɔ shãngni, "Nɔ ɓe nɔ anizɔng ɓa ani ɓa ɓɔɔ lakoo kparivava, N daa wɔ̃ng nukovĩ ni nɔ N sɔɔ tii nɔ viya? Ɛse mɔ jaa ta a mɔmi." ⁴² Alaɓe jaa ɓi de ɛni, vĩnivĩvĩ rãmang loke wu a tipi a shĩng wu vɔɔleni. Yeso sɔɔ kɔse vĩnivĩvĩ rãmang yãa a sɔɔ gante jaa ɓi, a sɔɔ aa wu yeɓi a naa. ⁴³ Bii zaa yii a mɔni walikãng aru bongni ɓee Laa. Alaɓe bii dong zaa yii a viɓe N pele walikãng, a gãale wu jaadɔɔyi ni, ⁴⁴ “Nɔ yaa ruumi wu ɓoo nɔ shoo tɔ̃ɔvingː Shɔng maale Jaa Shɔngzeng a shɔngzengyi naa” ⁴⁵ Vi leseni wu ko yii de too ruu ɓe N shãngshe yii mi ɓa. Aruviya ruu ɓi a vɔ̃seni a yii bii, arugoko yii de too dĩngli ruu ɓi ɓa ni ɓemi walikãng yii zaa vɔɔ yɛ̃ɛni wu aru viɓe shãng ɓe. ⁴⁶ Alaɓini yãa lereni de yuu paa ni a yii titi, ni ɓi we daa wɔ̃ng bɔrɔngbɔ weya? ⁴⁷ Aɓe Yeso, too yii lereni ɓe a yii sĩngsĩng ye, a too jaa tɔkɔlɔng a shĩng wu a wu kagn ⁴⁸ a sɔɔ gãale yii ni, shɔngɓe na te wejaa tɔkɔlɔng ɓemi ye ang rĩng, te miko, shɔngɓe na sɔɔ teng ye, te shɔngɓe shong ɓe. Aruviya shɔngɓe a nɔ titi tɔkɔlɔng ɓe wu ko bɔrɔ." ⁴⁹ Yɔhana kase wu ni “Yubɔrɔ, wɔ ze shɔngɓɔɔ ing kese vĩnivĩvĩ rãmang ni mɔ rĩng wo sɔɔ zãare wu, aruviya wu ɓa a wo titi ɓa” ⁵⁰ “Nɔ na zãare wu ɓa” Yeso gãale yii ni, "shɔngɓe na de ɓɛ̃ɛ mɔ ɓa wu ɓi mɔ ɓe” ⁵¹ Alaɓe diki kpaaye maani aru shɔng too wu, shĩng yuu wu waa Urushalima. ⁵² A shong wu shɔngshoniyi a wu tĩng, yii sɔɔ waa ke a ɓoo jekoo ɓee Samariya aru yii gonte mɔng walikãng aru wuni. ⁵³ Vi leseni wu ko shɔng mɔngɓiyi yii de te wu ɛni ɓa aruviya shĩng yuu ye ni N waa Urushalima. ⁵⁴ Alaɓe wu jaadɔɔyi Yakubu ɓɔɔ Yɔhana yii ze vimi ye, yii tɔɔni, "Daayere, mɔ kase wo shãng yãa ni yaa wu lɔɔ ta a koolapa wu ɛ lese yii ya? ⁵⁵ Sɔɔ rii bii a kɔse yii yãa, ⁵⁶ yii sɔɔ waa jekoo ɓɔɔ. ⁵⁷ Alaɓe yii de kĩngni a dɔ̃rɔng ɓe, shɔngɓɔɔ gãale wu ni, "N dũng mɔ kɔtɔ a mɔng ɓe mɔng waa walikãng." ⁵⁸ Yeso gãale wu ni “kpãra yii gogo ani, jenung ɓee lapa yii saati ani, Jaa Shɔngzeng wu ɓe mɔng shĩngni yuu ɓa ani ɓa. ⁵⁹ A sɔɔ gãale shɔngɓɔɔ ni “dũng ta.” Sɔɔ kase ni “Daayere, yang ta N waa gbãa maadaa mi shɔni." ⁶⁰ a sɔɔ gãale wu ni, "Yaa vɔɔ ta yii gbãa yii yuu. Mɔ bibi, waata mɔ waayãa fefe aru roonikpanti ɓee Laa.” ⁶¹ Alaɓi shɔngɓɔɔ tok shãngni "N dũng mɔ kɔtɔ, Daayere, N sɔɔ mi shɔni N waa vaase shɔngɓe yii ang yee yãa pĩng” ⁶² Yeso kase wu ni, “Shɔngɓɔɔ ɓa ɓe na yii naa ye gbãa langni na sɔɔ ranung ye ni tũmpu daa waa ɓooni roonikpanti ɓee Laa.”