¹ Hami viɓi wating alaɓe shɔng muse a Yeso bii ying tãa ruu Laa alaɓe shii a yãa wapo Janisarata. ² A too nung a ze tuusi ziti ɓe shɔng shiire a yãa wapo. Shɔng jezũng yii ke ye a vusu yii de sɔɔke yii jang ni. ³ Yeso ɓoo goro tuusi ɓɔɔ, ɓi Siman ɓee, a gãale wu ni wu tɛ̃ɛ ta a mɔngɓe shoo kɔtɔ wodot. A sɔɔ wɔ̃ng vusu tuusi a mante shɔngɓe yii a yãa gaa vii. ⁴ Alaɓe sɔ̃ɔre shãani yãa ye, a gãale Siman ni, "Wu sɔɔre tuusi ɓi ta a titi mɛɛ , wu looke wu jang wu rãa mɛɛ" ⁵ Siman kose wu a tɔɔni, "Shɔngbɔrɔ, wo pele viye ni zii walikãng wo de kpaa viɓɔɔ ɓa, anaɓe mɔ shãngɓe, N looke jang kɔtɔ a mɛɛ" ⁶ Alaɓe yii pele ye, yii kpaa jezũng vɛ̃ɛni yii jang de kpaa mɔng rɔkeni. ⁷ Yii ɓaa yãa a shɔng jezũng yini ɓɔɔ yii, aruɓe yii daa yise yii naa ani. Yii e a yise yii tuusii zĩngzĩni, aru de kpaa lung dii ni. ⁸ Siman Bituru, alaɓe ze vĩng ye ɓe, a kute a Yeso dɔɔ, a shãngni, "Yang ta a bĩni, aruviya N shɔng ruvĩni, Daayere." ⁹ Aruviya wu bibi ni shɔngɓe yini wuni walikang, bii zaa yii aru jezũng ɓe yii yii ɓe. ¹⁰ Jɔ ananko Yakubu ɓɔɔ Yɔhana, ɓe yii sii ɓi shɔng vipeleni ni Zabadi jaa yee yii. Yeso gãale Siman ni, "Mɔ na zaa ɓa, aruviya hami a waa tĩng mɔng yii shɔngzengyi. ¹¹ Alaɓe yii kese tuusi ye a gaa, yii yaa vi walikãng, a dũng wu. ¹² Vimi watĩng alaɓe wu a ɓundangyi ɓɔɔ, shɔng vi bii ɓɔɔ a mɔni. Alaɓe ze Yeso ye ɓe, a wete a wu tĩng a gɔ̃ɔre wu a shãngni, "Daayere, mɔ na kase ye, mɔ sɔkeng ta wɛ̃tɛngwɛ̃" ¹³ Yeso sɔɔ waare naa a lii wu, a shãngni "N kaseye. Wɔ̃ng ta wɛ̃tɛngwɛ̃." Ɓani jang ɓaseni ɓa vi bii ɓi yaa wu". ¹⁴ A kɔse wu yãa ni wu na shãngshe shɔngɓɔɔ ɓa a sɔɔ gãale wu ni, "Yii mɔ dɔ̃rɔng ta, mɔ tase yuu a firisiyi bii mɔ sɔɔ aa vi ani aru mɔ sɔkeni, anaɓe Musa shãngɓe, aru wu wɔ̃ng vitaseni a yii bii." ¹⁵ Wu ruu bii sɔɔ tangte fefe, bɔrɔ mɔɔ yii de muse ni a yãawe aru yii tãa wu manteni aruɓe daa sɔɔ gante yii vɔɔ bii. ¹⁶ A sɔɔ kese bii ni gaa a wɔ̃ng a mɔngɓe shɔng ɓa ani ɓa a gɔ̃ɔre Laa. ¹⁷ Watĩng ke a diki ɓɔɔ ɓe de mante vi ni ɓe, a mɔngɓi shɔng Farisayi ɓɔɔ shɔng manteni rudani ɓe yii e a jekoo ɓee a Galili ɓɔɔ Yahuda ɓɔɔ tɔti Urushelima. Kaaka Daayere ni wuni aru wu gante yii. ¹⁸ Hami shɔngɓɔɔ yii e yii too shɔngɓɔɔ a yuu sii ɓee wu bii ɓoole kɔtɔ, yii bee dɔ̃rɔng ɓe yii daa ɓoose wu a vusu ɓe aruɓe yii daa yɔɔ wu a Yeso watĩng . ¹⁹ Yii de kpaa dɔ̃rɔng ɓe yii daa ɓoose wu ɓa, aruviya mɔɔ shang vɛ̃ɛni, yii sɔɔ vɔ̃ng sɔ̃ng jaaka a lɔɔre wu ni sɔng, a wu yuu sii rooni, a titi shɔngzengyi, a Yeso watĩng. ²⁰ Aɓe ze yii ani zɔng, Yeso shãngni, "Veeye, shɔng