¹ Yii yupa a yii nung walikang a waare Yeso a Bilatu watĩng. ² Yii gaa yãa yeleni a wu yuu, ni “Wo kpaa shɔngveeye ɓemi ng wũnte wo shɔng yãakooyi, ng zãare yii ani Kaisa saka vitipi, ang sↄng shãng ni wuni wu yuu wu ɓi Kirisi, kpanti." ³ Bilatu yɛ̃ɛ wu, ni, “Mↄ ko Kpanti Yahuda ya?" Yeso kose wu yãa a sɔɔ shãng ni, "Mɔ shãngye ananko." ⁴ Bilatu gãale yubɔrɔ firisiyi ɓɔɔ mↄↄ ni, "N de kpaa Jaaveeye ɓemi ɓa ni vĩni ɓɔɔni ɓa." ⁵ Vileseni wu ko yii watĩng, ni shãngni, "Shĩng shɔngzengyiye a yuyɔreni, ang mantevi a tipi Yahuda walikãng, gaa a Galili a sɔɔ ɛ mↄngɓemi tɔti. ⁶ Arugoko alaɓe Bilatu tãa viɓemiye, a sɔɔ yɛ̃ɛ kɔ shↄngveeye ɓemi wu ɓi shↄng Galili. ⁷ Alaɓe zeye ni wu wɔ̃ngni a Hirudu kaakanaa, a sɔɔ shong Yeso a Hirudu bii, ɓe wu bibi wusi jↄ a Urushelima ko a dikiwayi. ⁸ Alaɓe Hirudu ze Yeso ye, a tãa puruyato vɛ̃ɛni, aruviya sii bɛɛye wu ze wu tɛ̃tɛ̃. Tãa wu ruubiye sɔɔ shĩng gn wu ze vitaseni ɓe pele ɓe. ⁹ Hirudu yɛ̃ɛ Yeso ruuyi a dɔ̃rɔng toktok, vileseni wu ko Yeso de kose wu yãaɓɔɔ ɓa. ¹⁰ Yubɔrɔ firisiyi ɓɔɔ shↄnglabiniyi yii yupa, gatangatang a langse wu. ¹¹ Hirudu ɓɔɔ wu sojaayi yii pele Yeso showa a sɔɔ baase wu. Alaɓiko yii sↄↄ boose wu farabiyi tɔ̃ↄving a sɔɔ sↄↄre wu Bilatu bii. ¹² Aruviya Hirudu ɓɔɔ Bilatu yii wɔ̃ng wesang ni weni a dikiwa, aruviya atũmpu yisi ɓi shɔngpong ni weni. ¹³ Alaɓiko Bilatu sɔɔ ɓaa yubɔrↄ firisiyi ɓɔɔ shↄngladongyi ɓɔɔ mↄↄ shɔngzengyi ¹⁴ a sɔɔ gãale yini, nↄ ɛseng shↄngveeye ɓemi ana shɔngɓe ng wũngte shↄngzengyi, zepĩn, N bibi, alaɓe ng yɛ̃ɛ wu ye a nↄ watĩng, N de kpaa vĩni ɓɔɔ ɓa a shɔngveeye ɓemi bii ɓa aru viɓemeyi ɓe nↄng langse wu a yupa. ¹⁵ Ɓa, kɔ Hiridu jɔ, dɔ̃ɔse wo wu a wo bii, zepĩn tɔti, de pele viɓe daa waa shↄng nung wu vↄɔ ɓa. ¹⁶ Arugoko N nung wu ng sɔng yaa wu naa. ¹⁷ Hãmi yii Bilatu ye a tuu wu daare shɔng Yahudayi shɔng gãayãa goro naa ala tɔ̃ɔrenibi. ¹⁸ Vizeni wu ko yii kaayãa a yãawe walikãng, ni, waata ni "Shↄngveeye ɓemi ni, shɔng yaase wo Baranaba naaǃ" ¹⁹ Baranaba ɓi shↄngɓe shɔng maawu dɔɔ a gãayãa aru ɛseni yuyɔreni a vusu