¹ A tũmpu ɓe Yeso sɔ̃ɔre shãngni yãa ye walikãng alaɓe shɔngzengyi yii wee shoo a wu bii, a ɓoo Kafanahu. ² Hami yuranko ɓɔɔ wu jaadɔɔ shoni ani ɓe kase wu, ɓe wu sii vɔɔ sɔɔ kpaa vɔɔni ye maani, ³ Alaɓe yuranko ɓemi tãa ruu Yeso ye, ang shongshe wu shɔngɓɔrɔ shɔng Yahudayi, a gãale wu ni wu e gante wu jaa shoni. ⁴ Alaɓe yii ɛ Yeso bii ye, ying yɛ̃ɛ wu ni yato goro, ni, "Shɔng mi waa ye mɔ pele wu vĩmi, ⁵ Aruviya kase wo shɔng kooyi kɔtɔ, wu ko sɔɔ maare wo mɔng gɔ̃ɔreni." ⁶ Yeso sɔɔ dooseni yini a waayi, alaɓe de waa ɓa fefe ni yee ɓini ɓa ɓe, yuranko ɓemi shong wu shɔɔyi yii gãale wuni "Daayere, mɔ na yɔɔre yuu ɓa, aruviya ing de waa ɓa mɔ eng yee ɓa. ⁷ Arugoko ing bibi ing de tɔ ɓa ni ing tise nung ye ing ɛ mɔ bii ɓa, shãng yãa ta kɔ̃vɛ̃ ing jaa shoni ing gante kɔtɔ. ⁸ Aruviya ing jɔ shɔngɓe wu kaaka naa ani, ni sɔɔjayi ang dɔɔ. N gãale shɔngɓɔɔ ni 'Waa ta' sɔɔ waayi, N na sɔɔ gãale shɔngbɔɔ ye tok, 'Ɛta', sɔɔ ɛke, N sɔɔ gãale N jaa shoni, “Pele vĩmi ta” sɔɔ pele ke. ⁹ Alabe Yeso tāa vĩmi ye ɓe, bii zaa wu aru wuni, aɓe raa nung ye a mɔɔ ɓe ying dũng wu a shãngni, "N gãale nɔ, kɔ a vusu Israila N de kpaa zɔng shɔng shĩngni gn ɓemi ɓa.” ¹⁰ Alaɓe shɔngɓe shɔng shoyi ɓemi yii sɔɔ yee ye, yii waa kpaa wu jaa shoni ɓemi gante ye. ¹¹ Ɓani jang ɓaseni, Yeso waa tipi ɓe shɔng ɓaani Neni, wu jaadɔɔyi ɓɔɔ mɔɔ vɛɛni yii waa ni wuni. ¹² Alaɓe kpaa ye maani wu ɓoo tipi ɓi, zepĩn, shɔng veeye ɓɔɔ sii vɔɔ ye ɓe shɔng too wu ɓe, wu ko yĩngɓi jaa goro (wu sii ɓi soo vɔɔ), mɔɔ kpãa ɓe tipi ɓi yii sii ni wu ni a mɔni. ¹³ Alaɓe Daayere ze wu ye, a tãa wu nugn kɔngni a gãale wuni “Mɔ na kaa ɓa” ¹⁴ Sɔɔ waa ke a lii lakɔngsi ɓe shɔng too wu bii ani ɓe, shɔngɓe yii sii too wu vɔɔ mi yii shii kirikirik. A shãngni, "Jekasa, N gãale mɔ, yupata” ¹⁵ Shɔngɓe sii vɔɔye mi yupa a gaa shãngni yãa, Yeso sɔɔ aa wu yĩngɓi. ¹⁶ Alaɓi vɔɔ zaani jãayi kaaka a bii walikãng, yii sɔɔ watĩng ni dɔɔni Laa, a shãngni, “Shɔngzeni boro ɓɔɔ yupa ye a wo titi” Laa sɔɔ ze wu shɔngzengyi ye." ¹⁷ Polo ruu ɓemi aru Yeso raa mɔng walikãng a Yahuda ɓɔɔ shɔngɓeyi tipi maani ni yini ɓe. ¹⁸ Yɔhana wu jaadɔɔyi yii gāale wu aru viɓe kn ting walikãng. Alaɓi Yɔhana ɓaa wu jaadɔɔyi ziti yãa, ¹⁹ a shong yii