yase mɔ ruvĩni ye." ²¹ Shɔng labiniyi ɓɔɔ shɔng Farisayi yii de gaa yɛ̃ɛni vimi ni, a shãngni, "Ɓemi ɓii we ɓe ing shãng ruu rubɔng mi weya? ɓi we daa yaase shɔng ruvĩni we na ɓa Laa ko shee ɓa weya?" ²² Yeso, alaɓe ze viɓe ying lere ye, a kose yii yãa a gãale yii ni, "Aruvi nɔng yɛ̃ɛle aru vimi a nɔ sĩngsĩng viya? ²³ Ɓivi kpãa shɔng shãng ni, 'Shɔng yaase mɔ ruvĩni ye,' kɔ shɔng shãng ni 'Yupa ta mɔ kn?' ²⁴ Aru nɔ ze ke Jaa Shɔngzeng kaaka ani a koodanga wu yaase shɔng ruvĩni,-"a gãale shɔng vɔɔ ɓemi ni-" N gãale mɔ, yupa ta, mɔ too sii mɔ sɔɔ waa yee." ²⁵ Ɓani jang ɓaseni ɓa yupa a yii tĩng a too sii ɓe si roo ani ɓe. A sɔɔ waa wu yee, de aa Laa bongni ni a bii. ²⁶ Bii zaa yii walikãng yii sɔɔ aa Laa bongni a bii. Yii yii ni vɔɔ zaani, a sɔɔ shãng ni, "Wo ze vi zaani bii ɓɔɔyi lami ye." ²⁷ A tũmpu ɓe viɓemiyi watĩng ye walikang, Yeso ke a yaa mɔngɓi a sɔɔ ze shɔng teni saka vi tipi ɓe shɔng ɓaa wu ni Lawi wɔ̃ng ye a kute teni saka vi tipi. A gãale wu ni, "Dũng ta" ²⁸ Lawi yupa a dũng wu, a yaa vi walikang a tũmpu. ²⁹ Amɔni Lawi waa pele bɔrɔ vi bii tɔ̃ɔreni a wu yee aru Yeso. Shɔng teni saka vi tipi vɛ̃ɛni ɓɔɔ shɔngɓe yii muse a ladong a sɔɔ shaa vishang ni yini. ³⁰ Shɔng Farisayi ɓɔɔ shɔng labiniyi, yii de wɔ̃ɔmɛ wu jaadɔɔyi yãani a yuu a shãngni, "Aruvi mɔng shaa vishang ang sɔng ɓoo ni shɔng teni saka vi tipi ɓɔɔ shɔng ruvĩniyi viya?" ³¹ Yeso kose yii ni, "Shɔngɓe yii vɔɔ ɓa a bii ɓa, yii bee shɔng gãng ɓa; shɔngɓe yii vɔɔ a bii yii ko yii bee. ³² N de e ɓa N baa shɔng yato ɓolongɓoyi ɓa, N e aru shɔng ruvĩniyi yii kɔse yii sĩngsĩng." ³³ Yii gãale wu ni, "Yɔhana jaadɔɔyi yii zii yãa a sɔɔ gɔ̃ɔre Laa, shɔng Farisayi jaadɔɔyi yii pele jɔ ananko. Vi leseni wuko mɔ jadɔɔyi yii shaa vishang a sɔɔ ɓoo mɛɛ." ³⁴ Yeso gãale yii ni, "shɔngɓɔɔ daa zenung shĩng shɔng eni mɔng gbaare kɔtɔ yii zii yãa alaɓe jere gbaare dɔng ni yini ya?" ³⁵ Aruviya diki teni ɓe shɔng daa too jere gbaare a yii bii ni gaa, ying sɔɔ zii yãa a diki waa ko." ³⁶ Yeso sɔɔ shãngshe yii yãagani ni, "Shɔngɓɔ daa tãa je farabi ɓa a bii polo farabi ɓa a sɔɔ too a gonte gɓenti fara ni ɓa. Na pele ye ananko, ing tãase polo farabi kɔtɔ, je farabi ɓee ke a polo farabi ing ɓase ɓa ni gbenti farabi ni ɓa. ³⁷ Shɔngɓɔɔ daa tɛ̃ɛ mɛɛ rɛni la polo ɓa a baka kpaati ɓa. Na pele ye ananko, polo mɛɛ rɛni la ɓemi ing wɔ̃ngke baka ɓi, mɛɛ rɛni la ɓi ing lese. ³⁸ Shɔng tɛ̃ɛ mɛɛ rɛni la polo a vusu baka polo. ³⁹ Shɔngɓɔɔ ɓa goro a tũmpu ɓooni kpaati mɛɛ rɛni la ɓe kase polo, aruviya shãngni,. 'Kpaati ko dang"