¹ Gandi zibĩni a diki shↄↄni ɓee diki nawatati, yii ɛ yusa, a ɛse gãasiviyi ɓe yii gonte ɓe. ² Yii kpaake shↄng gile taraɓiye a yãa yusa. ³ Yii ɓoo vuzu, vileseni wu ko yii de kpaa Daayere Yeso gigiri bii ɓa. ⁴ Watĩngke, alaɓe yii dong a yɔreniyu aruni, ɓanijangɓaseniɓa, shɔngzengyi ziti yii shii a yii kaagn ni ɓengkeni farabi. ⁵ Alaɓe sooyeɓiyi yii a titi zaani yii sɔɔ roore yuu ye ni tipi, yii gãale sooyeɓiyi ni, “Aruvi nɔng bɛɛ shↄngsurubi a titi vɔɔyi viya? ⁶ Wu ɓa amↄngɓemi ɓa, yupayeǃ Yenugnta a viɓe gãale nↄ alaɓe sii wu a Galili ɓe, ⁷ ni shↄng aa Jaa Shↄngzeng a shↄngruvĩniyi naa yii sɔɔ jishe wu, a tũmpu diki tati ng yupa tↄti." ⁸ Sooyeɓiyi yii yenugn a wuu ruushãngniyi ⁹ a sɔɔ zuse a daa yusa a waa gãale kopatugoroɓiyi ɓɔɔ shɔng gaasi walikãng. ¹⁰ Hãmi Maryamu Magdaliya, Yuwana, Marayamu Yakubu ningɓi ɓɔɔ sooye gãasi yii waa gãale jaarɔɔniyi viɓemiyi walikãng. ¹¹ Vileseniwuko ruuɓemi de wɔ̃ng ɓa ana viɓɔɔ a jaarɔɔkeniyi bii ɓa, yii de sɔɔ azɔng ɓa a sooyeɓiyi yãashãngni ɓa. ¹² Niɓemi walikãng Bituru yupa a yuuke a sɔɔ waa yusa, shiike a sɔɔ deng vuzu, a ze farabi lini dangkeye totok. Alaɓiko Bituru sɔɔ waa wuu yee, de lereni a yuu viɓe watĩng ɓe. ¹³ Zepĩn, ziti ayi titi yii sing waa ni ɓuu ɓe shɔng ɓaani Imawusi a diki ɓini, ɓe daa waa rangteni dɔɔ la tati ni Urushalima. ¹⁴ Yii tɔngse a yãawe aru viɓe wating ɓe walikãng. ¹⁵ Watĩngke, alaɓe yii de tɔngseni ɓɔɔ yɛ̃ɛleni ruu a yãawe, Yeso ni wu yuu ke ayi bii a sɔɔ waani yini. ¹⁶ Vileseniwuko yii nung kuuke yii de sɔɔ too wu zↄng ɓa. ¹⁷ Yeso gãale yini, “Ɓi ruu ɓewe nɔng tɔngse nɔ ziti mi alaɓe nɔng kn viya?” Yii shii amɔni ni leseni yato. ¹⁸ Shↄngɓↄↄ goro ayi titi shↄng ɓaa wu ni Kiliyobasi, kase wu ni, "Mↄ ko goro shee a vusu Urushelima ɓe de ze viɓe watĩng a diki ɓemiyi ɓa ya?" ¹⁹ Yeso gãale yini, "Ɓi viyi viya?" Yii kose wuni, "Viɓe yii watĩng aru Yeso shɔng Nazara, ɓe wu sii shɔngzeni, shɔng kaakanaa nungoko ɓɔɔ ruu a Laa watĩng ɓɔɔ a shɔngzengyi bii walikãng, ²⁰ ɓɔɔ anaɓe yubɔrɔ firisiyi ɓɔɔ shↄngladongyi yii ãa wu aru shɔng nung wu vɔɔ shↄng sɔɔ jishe wu. ²¹ Vileseniwuko wo sii tegn ni wu ko daa kpengse shɔng Israila. Ananko, ɓivi ya tↄti viya, waa ye lami diki tati ɓe viɓemeyi walikãng yii watĩng ɓe. ²² Ananko tɔti, sooye ɓↄↄyi ɓe yii a wo titi yii ãa wo vii bii zaani, aru alaɓe yii waa yusa gandi ziiɓini. ²³ Alaɓe yii de kpaa wu bii ɓa a yusa, yii ɛke, a shãngni yii ze a vusu zenitĩng shɔngshoniyi yii gãale yini wuni surubi ni. ²⁴ Veeyi ɓɔɔ ɓe yini woni yii waa yusa, a kpaa jↄ anaɓe sooyeɓiyi yii shãngɓe. Vileseniwuko