¹ Hãmi diki ɓele ɓe shaani bubula ɓe yisiti ɓaniɓa kpaaye, ɓe shɔng ɓaani Tuukeni. ² Yubɔrɔ firisiyi ɓɔɔ shɔngmanteniviyi yii sing bɛɛ kaaɓe yii daa nung Yeso vↄɔ, aruviya yii sing zaa shↄngzengyi. ³ Alaɓiko Shelan ɓoo Yahuda ɓe shↄng ɓaa wuni Iskariyoti bii, ɓe wu goro a titi kop atu ziti mi. ⁴ Yahuda waa yubɔrɔ firisiyi ɓↄↄ yubɔrↄ sojayi bii a sɔɔ tɔngse kaaɓe daa aa Yeso a yii naa ɓe. ⁵ Yii tãa puru yato a sɔɔ kase ni ying aa wu saka. ⁶ Sɔɔ aa yuu kiti a bɛɛ dɔ̃rↄng ɓe daa aa wu a yii naa a mↄngɓe mɔɔ ɓaniɓa. ⁷ Alaɓiko diki shaani bubula ɓe yisiti ɓaniɓa ɛye, ɓe a diki ɓi ko shɔng shaare mɛrɛ Tuukeni. ⁸ Arugoko Yeso shong Bituru ɓɔɔ Yɔhana. ni, "Waata nɔ waa gonte wo vishãng Tuukeni, aruɓe wo daa shaa ɓe." ⁹ Yii yɛ̃ɛ wu ni, "Mↄ kase wↄ gonte mↄngɓi a mↄngɓeweya? ¹⁰ A kaseyiyãa ni, "Zepĩn, alaɓe nↄ na ɓoo ɓundung ye, shↄngveeye ɓɔɔ too latooni mɛɛ ng kɔse nɔ. Nɔ dũng wu nↄ ɓoo yee ɓe ng waa ɓe. ¹¹ Alaɓiko nↄ gãale yubɔrɔ yee ɓini, 'Shↄngmantenivi tↄↄni, "Jaaka shɔng zangti weya, mɔng ɓe N daa shaa vishãng Tuukeni ni ng jaadↄↄyiː'” ¹² Ng tase nↄ gonteni jaakalapa bɔrɔ. Nↄ gontemɔng a mↄngɓiko." ¹³ Arugoko yii waake, a sɔɔ kpaa viɓiyi walikãng anaɓe gãale yii ɓe. Alaɓiko yii gonte vishãng Tuukeni amɔni. ¹⁴ Alaɓe la tiseye, wɔ̃ng a tipi ni wu jaadɔɔyi. ¹⁵ Alaɓiko gãale yini “N bɛɛye tɛ̃tɛ̃ N shaa vishãng Tuukeni ɓemi ni nↄ ni N sɔng kpãare a tĩng. ¹⁶ Aruviya N gãale nↄ, N daa shaa tↄɓa naɓa shɔng sɔ̃reyãa viye walikãng a Laa roonikpanti ɓa.” ¹⁷ Alaɓiko Yeso too jewa, atũmpu ɓe tase dɔreniye, a shãngni, “Tee vĩmi ta, nɔ vaase a nɔ titi. ¹⁸ Aruviya N gãale nↄ, N ɓoo mɛɛ ɓee rɛnila ɓemi tↄɓa naɓa Laa roonikpanti ɛye ɓa. ¹⁹ Alaɓiko too bubula, alaɓe sɔ̃reyãa dↄↄreni ye, a daalɛ, a sɔɔ aa yii, ni, “Ɓemi wu ko N bii, ɓe shↄng aa aru nↄ ni. Nɔ pele vimi aru yenign ɓee mini.” ²⁰ A too jewa tↄti a dɔ̃rɔng gorongko atũmpu vishãng, ni. “Jewa ɓemi wu ko polo maaniyãa ang vusu kpaa, ɓe shↄng tɛ̃ɛrɛ aru nↄ ni. ²¹ Vizeni wu ko nɔ teeshoo. Shɔngɓe ng riseng kuku ɓe wu naa ni mini a yuu teburu ɓemi. ²² Aruviya nungoko Jaa Shↄngzeng ng waa anaɓe shↄng shãngɓe. Bivi nugn kɔ̃ngni shↄngɓe ni wu kaa bii ko shɔng rise wu kuku. ²³ Yii gaa tɔngseni a yii titi ni ɓi we goro a yii titi shɔng ɓemi daa wɔ̃ng weya. ²⁴ Alaɓiko yãadong yupa a yii titi aru ɓiwe a yii titi daa wɔ̃ng bↄrↄngbɔ weya? ²⁵ A gãale yini “Kpanti shɔngɓeyidezelaɓa yii ɓi daayere a yii nung, shↄngɓe yii kaakanaa ani a yii yuu shↄng ɓaa yini shɔng peleni vitɔ̃ↄving. ²⁶ Vizeni wu ko na wɔ̃ng ɓa ananko ni