¹ Ɓani jang ɓaseni a tũmpu ɓe Yeso gaa waani kaa ɓundangyi ɓɔɔ jekooyi totok, waayãa a sɔɔ shãng polo ruu tɔ̃ɔving aru roonikpanti ɓee Laa. Kop atu ziti mi yini wuni, ² ni gãasi sooyeyi ɓe ganteyi a vĩnivĩvĩ suruyi ɓɔɔ vɔɔ totokː Mɛrɛyamu ɓe shɔng ɓaa wu ni Mandaliya, ɓe kese vĩnivĩvĩ rãmang nawa tati a wu bii; ³ Johana, Chuza soo, shɔngɓe yise Hiridu yee; Suzana; ɓɔɔ shɔng gãasiyi, ɓe, a yii vusu vii naa, yii aa yii viɓe yii kase ɓe walikãng. ⁴ Alaɓe mɔɔ kpãa yii de museni, shɔngzengyi yii de ɛ wu bii ni a tipi ɓɔɔ a tũmpu tipi ɓɔɔ, a shãngshe yii yãagani ɓɔɔː ⁵ “Shɔnglangni mɔng ɓɔɔ waa kulu wu ruu lɔkɔ. Alaɓe ruu ye ɓe, ɓɔɔ yi wete a yãa dɔ̃rɔng shɔng sɔɔ nale ni dɔɔ, jenung ɓe lapa yii sɔɔ lese gãasi. ⁶ Ɓɔɔ yii wete a yuu tara, alaɓe gaa bongni ye ɓe, a waa teke, aruviya de kpaa mɔng zãngzãng ɓa. ⁷ Ɓɔɔ yii wete a kɔkɔ, kɔkɔ ɓii bong a yãawe ni lɔkɔ ɓi ni a sɔɔ kɔ̃sɛ wu a bii. ⁸ Ɓɔɔ yii sɔɔ wete a tipi tɔ̃ɔving a yejaa ɓe jãa la maani kɔtɔ." A tũmpu ɓe Yeso shãng viɓemiyi ye, a ɓaa yãa, "Shɔngɓe wu shoo tãani na ani, wu tãake.” ⁹ Wu jaadɔɔyi yii yɛ̃ɛ wu ni yãagani ɓemi tase ki viya ¹⁰ A shãngni, "Zeni vi vɔ̃ɔseni roonikpanti ɓee Laa shɔng a nɔ ye, aru shɔng gãasi N shãng ni yãagani, aruɓe yii daa mile ke ying ze ɓa, ying tãake ying zenung tooni ɓa'. ¹¹ Hami ɓemi wu ko dĩngli yãagani ɓiː Lɔkɔ ɓi wu ko ruu Laa. ¹² Ɓe yii a yãa dɔ̃rɔng mi yii ko shɔngɓe yii tãa ruu Laa, vĩnivĩvĩ rãmang ɛ a too a yii sĩngsĩng aruɓe yii daa azɔng ɓa aruɓe yii daa kpeng ɓa. ¹³ Ɓe yii a yuu tara ɓi yi ko shɔngɓe, alaɓe yii tãa ruu Laa a teni yato puru. Yii dĩngli ɓa ani ɓa; yii azɔng pota, ala maaseni yii sɔɔ wete. ¹⁴ Lɔkɔ ɓeyi wete a yuu kɔkɔ mi yii ko shɔngɓe yii tãa ruu Laa, alaɓe yii de waa ni, kaseni vii koodanga ni vi naa ɓɔɔ tãani tɔ̃ɔving ɓe koodanga sɔɔ kɔ̃seyi, yii rɛni de sɔɔ zũng ɓa. ¹⁵ Lɔkɔ ɓeyi wete a tipi tɔ̃ɔving ɓe, yii ko shɔngɓe yii tãa ruu Laa ni nungoko ɓɔɔ sĩngsĩng tɔ̃ɔving, a yise ɓatata a sɔɔ yejaa ni lemɓa ɓɔɔ maanign. ¹⁶ Shɔngɓɔɔ ɓa ɓe daa ɓeng yaa a sɔɔ kuuke ni pii ɓa kɔ wu shĩng a ɓuu kɔngsi. Vi peleni wuko, wu shĩng a yuu lateni aruɓe shɔngɓe weya na ɓoo ye daa ze ɓenkeni ɓi. ¹⁷ Aruviya viɓɔɔ ɓa ɓe a vɔ̃seni ɓe shɔng da ze ɓa ɓe, kɔ viɓɔɔ ani ɓe a vɔ̃seni ɓe shɔng daa ze ɓa wu sɔɔ ɛ mɔng ɓenkeni. ¹⁸ Arugoko nɔ weshoo tɔ̃ɔving, aruviya shɔngɓe wu vi ani, shɔng aa wu ɓɔɔ vɛ̃ɛni, vi leseni wuko shɔngɓe wu ɓe ɓa ani ɓa, kɔ viɓe mile ke ni ɓi wu ɓe shɔng te