¹ Hami watĩng a Diki wɔ̃keni ɓe Yeso de daseni a kati kulu zee, wu jaadɔɔyi yii sũng yuu nɛɛreng zee, a kpãa a naa a sɔɔ shaa ke. ² Shɔng Farisayi ɓɔɔ yii shãngni, "Aru vi nɔng pele viɓe rudani zãre a Diki wɔ̃keni viya? ³ A yii kaseni, Yeso shãngni, "Nɔ de ɓale viɓe Dawuda pele ke alaɓe wɔ̃ko sing shaa wu, ni shɔngɓe yii sii ni wuni ɓa ya? ⁴ Waa a ɓoo jaaka Laa, a too bubula ɓe amɔni a shaa pota, a sɔɔ aa shɔngɓe yini wuni pota ni yii shaa jɔ. Aɓe rudani yaa firisiyi ko bĩni ni yii shaa ke." ⁵ A sɔɔ gãale yii ni, "Jaa Shɔngzeng wu ko Daayere ɓee Diki wɔ̃keni " ⁶ Vimi watĩng a Diki Wɔ̃keni ɓɔɔ alaɓe waa ɓoo jaaka Laa a mante shɔng vi amɔni, shɔngɓɔɔ amɔni ɓe wu nashang ɓoo kɔtɔ. ⁷ Shɔng labiniyi ɓɔɔ shɔng Farisayi yii tɛ̃ɛre wu nung a bii yii ze ke kɔ daa gante shɔng kɔtɔ a Diki Wɔ̃keni, aruɓe yii daa kpaa dɔ̃rɔng lanseni wuni ɓe. ⁸ Aɓe ze viɓe ying lere ye a sɔɔ gãale shɔngɓe naa ɓoo mi ni, "Yupa ta mɔ shii a titi shɔng ɓemiyi walikãng" Shɔngɓi sɔɔ yupa a shii amɔni. ⁹ Yeso gãaleyi ni, "N yɛ̃ɛ nɔ ruu pĩn, ɓi rudani wo pele vi tɔ̃ɔving ɓɔɔ vi nanka a Diki Wɔ̃keni ya, shɔng kpengse surubi ya kɔ shɔng lese?" ¹⁰ A sɔɔ raa nung a mile yii walikang a shãngshe shɔngveeye ɓini, "Yɔɔre mɔ naa ta ni tĩng" Sɔɔ pele ananko, wu naa sɔɔke. ¹¹ Vi leseni wu ko yii yini nanka leseni yato, a sɔɔ shãngshe we viɓe yii daa pele Yeso ɓe. ¹² Vimi watĩng a diki wayi aɓe vɔ̃ng yuu kɔpɔ aru gɔ̃ɔreni Laa. A watĩng ni gɔ̃ɔreni Laa ni a zii ɓini. ¹³ Alaɓe gandi rɔɔye ɓe, sɔɔ ɓaa wu jaadɔɔyi yãa a wu ɓi, a sɔɔ rɔɔ kop atu ziti, ɓe ɓaa yii ni jaa rɔɔkeniyi ¹⁴ Jaa rɔɔkeni ɓiyi rĩng yii ko Siman (ɓe ɓaa wu ni Bituru) ɓɔɔ zũngɓi Andarawusi, Yakubu, Yɔhana, Filibu, Batalamawusi, ¹⁵ Matiyu, Toma, Yakubu Alifayu jaa, Saminu ɓe shɔng ɓaa wu ni Zaloti, ¹⁶ Yahuza Yakubu jaa, ɓɔɔ Yahuza Iskariyoti, ɓe wɔ̃ng shɔng seeni dɔɔ. ¹⁷ Amɔni Yeso lɔɔ a yuu kɔpɔ ɓi ni yini, a sɔɔ shii a teli ni mɔɔ vɛ̃ɛni ɓɔɔ wu jaadɔɔyi ɓɔɔ shɔngɓe yii a Yahuda ɓɔɔ Urushelima ɓɔɔ shɔng wɔ̃ngni yãamɛ ɓee Taya ɓɔɔ Sidon. ¹⁸ Yii eke yii tãa wu yii sɔɔ ɓe ganteni aru yii vɔɔ bii totok. Shɔngɓe yii kpãare ni vĩnivĩvĩ sũru yii kpaa gante ni. ¹⁹ Shɔngɓe yii a mɔɔ walikãng yii bee yii