ɓundang ɓɔɔ tɔti aru nungnishↄngvↄɔ, ²⁰ Bilatu shãngyãa tɔti ni yini, aruviya kaseke wu yaa Yeso naa. ²¹ Vileseni wu ko yii Langke yaa, ni, "Ɓa wu naata a la, ɓa wu naata a la." ²² A shãng yãa tɔti ni yini ɓee tati, "Aruviya, shɔngveeye ɓemi pele vĩni ɓeweya? N de kpaa vĩni ɓɔɔ ɓa ɓe daa shĩng ke shɔng nung wu vↄɔ ɓa. Arugoko atũmpu ɓe N na nung wu ye, N yaa wu naa." ²³ Vileseni wu ko yii shii a yupa ni kaaka yiriyãa, a ɓaa yãa ni shɔng ɓaawu naata a la. Yii yiriyãa shĩngke Bilatu dũng viɓe yii shãngɓe. ²⁴ Arugoko Bilatu aa yii viɓe yii gɔ̃ↄre ɓe. ²⁵ A yaase yii naa goro shɔngɓe yii gɔ̃ɔre ɓe shɔng sii ɓaawu dɔɔ a gãayãa aru yusenipa yuyɔreni ɓↄↄ nungnishɔngvɔↄ. Vileseni wu ko a aa yii Yeso anaɓe yii kase ɓe. ²⁶ Laɓe yii de waani ni wuni ɓe, yii yii shɔngɓɔɔ wu rĩng ni Samenu shɔng Cirini, sing ɛni kaa kooɓɔɔ, a shĩngshe wu lajisehni a yuu wu too, wu dũng Yeso. ²⁷ Mɔɔ shↄngzengyi vɛ̃ɛni, ɓɔɔ ɓe sooyeyi ɓe yii sing a vusu vikiyato ɓɔɔ kaani yãavɔɔ aru wuni, yii de dũng wuni. ²⁸ Vizeni wu ko alaɓe raanung ye a yii bii ɓe, Yeso shãngni, "Sooyeyi ɓe Urushelima, nↄ kaa ɓa aru mini ɓa, nↄ kaa aru nↄ yuu ɓɔɔ nↄ jaayi. ²⁹ Aruviya zepĩn, dikiyi teni ɓe ying shãng, 'Zuuku ɓi sooyetɔ̃ɔriyi ɓɔɔ jangjaa ɓe de yee jaa ɓa, ɓɔɔ ming ɓe jaa de maa ɓa.' ³⁰ Alaɓiko yii gaa gãaleni kɔpɔyi ni, 'Wete ta a wo yuu,' ɓɔɔ jebuyi ni, 'Kuuke wo ta.' ³¹ Aruviya yii naa pele viɓemiyiye alaɓe la dong biyiri, ɓivi yii daa pele alaɓe na waateye viya? ³² Shↄngzeng ɓɔɔyi, shɔngɓɔɔniyi ziti, ɓe shↄng ɓaase yii ni wuni a waare yii aruɓe yii daa nungyivↄɔ. ³³ Alaɓe yii ɛ mↄngɓe shↄng ɓaani “Mↄng Kaakayuuvɔↄ” ye amↄngɓi ko yii jishe wu ni shↄngɓɔɔyi-goro a wu nashãng, goro ɓɔɔ a wu nagãng. ³⁴ Yeso shãngni, "Daa, yaase yii ruvĩni ta, aruviya yii de ze viɓe ying pele ɓa."Alaɓiko yii sↄↄ pele tepu, a vaase wu farabiyi. ³⁵ Shↄngzengɓiyi yii shii ang mile mɔng alaɓe yubɔrↄyi yii de baase wuni, “Kpengse shↄngɓↄↄyiye. Wu kpengse wu yuu ta jↄ, wu na ɓi Kirisi ɓee Laa, ɓe shɔnkg rↄↄ wu goro ɓe.” ³⁶ Sojaaɓiyi yii baase wu jɔ, a ɛ wu bii, ang aa wu