akati a wu naa. ¹⁹ Amɔni yĩngɓi ɓɔɔ zũngɓiyi yii ɛ wu bii, yii de kpaa waani wu kagn ɓa aru mɔɔ. ²⁰ Shɔng gãale wu ni “Inna ɓɔɔ zũngwayi yii shile a gaa, yii kase mɔ zeni." ²¹ Yeso sɔɔ kase yii ni “Maana ɓɔɔ mazũngyi yii ko shɔngɓe yii tãa ruu Laa a sɔɔ pele ɓe. ²² Hami a diki ɓɔɔ ɓoo vusu tuusi ni wu jaadɔɔyi a sɔɔ gãale yii ni, "Wo tuuke dang yãa mɛɛ kaawa ta." Yii sɔɔ gaa tuukeni. ²³ Alaɓe yii de tuukeni ɓe nurong sɔɔ too wu. Bɔrɔ zãasi mɛɛ sɔɔ yupa a mɔni ni kaaka ni, yii tuusii de yini mɛɛ, yii a boro yuu yɔreni. ²⁴ Amɔni Yeso wu jaadɔɔyi yii ɛ wu bii a yuse wu paa, a gãale wuni “Yubɔrɔǃ Yubɔrɔǃ Wo de vɔɔniǃ A sɔɔ yupa a kɔse zãasi ɓɔɔ wũngseni mɛɛ, yii sɔɔ yaa wũngteni, a shii kiriki. ²⁵ A sɔɔ gãale yii ni “Nɔ gn shĩngni weya” yii zaa vɔɔ a sɔɔ yii naa a dang gn, a sɔɔ yɛ̃ɛle we ni, "Ɓemi wu ko weya, ɓe shãng yãa ɓe zãasi ɓɔɔ mɛɛ, yii dũng wu yãa?" ²⁶ Yii sɔɔ waani kaa Garisana, ɓe a kaa dang yoo Galilii. ²⁷ Alaɓe Yeso lɔye a tipi, shɔngɓɔɔ ɓe wu zãasi a bii kpaa wu a ɓundang ɓi. Aruviya wɔ̃ng ye diki ɓololo tuse fara ɓa a bii ɓa, roo tɔti ɓa a yee ɓa wɔ̃ng a titi yusayi. ²⁸ Alaɓe ze Yeso ye, a lang yãa a sɔɔ wete a Yeso watĩng a shãng ni kaaka yiri yãa, “Mɔ kase mɔ pele vi ni mini viya, Yeso, Yuranko Laa Jaa? N gɔ̃ɔre mɔ, mɔ na kpãareng ɓa." ²⁹ Aruviya Yeso gãale vĩnivĩvĩ suru ye ni wu keta a shɔngɓi bii. Aruviya diki wɔ̃ng ye vɛ̃ɛni ɓe yii wu, ni ɓe dɔɔɓe shɔng maa wu ni dĩngre saka a sɔɔ ɓɔ̃ɔ wu a shĩng wu shɔng gaa wu dɔɔ, rɔɔke dĩngre saka ɓɔɔ vĩnivĩvĩ rãmang sɔɔ too wu a waare wu vusu jĩngti. ³⁰ Alaɓi Yeso yɛ̃ɛ wu ni, “Mɔ rĩng ni viya?” A shãng ni, 'Vɛ̃ɛni,' aruviya vĩnivĩvĩ rãmangyi vɛ̃ɛni yii ɓoo wu bii. ³¹ Yii watĩng a gɔ̃ɔre wuni wu na gãale yii ɓa yii ɓoo dii mɔng kpãareni ɓa. ³² Hami lava gãayãa yii sing shaa vishang a kaa jebu. Vĩnivĩvĩ rãmangyi yii gɔ̃ɔre wuni wu yaa yii ta yii waa ɓooyi bii, sɔɔ yaase yii dɔ̃rɔng. ³³ Arugoko vĩnivĩvĩ rãmang ɓiyi yii ke a shɔngɓi bii a sɔɔ waa a ɓoo bii gãayãa ɓiyi, gãayãa ɓiyi walikãng yii tɛ̃ɛ we a yuni a waa ɓoole mɛɛ a sɔɔ vɔɔ a mɔngni. ³⁴ Alaɓe shɔngɓe yii sing gaa gãayãa ɓiyi yii ze viɓe watĩng ye, yii yuu ke a waa gãale shɔng a ɓundang ɓɔɔ kaa tipi ɓi, ³⁵ Arugoko shɔngɓiyi yii ke a waa ze viɓe watĩng ɓe, yii sɔɔ e Yeso bii a kpaa shɔngɓe vĩnivĩvĩ rãmangyi yii ke a wu bii ɓe. Wɔ̃ng ye a Yeso dɔɔ, shɔng ɓoose wu fara ye a bii wu lereni tɔ̃ɔving sɔɔ ye; bii sɔɔ zaayi. ³⁶ Amɔni shɔngɓe yii ze viɓi yii gãale