nↄ ni ɓa, shɔngɓe wu ko bɔrɔngbɔ a nɔ titi wu rii shɔng wodot ɓɔɔ shɔngɓe wu ko shɔngbɔrɔ wu wɔ̃ng ana shɔngshonni. ²⁷ Aruviya ɓiwe wu ko bɔrↄngbɔ weya, shↄngɓe wɔ̃ng a yuu teburu ya kɔ shↄngɓe ng pele shonni? Ɓa shↄngɓe wɔ̃ng a yuu tebura ɓaya? Ni ɓemi walikãng N a nↄ titi ana shↄngɓe ng pele shonni. ²⁸ Vizeni wu ko nↄ ko shɔngɓe yii kĩngni mini ang vusu maaseniyi, ²⁹ N shĩng nↄ a yuu roonikpanti, jɔ anaɓe maa Daa shĩng a yuu roonikpanti ɓe, ³⁰ aruɓe nↄ daa shaa a sɔↄ ɓooyi a yuu teburu ang roonikpanti, nɔng sɔɔ wɔ̃ng a lakpantiyi nɔ de ɓoore yãakoo kop atu ziti ɓee Israila yɔri ni. ³¹ Samenu, Samenu, mↄ shii gatanga, Shelan bɛɛye wu too mↄ, aruɓe daa yɛ̃ɛmↄ ana nungwusi. ³² Vizeni wu ko N gɔ̃ↄrelaa ye aru mↄni, aruɓe mↄ shĩngnign daa wete ɓa. Atũmpu ɓe mↄ na zuseye tↄti, mↄ maase zũngwayi gn." ³³ Bituru gãale wu ni, “Daayere, N shiiye ɓatata N waa gãayãa N sɔɔ vɔɔ ni mɔni." ³⁴ Yeso kose wuni, "N gãale mↄ, Bituru, banti kĩn daa kaa yãa ɓe diki ɓemi ɓa, naɓa mↄ bɛ̃ng yaa tati ni mɔ de zeng zɔng ɓa." ³⁵ Alaɓiko Yeso gãale yini, "Alaɓe N shoo nↄ a gaa ɓani jejang ɓa, kↄ kɔ̃duku tɛ̃niviyi ɓa, kɔ koodɔɔyi ɓa, nɔ ɓɛɛ viɓɔɔ kɔtɔ ya? Yii kɔse wu yãani,” "Viɓɔɔɓa." ³⁶ Alaɓiko sɔɔ gãale yini, "Hãmi, shↄngɓe wu jejang na ani wu too ke, ɓɔɔ tɔti kɔ̃duku tɛ̃niviyi. Shɔngɓe wu yewa ɓa wu maale wu farakukenibi wu sɔɔ wo goro. ³⁷ Aruviya N gãale nↄ, viɓe shↄng binke aru mini ng watĩng ananko, 'Shↄng gãa wu ni shↄngɓe yii dũng rudanni ɓa.' Aruviya viɓe shↄngsishãng aru mini ng watĩng ananko." ³⁸ Alaɓiko yii shãngni “Daayere, "Zepĩnǃ Wu ko yewayi ziti mi." A gãale yini, "Tiseye" ³⁹ Yeso waa, kɔpɔ ɓee Olivi, anaɓe pele dikidi ɓe, wu jaadↄↄyi yii dũng wu atũmpu. ⁴⁰ Alaɓe yii too mↄngɓiye, a gãale yini, "Gɔ̃ↄrelaa ta aruɓe nↄ daa wete ɓa a maaseni ɓa." ⁴¹ A waa fefe ni yini ɓee loni tara goro, a sɔɔ kute ni gbĩngti a tipi a sɔɔ gɔ̃ↄrelaa, ⁴² ni, "Daa, mↄ na daa kase kↄtↄ, zɔ̃seng jewa ɓemi ta. Kɔɓaɓemikoɓa ɓa viɓe N kaseni ɓa, viɓe mↄ kase wu watĩng ta." ⁴³ Alaɓiko Laashɔngshonni ke a koolapa a wu bii, a maase wu kaakagn. ⁴⁴ Wu a vusu gɔ̃ↄni, a gɔ̃ↄrelaa tɔti yatogoro, wu pɔ̃ngni sɔɔ rii ana bɔrↄngbɔ lɔleni ɓee kpaa de tɛ̃ni a tipi. ⁴⁵ Alaɓe yupaye a mↄng gɔ̃ↄrenilaa, a ɛ wu jaadↄↄyi bii a kpaayi ying roo nungrong aru viki yato. ⁴⁶ A sɔɔ yɛ̃ɛ yini, "Aruvi nↄng roo nungrong viya? Yupata nɔ sɔɔ gɔ̃ↄrelaa, aruɓe nↄ daa ɓoo vusu maaseni ɓa. ⁴⁷ Alaɓe wu dong a yãashãng, zepĩn, mɔɔ yii kele a mɔni, ni Yahuda, goro a titi kop atu ziti ɓi, de tase yii dɔ̃rɔng ni. A ɛ maani