yãani mɛɛ, ³⁷ a sɔɔ shãngni, "Mↄ na ɓi Kpanti ɓee shɔng Yahudayi, kpengse mↄ yuu ta." ³⁸ Shↄng shĩng vitaseni a wu yuu, “Ɓemi ɓi Kpanti ɓee shɔng Yahudayi.” ³⁹ Goro a titi shↄngɓɔɔɓiyi ɓe shɔng jisheyi dãa wu a shãngni, “Ɓa mɔko Kirisi ɓaya? Kpengse mↄ yuu ta ni woni walikang.” ⁴⁰ Vizeni wu ko goro ɓi kɔse wu yãa, ni, "Mↄ zaavɔɔ Laa ɓaya, aruviya shɔng ɓoore wo yɔri a yãawe? ⁴¹ Aru vi nungoko shↄng ɓoore wↄ yɔri, aruviya waa nung viɓe shɔng pele wɔ ye. Vizeni wu ko shↄngveeye ɓemi de pele ruvĩni ɓↄↄ ɓa. ⁴² Alaɓiko shãngni, “Yeso, mↄ yenugn aru mini alaɓe mɔɔ rookpanti ye." ⁴³ Yeso gãale wuni, "Nungoko N gãale mↄ, lami mↄng wɔ̃ngni mini a yee koolapa. ⁴⁴ La sii waaye mangoro, mɔng tĩngri sɔɔ ɛ a kuuke mɔng walikang a waa la nukobɛ̃ɛgoro ⁴⁵ alaɓe la sii riiye viki. Alaɓiko fara yuu mɔngɔ̃ɔreni vaase a titi ziti. ⁴⁶ Ni kaaka yiriyãa, Yeso shãngni Daa, a mↄ naa ko N ang surubi." Alaɓe shãng viɓeye, a sↄↄ vↄɔ ke. ⁴⁷ Alaɓe yubɔrɔ sojaa ɓɔɔ ze viɓe watĩngye, a aa Laa bongni, ni, "Nungoko shɔngveeye ɓemi wu sii ɓi shɔng yato ɓolongɓo”. ⁴⁸ Alaɓe mɔɔ ɓe sii yii ɛ a yãawe aru yii shĩngnung a viɓe ng watĩng walikãng yii ze viɓe watĩng ɓe ye, yii zuse ke a nungke naa a dangn. ⁴⁹ Vizeni wu ko shↄngɓe yii sii ze wu ye walikãng, ɓɔɔ sooye ɓe yii dũng wu a Galili, yii shii a dangaa, a mile viɓemiyi. ⁵⁰ Zepĩn, shↄngɓↄↄ ani wu rĩng ni Yusuu, wu sii goro a titi shɔng ladongyi. Wu sii ɓi shɔng tɔ̃ɔving ɓɔɔ shɔng yato ɓolongɓo. ⁵¹ Shↄngveeye ɓemi de pãngyãa ɓa a yi vipeleni kɔ a yii dɔɔkĩngni ɓa. Wu sii ɓi shɔng Arimataya, a ɓundang ɓee shɔng Yuhudayi, sing gaa Laa roonikpanti. ⁵² Shↄngveeye ɓemi, waa Bilatu bii a gɔ̃ɔre Yeso bii. ⁵³ A lɔre a tipi, a ling ni tɔ̃ɔving farapuru, a shĩng wu a yusa ɓee shↄng dɔɔ a bii tara, amↄngɓe shↄng de shĩng shɔngɓɔɔ ɓa a vusu ɓa. ⁵⁴ Sii ɓi Diki Gonteni, ɓe Diki Wɔ̃ɔkeni sii kpaaye. ⁵⁵ Sooyeyi ɓe yii sii ɛni Yeso ni a Galili yii dũng wu a sɔɔ ze yusa ɓɔɔ dɔɔɓe shɔng shĩng wu gigiri bii ɓe. ⁵⁶ Yii zuse a sↄↄ gonte gãasi ɓɔɔ nungsini. Yii sɔɔ wɔ̃ke a diki Wɔ̃ɔkeni anaɓe rudanni shãngɓe.