¹ Alaɓe Yeso, yii ye ni Suru Tɔ̃ɔving, ke a yoo Urudun ɓe Suru dũ̃ngni wu ni a waare wu jĩngti, ² aɓe wɔ̃ng diki la ziti ɓe vĩnivĩvĩ rãmang maase wu, de shaa viɓɔɔ ɓa a diki waayi, a tũmpu ɓini wɔ̃ko sɔɔ shaa wu. ³ Vĩnivĩvĩ rãmang ɓi gãle wu ni, "Mɔ na Jaa Laa, riise tara ɓemi ta wu wɔ̃ng bubula" ⁴ Yeso kase wu ni, "Anaɓe shɔng binke ɓe, shɔng daa kpeng ɓa ni bubula ko shee ɓa." ⁵ Vĩnivĩvĩ rãmang sɔɔ too Yeso kpat a tase wu roonikpanti ɓee koodanga walikãng a titi la wodot. ⁶ Vĩnivĩvĩ rãmang shãngshe wu ni, "N aa mɔ kaaka naa ɓemi ɓɔɔ yii bongni walikãng, aruviya shɔng ang yii ye, N zenung kɔtɔ N aa shɔngɓe N kase ɓe. ⁷ Arugoko, mɔ na daa tang kɔtɔ mɔ gbãreng, ing wɔ̃ng mɔ ɓee." ⁸ Yeso sɔɔ kase a sɔɔ gãle wu ni, "Shɔng binke ni, "Mɔng gbãre mɔ Daayere Laa, mɔng dũng wuko shee." ⁹ Vĩnivĩvĩ rãmang sɔɔ waare Yeso a tipi Urushalima a shĩng wu a zɔngkɔ jaaka Laa ɓe shɔng maa ɓe, a gãle wu ni "Mɔ na Jaa Laa ɓaa ta ni yuu a tipi. ¹⁰ Anaɓe shɔng binke ni, "Ing aa wu jaa shoniyi dɔ̃rɔng kɔtɔ aru mɔ ni, yii kpee mɔ" ¹¹ ying sɔɔ, 'Too mɔ ni paa a yii naa, aruɓe mɔ daa kɔse dɔɔ ɓa a yuu tara ɓa." ¹² Yesɔ kose wu, a gãle wu ni "Shɔng tɔɔ ni, "Mɔ na maase mɔ Daayere Laa ɓa." ¹³ Alaɓe vĩnivĩvi rãmang sɔ̃ɔre maaseni Yeso ye, a yii dɔ̃rɔng a waa wu waani a yaa wu waa la ɓɔɔ tɔti. ¹⁴ Yeso sɔɔ zuse Galili a vusu kaaka Suru, wu ruu bii leng tipi ɓɔɔ kaa koo ɓiyi walikãng. ¹⁵ A sɔɔ gaa vii manteni a yii jaaka Laa a kpaa dɔɔni a shɔng bii walikang. ¹⁶ A e vusu Nazara, mɔngɓe bɔng ɓe, anaɓe wu langsi wɔ̃ng ɓe, a ɓoo jaaka Laa a diki wɔ̃keni a yuu paa a ɓale la ni kaaka. ¹⁷ Shɔng aa wu labini shɔngzeni Ishaaya. Puu labini ɓi a kpaa mɔngɓe shɔng binke ni, ¹⁸ "Suru Daayere ang yuu aruviya rɔnke N shãngshe shɔng rang yii polo ruu tɔ̃ɔving. A shong ni N kese shɔngɓe shɔng maa yii ɓe N sɔɔ pure shɔng nung gbãatiyi nung, N sɔɔ daa shɔngɓe shɔng kpãareyi naa, ¹⁹ N sɔɔ waa Daayere saa kpaani pãnti." ²⁰ A sɔɔ ling labini ɓi, a sɔre shɔngɓe yii aa wu a sɔɔ wɔ̃ng a tipi. Shɔngɓe yii a Jaaka Laa yii tɛ̃ɛre wu nung a bii walikãng. ²¹ a gaa yii shãngsheni ni, "Lami labini ɓemi ɓoo ye a nɔ shoo." ²² Shɔngɓe yii a mɔ ni walikãng, yii shãng yãa tɔ̃ɔving a wu yuu viɓi sɔɔ aa yii vi bii zaani a ruu bongseni ɓee waani tĩng ɓe ke a wu yãa, yii sɔɔ yɛ̃ɛ wee ni, "Ɓemi ɓa Yusuu jaa ɓa ya?" ²³ A kase yii ni, "Ananko nɔng shãngsheng yãagani mi ang yuu, 'Shɔngãng, gangte mɔ yuu ta. Viɓe wo tãa ni mɔ pele a tipi Kafanahu, pele ta