a Daayere bii ni yii yɛ̃ɛ wu ni, “mɔ ko shɔngɓe mɔng emi ya, kɔ wo shĩng nung ta a shɔng ɓɔɔ tok?” ²⁰ Alaɓe yii ɛ ye maani a Yeso bii, shɔngɓiyi yii yɛ̃ɛ wu ni, “Yɔhana shɔng Batizima shong wo ni, 'Mɔ ko shɔngɓe ing ɛ mi ya, kɔ wo shĩng nung ta a shɔng ɓɔɔ tok?” ²¹ Alawa gante shɔng vɛ̃ɛni a yii vɔɔ totok ɓɔɔ kpãareni ɓɔɔ tɔti a yuu vĩnivĩvĩ rãmangyi, sɔɔ aa shɔng nung gbãatiyi vɛ̃ɛni zeni. ²² Yeso sɔɔ kose yii a shãng ni, "Alaɓe nɔ na sɔɔye ɓe, nɔ gãale Yɔhana viɓe nɔ ze ke a sɔɔ tãa ɓe. Shɔng nung gbãatiyi yii de ze mɔng ni, shɔng dɔɔ ɓa yii de kn ni, shɔng vibiyi yii kpaa sɔɔkeni ye, shɔng shoo ɓa yii kpaa tãa mɔng ye; shɔngɓe yii sii vɔɔye shɔng yuse yii paa ye ni surubi ni, shɔng sɔɔ gãale shɔng rangyi polo ruu tɔ̃ɔving ye. ²³ Shɔngɓe na de yaa ani zɔng ɓa ang bii ɓa aru N vi peleni kpaa zuuku ye. ²⁴ A tũmpu ɓe Yɔhana wu jaa shoniyi yii sɔɔye, Yeso gaa shãngsheni mɔɔ ɓe yini wuni aru Yɔhana, Nɔ waa vusu jĩngti nɔ ze viya? gbãa ɓe zãsi zite ɓemi ya? ²⁵ Nɔ waa gaa nɔ ze viya? Shɔngɓe ɓoose farabi mɛrɛrɛ mi ya? Milepĩn, shɔngɓe yii ɓoose farabi kpɛ̃rɛ̃rɛ̃ a sɔɔ wɔ̃ng a vusu tãani tɔ̃ɔving yii a kpanti yee. ²⁶ Nɔ waa gaa a ze viya? Shɔngzeni ya? Ananko, N gãale nɔ ye, shɔngɓe jãa shɔngzeni. ²⁷ Bemi ɓi shɔngɓe shɔng binke aru wuni ɓe, 'Milepĩn, N shong jaa shoni a nɔ tĩng, ɓe daa gonte nɔ dɔ̃rɔng a nɔ ting ɓe.' ²⁸ N shãngshe nɔ, a shɔngɓe sooye yii ye ɓe shɔngɓɔɔ ɓa goro ɓe jãa Yɔhana ɓa. Ni ɓemi walikãng shɔngɓe wu ko tɔkɔlɔng a roonikpanti ɓee Laa jãa wu kɔtɔ ni bongni. ²⁹ (Alaɓe shɔngzengyi walikãng yii tãa ruumiye ɓe, ɓaseni shɔng tɛni saka vi vitipiyi, yii shãng ni Laa wu ko shɔng yato ɓolongɓo, aruviya yii pele batizima ni Batizima ɓee Yɔhana. ³⁰ Vi leseni ɓi wu ko shɔng Farisayi nii shɔng zeni rudaniyi yii ɓɛ̃ɛ Laa vi shãngni aru yii yuu, aruviya Yɔhana de pele yii baptizima ɓa.) ³¹ Hami, N daa, tise shɔngɓemiyi ni shɔng lakoo ɓe weya? Yii ana viya? ³² Yii ana wejaa ɓe ying pele shɔwa a nungmɔɔ, ɓe yii wɔ̃ng a sɔɔ ɓaa we yãa a shãng ni, 'Wo jɛ̃ɛre nɔ raaka, nɔ de sɔɔ yãa sang ɓa. Wo sɔɔ tãng soo ɓee vɔɔ, nɔ de sɔɔ kaa yãa vɔɔ ɓa'. ³³ Aruviya Yɔhana shɔng batizima ɛ ke de shaa bubula ɓa kɔ wu ɓoo mɛɛ rɛni la ɓa, 'Nɔ sɔɔ tɔɔni wu vĩnivĩvĩ a