lii wu ni naa aruviya kaaka ganteni ke kɔtɔ a wu bii, a sɔɔ gante yii walikãng. ²⁰ Sɔɔ mile wu jaadɔɔyi a shãngni, "Zuuku ɓi nɔ ɓee ko, shɔngɓe nɔ shɔng rang, aruviya ɓi nɔ ɓe ko roonikpanti Laa." ²¹ Zuuku ɓi nɔ ɓee, shɔngɓe nɔng tãa wɔ̃ko hami, aruviya shɔng daa shaare nɔ kɔtɔ." Zuuku ɓi nɔ ɓee ko shɔngɓe nɔng kaa yãvɔɔ hami, aruviya nɔng laare kɔtɔ. ²² Zuuku ɓi nɔ ɓee alaɓe shɔng na sɛ̃ɛng nɔ ye, yii na kese nɔ ye ni gaa yii sɔɔ dãa nɔ ye yii sɔɔ bẽe nɔ rĩng ye ana vĩnivĩvĩ, aru Jaa Shɔngzeng. ²³ Nɔ pele puru yato a diki wa nɔ jengre aru tãani puru yato, aruviya nɔng kpaa vi dɔɔ yɔɔni vɛ̃ɛni a koolapa, aru yii yebɔngyi yii pele shɔngzeniyi jɔ ananko. ²⁴ Vi leseni wu ko nɔ ɓi vi nugn kɔngni nɔ shɔng viyee yii, aruviya nɔ te nɔ vi sĩngsĩng maani ye. ²⁵ nɔ ɓi vi nugn kɔngni shɔngɓe nɔ puuye hami, nɔng tãa wɔ̃ko kɔtɔ la wodot. Nɔ ɓi vi nugn kɔngni shɔngɓe nɔng laare hami, nɔng tãa yato viki nɔ sɔɔ kaa yãavɔɔ tɔti la wodot" ²⁶ "Nɔ ɓi vi nugn kɔngni laɓe shɔng naa shang yãa ye a nɔ yuu tɔ̃ɔving, aruviya ananko yebɔngɓiyi yii pele ni shɔngzeni yãa jĩngni yii." ²⁷ N gãale nɔ shɔngɓe nɔng we shoo mi, nɔ kase nɔ shɔngpong nɔ sɔɔ pele shɔngɓe yii bɛ̃ɛ nɔ tɔ̃ɔving." ²⁸ Nɔ shĩngshe shɔngɓe yii lese nɔ pãnti, nɔ sɔɔ gɔ̃ɔre Laa aru shɔngɓe ying kpãare nɔ ɓe. ²⁹ Shɔngɓe na nung mɔ ye a kalong goro mɔ riise wu kaa ɓɔɔ. Shɔngɓe na te mɔ farabi ye mɔ na zãare wu mɔ vi bii kukeni ɓa. ³⁰ Shɔngɓe na gɔ̃ɔre mɔ ye mɔ aa wu. Shɔngɓɔɔ na te mɔ vi ye mɔ na yɛ̃ɛ wu ɓa wu sɔɔre mɔ ɓa. ³¹ Viɓe nɔ kase shɔng wu pele nɔ, nɔ pele shɔng jɔ wu ko. ³² Nɔ na kase shɔngɓe kase nɔ ɓe ko shee, nɔ vi dɔɔ yɔɔni kini viya? Ko shɔng ruvĩniyi yii kase shɔngɓe yii kaseyi ɓe. ³³ Nɔ na pele tɔ̃ɔving ni shɔngɓe pele nɔ tɔɔving ko shee, nɔ vi dɔɔ yɔɔni kini viya? Ko shɔng ruvĩniyi yii pele jɔ ananko. ³⁴ Nɔ na kɔ̃se shɔngɓe nɔ tegn yii daa sɔɔre nɔ ko shee, nɔ vi dɔɔ yɔɔni kini viya, kɔ shɔng ruvĩniyi yii kɔ̃se we a yii nung shɔng ruvĩniyi, wu sɔɔ te jɔ ananko. ³⁵ Vizeni wu ko nɔ kase nɔ shɔngpong nɔ sɔɔ pele yii tɔ̃ɔving. Nɔ kɔ̃se shɔng nɔ na tegn ɓa shɔng wu sɔɔre nɔ ɓa, nɔ vi dɔɔ yɔɔni ing sɔng shang vɛ̃ɛni, nɔng sɔɔ wɔ̃ng Laa jaayi, aruviya wu bibi wu