shɔng dɔɔɓe shɔngɓe vĩnivĩvĩ rãmang sii yii wu gante ɓe. ³⁷ Alaɓi ko shɔngzengyi walikãng ɓe yii a kaa Garisana yii gãale Yeso ni wu daa yii bii ta, aruviya vɔɔ zaani ɓoo yii bii ye vɛ̃ɛni. Arugoko sɔɔ ɓoo vusu tuusi a sɔɔ zuse ke. ³⁸ Shɔngɓe vĩnivĩvĩ rãmang ke a wu bii mi gɔ̃ɔre wu ke ni wu yaa wu ta wu waani wuni, Yeso vaase wu yãa wu wata, a shãngni ³⁹ “Zuse mɔ yee ta mɔ wa shãng ɓatata viɓe Laa pele mɔ walikãng." Shɔngveeye ɓemi waa wu waani a waayãa a vusu ɓundang ɓi walikãng a yuu viɓe Yeso pele wu ɓe. ⁴⁰ Hami alaɓe Yeso zuse ye ɓe, mɔɔ te wu ɛni, aruviya yii sing gaa wu ɛni. ⁴¹ Zepĩn, shɔngveeye ɓɔɔ shɔng ɓaa wu ni Jayirusi, goro a titi yuboro ɓe mɔng gɔ̃ɔreni, ɛke a waa wete a Yeso dɔɔ, a gɔ̃ɔre wuni wu ɛ wu yee ⁴² aruviya wu jaa sooye goro tĩngtĩng, jaa sooye ɓe ing bee saa kop atu ziti, de vɔɔni. Alaɓe Yeso wu dong a dɔ̃rɔng, mɔɔ shɔngzeng yii kĩngte wu ye a yãa we. ⁴³ Hami sooye ɓɔɔ a mɔni ɓe kpaa tɛ̃ɛ wu saa kop atu ziti de sɔɔ kpaa ganteni ɓa a shɔngɓɔɔ bii goro ɓa. ⁴⁴ A ɛni Yeso kaa tũmpu a lii wu yãa farabi, ɓani jang ɓaseni ɓa wu kpaa ɓe sing tɛ̃ɛmi shii ke. ⁴⁵ Yeso shãngnii “Ɓi we ling weya?" Alaɓe yii walikãng yii paa yãa ye, Bituru shãngni, "Yubɔrɔ, mɔɔ shɔngzengyi walikãng yii kĩngte mɔ yii de dɔ̃ɔle mɔni." ⁴⁶ Yeso sɔɔ shãngni, “Shɔngɓɔɔ ling ye nungoko, aruviya N ze ye kaaka ke ye ang bii” ⁴⁷ Alaɓe sooye ɓemi ze ye ing kpaa vɔ̃seni yuu ɓa, a wete a wu ting ni bii maani ririk. A mɔɔ watĩng walikãng a sɔɔ shãng viɓe shĩng ke lii wu ɓe ɓɔɔ kaɓe ɓani jang ɓaseni ɓa kpaa ganteni. ⁴⁸ Amɔni Yeso gãale wu ni “Jaa sooye, mɔ shĩngni gn ganteni mɔ ye. Wata ɓatata.” ⁴⁹ Alaɓe dong shãng yãa ɓe, shɔngɓɔɔ ɛ a yubɔrɔ mɔng gɔ̃ɔreni ɓemi yee a shãngni “Mɔ jaa sooye vɔɔ ye. Mɔ na yɔɔre shɔng manteni vimi tɔ ɓa.” ⁵⁰ Alaɓe Yeso tãa viɓemi ye, a gãale Jayirusi ni, "Mɔ na zaa vɔɔ ɓa; azɔng ta, ing gante kɔtɔ” ⁵¹ Alaɓe ɛ yee ɓi ye, de daa shɔngɓɔɔ ɓa goro wu ɓooni wuni ɓa, na ɓa Bituru ɓɔɔ Yɔhana ɓɔɔ Yakubu, ɓɔɔ jaa ɓi yeɓi ni yĩngɓi ko shee ɓa. ⁵² Hami shɔng walikãng yii a viki yato ɓɔɔ kaani yãa vɔɔ aru wuni, a sɔɔ shãng ni, "Nɔ na kaa tɔ ɓa; de vɔɔ ɓa roo nurong” ⁵³ Yii gaa wu baaseni, aruɓe yii ze ye ni jaa sooye ɓi vɔɔ ye. ⁵⁴ A too wu a naa a ɓaa yãa, a shãng, ni, “Jaa, yupataǃ" ⁵⁵ Wu surubi sɔɔ zuse a sɔɔ yupa ɓani jang ɓaseni ɓa. A gãale yini yii aa wu viɓɔɔ ta wu shaayi. ⁵⁶ Shɔngɓe yii ye wu bii zaayi ke, sɔɔ gãale ni yii na gãale shɔngɓɔɔ viɓe watĩng ɓa.