bii.' ³⁴ Jaa Shɔngzeng ɛ ke a shaa vishang a sɔɔ ɓoo Mɛɛ, nɔ sɔɔ tɔɔ ni, 'Milepĩn, Wu ɓi shɔng vishaani vɛ̃ɛni ɓɔɔ shɔng vi ɓooni vɛ̃ɛni, wu ɓi wesang shɔng teni saka vi tipi ɓɔɔ shɔng ruvĩniyiǃ ³⁵ Vizeni wu ko kpɛ̃ɛni shɔng ze a wu jaayi walikãng. ³⁶ Hami goro a titi shɔng Farisayi ɓaa Yeso yãa vishang shaani ni wuni. A tũmpu ɓe Yeso ɓoo shɔng Farisa ɓi yee ye, a wɔ̃ng a yuu ladong wu shaa vishang. ³⁷ Zepĩn, sooye ɓɔɔ ani a ɓundang ɓi wu ɓi shɔng ruvĩni. Alaɓe tãaye ni Yeso wɔ̃ng a ladong a shɔng Farisa yee, sɔɔ ɛse gugu ɓee nung sũnunu. ³⁸ Alaɓe shii ye a wu kagn maani ni wu kaa dɔɔ, de kaa yãa vɔɔni, a gaa yuureni wu dɔɔ ni wu mɛnung, a sɔɔ alɛ ni wu sisi yuu a sɔɔ dɔlɛ wu dɔɔ ni yãa a tɛ̃rɛ wu nung ɓee sũnunu a dɔɔ. ³⁹ Alaɓe shɔng Farisa ɓe ɓaa Yeso yãa a wu yee ze viɓemi ye, a lere a wu sĩngsĩng, a shãngni “Na shɔng ɓemi ɓi shɔngzeni na ze ye kɔ ɓi zɔng sooye ɓe we ing lii wu mi weya, ni wu ɓi shɔng ruvĩni." ⁴⁰ Yeso kase wu a shãngshe wu ni, "Siman, N ruu ɓɔɔ ani ɓeng kase N gãale mɔ.” A shãngni "Shãng ta, Shɔng manteni vi". ⁴¹ Yeso sɔɔ shãngni “Shɔng kɔseni saka ɓɔɔ ani wu shɔng kɔpɔ yii ziti. Shɔngɓɔɔ ing dũng wu dinari la maani, ɓɔɔ tɔti la ziti atu kop. ⁴² Alaɓe yii de zenung wu shoreni ɓa, a yaase yii saka ɓi walikãng. Na ananko, ɓi we a yii titi ing kase wu vɛ̃ɛni weya” ⁴³ Siman kose wu a shãngni, "Ang zeni ɓi shɔngɓe shɔng yaase wu vɛɛni ɓe." Yeso shãngshe wu ni, "Mɔ shãng ye ɓatata." ⁴⁴ Yeso raa nung a sooye ɓi bii a gãale Siman ni, "Mɔ ze sooye ɓemi ye ya. N ɓoo mɔ yee. Mɔ de ang mɛɛ ɓa N sɔkeng dɔɔ ɓa, sooye ɓemi yureng dɔɔ ni wu mɛnung, a sɔ̃ɔreng dɔɔ ni wu sisi yuu, ⁴⁵ Mɔ de dɔleng dɔɔ ɓa ni yãa ɓa, viɓe yii laɓe N ɛ ɓe de yang dɔleni dɔɔ ɓa ni yãa ɓa. ⁴⁶ Mɔ de tɛ̃reng nung ɓa a yuu ɓa, sooye ɓemi tɛ̃reng nung a dɔɔ ni nung sũnunu. ⁴⁷ Arugoko N shãngshe mɔ ni, wu ruvĩ̃ni, ɓe sii vɛ̃ɛni ɓe, shɔng yaase wu ye-aruviya wu kaseni ɓe tase mi shang kɔtɔ. Shɔngɓe shɔng yaase wu pota, wu kaseni pota. ⁴⁸ A sɔɔ gãale sooye ɓi ni “Shɔng yaase mɔ ruvĩniyi ye” ⁴⁹ Shɔngɓe yii wɔ̃ngre a yãa we yii gaa shãngkeni a yii nung, “Ɓemi ɓi we ing tɔɔni yaase shɔng ruvĩni ye weya?" ⁵⁰ Yeso sɔɔ gãale sooye ɓi ni “Mɔ shĩngni gn kpengse mɔ ye. Waata ɓatata”