ɓi shɔng tɔ̃ɔving a shɔngɓe yii tase dɔɔreni ɓa ɓɔɔ shɔng vĩnivĩvĩ yii. ³⁶ Nɔ tãa shɔng nugn kɔngni, anaɓe nɔ Daa jɔ shɔng nugn kɔngni ko. ³⁷ Nɔ na ɓoore shɔng yoori ɓa, aruɓe shɔng daa sɔɔ ɓoore nɔ yoori ɓa. Nɔ na lese shɔng ɓa, aruɓe shɔng daa sɔɔ lese nɔ jɔ ɓa ɓe. Nɔ yaase shɔng ruvĩni, aruɓe shɔng daa sɔɔ yaase nɔ ruvĩni jɔ ɓe. ³⁸ Nɔ aa shɔng vi, aru ɓe shɔng daa sɔɔ aa nɔ jɔ ɓe. A pii ɓooli, shɔng dongse kɔtɔ, shɔng yiire, gãasi ing wɔɔse a tipi, wu sɔɔ tɛ̃ɛre nɔ a sɔ̃ɔlɛ. Pii ɓe nɔ maa vini shɔng sɔɔ maase nɔ jɔ ni wu ko" ³⁹ A sɔɔ shãngshe yii yãagani ɓɔɔ, "Shɔng nung gbãati yii daa yise we la kɔtɔ ya? Na pele ye, yii zĩngzĩni ying shoo a too, ɓa ananko ɓa ya? ⁴⁰ Jaadɔɔ daa jãa wu shɔng manteni ɓa, shɔngɓe na tee manteni ye vɛ̃ɛni daa wɔ̃ng ana wu shɔng manteni. ⁴¹ Aruvi mɔng mile pere la a zũngwa nung, mɔ de sɔɔ ze gbiti la ɓe a mɔ nung ɓa viya? ⁴² Aruvi mɔ daa gãale zũngwa ni, "Maazung, shii ta N zɔ̃se mɔ pere la a nung; mɔ de sɔɔ yɔɔre yuu ɓa ni gbiti la ɓe a mɔ nung ɓa viya? No shɔng lakeni shɔngǃ Zɔ̃ gbiti la ɓe a mɔ nung ta shɔɔni, alaɓi ko mɔ daa ze gbang mɔ sɔɔ zɔ̃se zũngwa pere la ɓe a wu nung ɓe. ⁴³ Aruviya la tɔ̃ɔving ɓɔɔ ɓa ɓe daa rɛɛ jaa nanka, jɔ ananko la nanka ɓɔɔ ɓa ɓe daa sɔɔ rɛɛ jaa tɔ̃ɔving ɓa. ⁴⁴ Aruviya shɔng ze ko zɔ̃ng la ɓe weya zɔng a wu jaa rɛni. Aruviya shɔngzengyi yii rɔɔke rɛni sĩngri ɓa a la kɔkɔ ɓa, ko shɔng daa muse vi rɛni kɔtɔ a la kɔkɔ ɓa. ⁴⁵ Shɔngzeng tɔ̃ɔving a wu tɔ̃ɔving vi vɔ̃seni ɓee wu sĩngsĩng kese viɓe tɔ̃ɔving, shɔng vũni a wu vɔ̃seni vĩni ɓee wu sĩngsĩng kese viɓe vĩnĩvĩvĩ. Aruviya viɓe a vusu sĩngsĩng ko wu yãa shãng ke. ⁴⁶ Aruvi nɔ ɓang ni, "Daayere, Daayere" nɔ sɔɔ pele viɓe N gãale nɔ ɓa viya? ⁴⁷ Shɔngɓe na eng bii ye sɔɔ tãng yãa shãngni ye, sɔɔ dũng ye, N gãale nɔ dɔɔɓe wɔ̃ng ɓe ⁴⁸ Wu ana shɔngɓe maa yee, a gbãa too gurungu, a loo wu tung jaaka a yupa. Alaɓe mɛɛ tuvĩng na luu ye, zãsi mɛɛ na e ye a yuu yee ɓi ing zite ɓa, aruviya shɔng maa wu kɔtɔ dang. ⁴⁹ Vi leseni wu ko shɔngɓe na tãng ruu ye, de sɔɔ pele ɓa, wu ana shɔngɓe maa yee a yuu sɛ̃ɛli, de shĩng dĩngli ɓa, alaɓe zãsi mɛɛ zee ye a yuu yee ɓi, ɓani jang ɓaseni ɓa a zile ke, yee ɓi lese ni bĩni."