¹ A saa kop atu maani ɓee roonikpanti ɓee Tibarusi Kaisa-alaɓi ɓi Bilatu Ponti wu sii gomna ɓee Yahuda, Hiridu ko yubɔrɔ a Galili, zũngbi Filibu kɔ yubɔrɔ ɓe kaa Itura ɓɔɔ Tarakonitisi, ɓɔɔ tɔti Lisaniyi sii yubɔrɔ ɓee Abilana, ² alaɓe Annasi ɓɔɔ Kaifa yii ko yubɔrɔ yee firisi-Laa ruu Laa e Yɔhana Zakariya jaa bii a jĩngti. ³ A waa koo ɓe yii walikãng a kaa Urudu, a waayãa Baptizima ɓee kɔseni sĩngsĩng aru yaase ni ruvĩni. ⁴ Anaɓe shɔng binke a labini ɓee shɔng zeni Ishaaya, "Shɔngɓɔɔ ing kaa yãa a jĩngti, 'Nɔ gongte Daayere dɔ̃rɔng ta, nɔ gongte wu dɔ̃rɔng ta gbololo. ⁵ Shɔng buu gungungyi walikãng, shɔng sɔɔ ziile kɔpɔ ɓɔɔ jebu a tipi, dɔ̃rɔng ɓe yii sii gɓeng kɔtɔ shɔng sɔɔ gonte gbololo, shɔng sɔɔ gongte dɔ̃rɔng a mɔng ɓe sii de liɓa, ⁶ shɔngzengyi walikãng yii ze kpengseni ɓee Laa." ⁷ Arugoko Yɔhana gãle mɔɔ ɓe ying e ni wu bii aru wu pele yii Baptizima, "Nɔ ɓe shãari badiyiǃ Ɓiwe gɔ̃ɔ nɔ shoo ni nɔ yuu ta aru diki leseni yato ɓe teni mi weya? ⁸ Na ananko, nɔ kese rɛɛni ɓe waa nɔ pele ni ruvĩni ta, nɔ na gaa shãngni ɓa anɔ titi ni, 'Ibirayi ɓi wo daa ɓa.' aruviya N gãle nɔ Laa daa zenung kɔtɔ wu yuse Ibirayi jaayi a yuu tara ɓemiyi. ⁹ Kɔ hami shɔng ɓaa kpali ye a dĩngli layi. Aruɓe la ɓe de rɛɛnung tɔ̃ɔving ɓa shɔng kooleyi a tipi shɔng sɔɔ tɛ̃ɛ yii a vusu yaa." ¹⁰ Alaɓi mɔɔ yii watĩng ni wu yɛ̃ɛni, ni, "Wɔ sɔɔ pele viya?" ¹¹ A kase yii a shãngshe yii ni, "Shɔngɓe wu fara ɓooseni ziti, wu aa shɔngɓe wu ɓee ɓa ani ɓa, shɔngɓe wu vishaani ani wu pele jɔ ananko." ¹² Shɔng teni saka vi tipi yii e jɔ ni wu pele yii baptizima, yii sɔɔ gãle wu ni, "Shɔng manteni vi, ɓivi lii wo pele viya?" ¹³ A gãle yii ni, "Nɔ na tee saka ɓa wu jãa viɓe shɔng gãle nɔ nɔ tee ɓa." ¹⁴ Sɔja ɓɔɔ yii sɔɔ yɛ̃ɛ wu jɔ, ni, "Wo bibi nukoviya?" A gãle yii ni, "Nɔ na raa saka ɓa a shɔngɓɔɔ naa ni kaaka ɓa, nɔ na sɔɔ lake shɔngɓɔɔ yãa ɓa a yuu. Nɔ vi dɔɔ yɔɔni tise nɔ ye." ¹⁵ Hami alaɓe shɔngzengyi ying gaa Kirisi wu eni, yii walikãng yii de lereni a yii sĩngsĩng aru Yɔhana, kɔ ɓi