jɔ ananko a mɔ koo yeni." ²⁴ A gãle yii ni, "Nungoko shɔng te shɔng shãngni ruu Laa ɓa a wu koo yeni ɓa. ²⁵ Nungoko N shãngshe nɔ soo vɔɔ yii ani vɛ̃ɛni a tipi Urushalima alaɓe Iliya sii dong ani ɓe, alaɓe mɛɛ lapa bɛ̃ɛ sãni saa tati ɓɔɔ shele mangoro alaɓe wɔ̃ko doo a tipi ɓini walikãng. ²⁶ Shɔng de shong Iliya ɓa a yini kɔ goro ɓa, shɔng shong a Zarifa ɓe a Sido ɓe wu jere vɔɔ ye ɓe. ²⁷ Shɔng vibii yii ani vɛ̃ɛni alaɓe shɔngzeni Elisha sii dong ani ɓe, shɔng de gante shɔngɓɔɔ ɓa goro ɓa na ɓa Na'ama shɔng Siriya ko shee gante ɓa." ²⁸ Shɔngɓe yii a jaaka Laa ɓɔkɔkɔ yii zaa dongoro alaɓe yii tãa vimi ye ɓe. ²⁹ Yii yupa ke, a kese wu ni kaaka a tipi ɓini, a waare wu a dĩngli kɔpɔ ɓe shɔng maa koo ɓi ani ɓe, aruɓe yii daa loke wu a sɔng lapa ɓe. ³⁰ Sɔɔ ɓoo yii titi a waa koo ɓɔɔ tok. ³¹ A lɔɔ dii Kafanahu, ɓundang a vusu Galili, a gaa manteni vi a diki wɔ̃keni. ³² Yii tãa puru yato a wu manteni vi, aruviya shãng yãa ni kaaka naa ni. ³³ Hami jaaka Laa ɓini shɔngɓɔɔ a mɔni ɓe vĩnivĩvĩ rãmang ɓoo wu bii, a sɔɔ kaa yãa vɔɔ ni kaaka ³⁴ "Gbeetǃ wo daa pele nukovi ni mɔni viya, Yeso shɔng Nazara? Mɔ eke mɔ lese wo ke ya? N ze mɔ zɔng ye-Tɔ̃ɔving Goro ɓee Laaǃ" ³⁵ Yeso kɔse vĩnĩvĩvĩ rãmang yãa a shãng ni, "Mɔ na shãng yãa ɓɔɔ tɔ ɓaǃ Ke ta mɔ yaa wu biiǃ" Alaɓe vĩnivĩvĩ rãmang loke shɔngɓi ye a tipi a yii titi, ke a wu bii, a de lese wu ɓa. ³⁶ Bii zaa shɔngzengyi walikãng, yii sɔɔ shãng ke aruni a yii nung. Yii shãngni, "Ɓemi ɓi zɔng yãa shãngni ɓewe ya? A kɔse vĩnivĩvĩ rãmang yãa ni naa ani ɓɔɔ kaaka yii sɔɔ keyi" ³⁷ Wu ruu bii sɔɔ gaa lengni koo ɓe yii a mɔni maani ɓɔkɔkɔ. ³⁸ Alabini Yeso yaa jaaka Laa a sɔɔ ɓoo Siman yee. Hami Siman kpengɓi wu sii vɔɔ, yii gɔ̃ɔre wu aru wuni. ³⁹ Shii a wu yuu a lante vɔɔ ɓeng yɔɔre wu, vɔɔ ɓi yaa wu, ɓani jang ɓaseni ɓa. A yuu paa a gaa wãareni yii vishang. ⁴⁰ Alaɓe la de yeeni ɓe, shɔng ese Yeso shɔng vɔɔyi totok. A shĩngshe yii naa a bii a gante yii ⁴¹ Vĩnivĩvĩ rãmang yaa yii bii, a kaake yãa vɔɔ ni, "Mɔ ko Jaa Laa" Yeso kɔse vĩnivĩvĩ rãamangyi yãa a zãare yii yãa shãngni, aruviya yii ze ye wu ko Kirisi. ⁴² Alaɓe gandi rɔɔye ɓe, ke a waa mɔngɓe shɔng ɓa ani ɓa. Mɔɔ vɛ̃ɛni yii bee wu a e mɔngɓe wu sii ani ɓe. Yii kase yii zãare wu waani mɔngɓɔɔ. ⁴³ A gãle yii ni, "Wɔ̃ng ye ananko N waa polo ruu Laa roonikpanti a ɓundang bɔɔyi totok, aruviya ɓemi ɓi viɓe shĩngke shɔng shong ɓe ko." ⁴⁴ A sɔɔ watĩng ni waani ruu Laa a vusu jaaka Laa a tipi Yahuda walikãng.