ni Yeso aru wu dɔɔle wu, ⁴⁸ Vizeni wu ko Yeso gãale wuni, "Yahuda, mↄng maale Jaa Shↄngzeng ni dɔɔleni ya? ⁴⁹ Alaɓe shↄngɓe yisi a Yeso kaabi yii ze viɓe ng watĩng ɓe ye, yii shãngni, "Daayere, wo nungyi ta ni yewa ɓemi ya?" ⁵⁰ Alaɓiko shↄng goro a yii titi nung yubↄrↄ firisi wu jaashoni, a sɔɔ koo wu shoo nashãng. ⁵¹ Yeso tↄↄni, "Tiseye ananko!" A sↄↄ lii wu shoo ni naa, a gante wu. ⁵² Yeso gãale yubɔrɔ firisiyi ɓɔɔ yubɔrↄ soja ɓee mɔngɔ̃ɔreni, ɓɔɔ gãasi shɔngɓɔrɔyi ɓe yii ɛ wu yuu ɓe, “Nɔ ke weni nɔng yii shɔngɓɔɔ, ni yewayi ɓɔɔ labalayi ya? ⁵³ Alaɓe N ni nɔ ni dikidi a mɔngɔ̃ↄreni, nɔ de shĩngsheng naa ɓa a bii ɓa, ɓemi ɓi nɔ la ko, ɓɔɔ kaakanaa ɓee mɔngtĩngri.” ⁵⁴ Alaɓe yii yiwu ye ɓe, yii tese wu dɔ̃rɔng a sɔɔ waare wu yubɔrɔ firisi yee. Vileseni wu ko Bituru dũng yii a sɔɔ shii fefe ni yini. ⁵⁵ Atũmpu ɓe yii wu yaaye a titi teli yee ɓe yii sɔɔ wɔ̃ng a tipi mɔngoro, Buturu wɔ̃ng a yii titi. ⁵⁶ jaa sooye shonni ɓɔɔ ze wu alaɓe wɔ̃ngye a ɓengkeni ɓee yaa a dɔɔse wu nung a bii a sɔɔ tɔɔni, "Shɔngveeye ɓemi wusi jɔ ni wuni." ⁵⁷ Vileseni wu ko Bituru pãayãa, a shãngni, "Jaasooye, N de ze wu zɔng ɓa." ⁵⁸ Atũmpu la pɔta shɔngɓɔɔ tok ze wu, a sɔɔ shãngni, "Mɔ jɔ yii titi ko." Vileseni wu ko Bituru shãngni, "Jaaveeye, N ɓa." ⁵⁹ Atũmpu la goro shↄngveeye ɓↄↄ paase tɔti a shãngni, "Nungoko jaaveeye ɓemi wusi ni wuni, aruviya wu jɔ shɔng Galili ko." ⁶⁰ Vileseni wu ko Bituru tɔɔni, N de ze viɓe mↄng shãng ɓe ɓa.” Ɓanijangɓaseniɓa, alaɓe wu dong a mɔng yãashãngni, banti kĩn sɔɔ kaayãa. ⁶¹ Aɓe ranung ye, Daayere mile Bituru, Bituru sɔɔ yenugn a Daayere ruu, alaɓe gãale wu ni, Banti kĩn daa kaayãa ɓee lami ɓa naɓa mɔ paayãa aru mini ya tati ɓa." ⁶² Bituru sɔɔ ke gaa a kaayãavↄɔ vĩnivĩvĩ. ⁶³ Alaɓiko shↄngɓe yii yii Yeso a yee maani yii baase wu a sɔɔ nung wu. ⁶⁴ Yii kuuke wu nung a sↄↄ yɛ̃ɛ wu, ni, "Shãng vizeni taǃ Ɓiwe nung mↄ weya?" ⁶⁵ Yii shãngke gãasi yãa kpatakpata a Yeso yuu vɛ̃ɛni, a langse wu. ⁶⁶ Alaɓe gandi rↄↄye, shɔngbɔrↄbɔ ɓee shɔngzengyi yii muse mↄngoro, ɓaaseni yubɔrɔ firisiyi ɓɔɔ shↄnglabiniyi. Yii waare wu a vusu Mɔngmɔni. ⁶⁷ A tↄↄni, "Gãale wo ta, mↄ na ɓi Kirisi." Vizeni wu ko sɔɔ gãale yini, "N na gãale nɔye, nɔng aa zɔng ɓa, ⁶⁸ N na sɔɔ yɛ̃ɛ nↄye nↄng kaseng yãa ɓa. ⁶⁹ Vizeni wu ko viɓe yii hãmi a watĩng, Jaa Shↄngzeng ng wɔ̃ng a naashãng kaaka ɓee Laa." ⁷⁰ Yii walikãng yii shãngni, "Hãmi mↄ ko Jaa Laa ya?" Yeso gãale yini, "Nɔ shãngye ɓi miko." ⁷¹ Yii tↄↄni, "Wong bɛɛ tɔti shɔng aniyãa weya? Aruviya wo ni wↄ yuu wo tãaye a wu yãa.