wuko Kirisi. ¹⁶ Yɔhana kase yii kiti walikãng ni, "N bibi, N pele nɔ baptizima ni mɛɛ, shɔngɓɔɔ teni ɓe jãng ni kaaka, N de waa ɓa N kale wu vi maani koodɔɔ ɓa. Wuko N pele nɔ baptizima ni Suru Tɔ̃ɔving ɓɔɔ ni yaa. ¹⁷ Wu vi shekeni a wu naa ni aru wu koo wu tipi shekenivi ɓatata wu sɔɔ muse nɛrɛng vi a ɓoo. Ruu leseni wuko ing sɔɔ shaare gãa a yaa ɓe shɔng da zenung ɓa shɔng rĩnse ɓa." ¹⁸ Ni gãsi waani yãa vɛ̃ɛni tɔti, Yɔhana gãle shɔngzengyi Laa polo ruu tɔ̃ɔving. ¹⁹ Alaɓe shɔng kɔse yubɔrɔ Hiridu yãa aruɓe sɔre zũngɓi soo Hirodiya ɓe, ɓɔɔ tɔti gasi ruu nangka ɓe Hiridu pele ɓe, ²⁰ a ɓaase viɓemiyi a vusu walikãng, a maa Yɔhana dɔɔ a gãyã. ²¹ Hami a tũmpu viɓemiyi, alaɓe shɔng pele shɔngzengyi baptizima ye, Yeso pele baptizima jɔ, alaɓe sii dong gɔ̃re Laa, koolapa puuyi, ²² Suru Tɔ̃ɔving looke a lang a wu yuu ni ana kooro, yãa sɔɔ ke a koolapa, "Mɔ ɓi Jaa ɓe N kase vɛ̃ɛni. N tãa tɔ̃ɔving ni mɔni." ²³ Alaɓe Yeso gaa wu shoni, wu saa wa bãti atu kop. Wu sii ɓi jaa (anaɓe shɔng sii too ɓe) ɓee Yusuu, Heli jaa, ²⁴ Matta jaa, Levi jaa, Melchi jaa, Jannai jaa, Yusuu jaa. ²⁵ Yusuu wu ɓi Matthathias jaa, Amos jaa, Nahum jaa, Esli jaa, Naggai jaa, ²⁶ Maath jaa, Mattathias jaa, Semein jaa, Josech jaa, Joda jaa. ²⁷ Joda ɓi Joanan jaa, Rhesa jaa, Zerubbabel jaa, Salathiel jaa, Neri jaa, ²⁸ Melchi jaa, Addi jaa, Cosam jaa, Elmadam jaa, Er jaa, ²⁹ Joshua jaa, Eliezer jaa, Jorim jaa, Matthat jaa, Levi jaa. ³⁰ Levi ɓi Saminu jaa, Judah jaa, Yusuu jaa, Jonam jaa, Eliakim jaa, ³¹ Mela jaa, Menna jaa, Mattatha jaa, Nathan jaa, Dawuda jaa, ³² Jesse jaa, Obed jaa, Boaz jaa, Salmon jaa, Nahshon jaa. ³³ Nahshon ɓi Amminadab jaa, Admin jaa, Arni jaa, Hezron jaa, Perez jaa, Yahuda jaa, ³⁴ Yakubu jaa, Ishaku jaa, Ibirayi jaa, Terah jaa, Nahor jaa, ³⁵ Serug jaa, Reu jaa, Peleg jaa, Eber jaa, Shelah jaa. ³⁶ Shelah ɓi Cainan jaa, Arphaxad jaa, Shem jaa, Noah jaa, Lamech jaa, ³⁷ Methuselah jaa, Enoch jaa, Jared jaa, Mahalalel jaa, Cainan jaa, ³⁸ Enos jaa, Seth jaa, Adamu jaa, Laa jaa.