yii de ze wu ɓa! ²⁵ Yeso gãale yini, “Shↄng vii wureniyi ɓɔɔ shɔng kpitikpi sĩngsĩngyi a mɔng ani zↄng a viɓe shↄngzeniyi yii shãng walikãngǃ ²⁶ De wɔ̃ng ɓa ɓatata aru Kirisi wu kpãare aru viɓemiyi, wu sɔɔ boo wu bongni ɓaya?" ²⁷ Alaɓiko gaa ni Musa a waa gãasi shↄngzeniyi walikãng, Yeso riseyi aru wu yuu a vusu labiniyi walikãng. ²⁸ Alaɓe yii kpaa ye yii ɓoo ɓuu ɓe yii sing waa ɓe. Yeso pele weni dong waa ni tĩng. ²⁹ Vizeniwuko yii sɔɔ gɔ̃ɔre wu, ni, "Wɔ̃ngta ni wo ni, aruviya la yeye diki sɔɔ kpaaye wu sɔ̃ɔyãa." Arugoko ɓoo vusu aru wu wɔ̃ngni yini. ³⁰ Watĩngke, alaɓe wɔ̃ng ye a tipi ni yini wu shaa vishang, a too bubula, a tɛ̃ɛ zuuku, a daale, a sɔɔ aa yii. ³¹ Alaɓiko yii nung sɔɔ puuyi, yii sɔɔ too wu zↄng, sↄↄ rĩng a yii nung. ³² Yii gãale weni, "Wo sĩngsĩng de shaare ɓa a wↄ nung, alaɓe shãngyãa ni woni a dɔ̃rↄng, laɓe puure wo labiniyi ɓaya?" ³³ Yii yupa alawa a sɔɔ zuse Urushelima. Yii kpaa kopatugoroɓiyi ni shↄngɓe yii sii ni yini, ³⁴ ni, "Nungoko Daayere yupaye, sɔɔ keye a Samenu bii.” ³⁵ Yii sↄↄ shãng viɓe watĩng alaɓe yii a dɔ̃rↄng, kaaɓe yii too Yeso zↄng ɓe alaɓe daale bubula ɓe. ³⁶ Alaɓe yii de shãng viɓemiyi ni, Yeso ni wu yuu shii a yii titi, a shãngshe yini “Lemɓa ni nɔni”. ³⁷ Vizeniwuko yii bii maaseke yii sɔɔ yiini vɔɔzaani a yii lereni ying ze rãmang. ³⁸ Yeso sɔɔ gãale yini, "Aruvi nↄng zaavɔɔ viya? Aruvi nɔng yɛ̃ɛle ruu a nↄ sĩngsĩng viya? ³⁹ Mileng naayi ta ɓɔɔ ng dↄↄ, aru ɓi miko ni N yuu. Ling ta nↄ zeke. Aruviya rãmang wu bii ɓɔɔ kaaka ɓaniɓa, anaɓe nɔng zeng ɓemi ɓa." ⁴⁰ Alaɓe shãng viɓemi ye, a tase yii wu naayi ɓↄↄ wu dↄↄ. ⁴¹ Ni ɓemi walikãng yii de azↄng ɓa aru puruyato, bii sↄↄ zaayi. Yeso gãale yini, "Nↄ viɓɔɔ ani ɓe shaani ya?" ⁴² Yii aa wu wↄni jezũng, ⁴³ teeke asɔɔ shaa a yii watĩng. ⁴⁴ A gãale yini, "Ɓemi yiko ng yãashãngniyi ɓe N gãale nↄ alaɓe N ni nↄni, ni viɓe shↄng binke a vusu rudangni ɓee Musa ɓɔɔ ɓe shɔngzeniyi ɓɔɔ Labinisoo ng watĩng walikang anaɓe shɔng shãng ɓe." ⁴⁵ Asↄↄ puuyi sĩngsĩng/lereni aruɓe yii daa ze labiniyi ɓe. ⁴⁶ A gãale yini, "Anaɓe shɔng binke ni, Kirisi ng kpãare ɓɔɔ wu vↄɔ tɔti wu sɔɔ yupa a yusa atũmpu diki tati. ⁴⁷ Shɔng waayãa yaaniruvĩni ɓɔɔ yaaseni ɓee ruvĩni a wu rĩng a yãakooyi walikãng, shↄng gaa a Urushelima, ⁴⁸ Nↄ ko shɔngɓe yii zee viɓemiyi walikang ni nɔ nung. ⁴⁹ Zepĩn, N shongshe nↄ viɓe maa Daa vaase ɓe. Vizeniwuko nↄ wɔ̃ng a vusu ɓundang wuwa laɓe shɔng yii nɔye ni kaaka a yuu lapa.” ⁵⁰ Yeso dũngni yini a waa laɓe yii kpaa Betani ye. A peng wu naayi ni lapa a tɛ̃ɛre yii zuuku. ⁵¹ Watĩngke, alaɓe dong tɛ̃ɛre yii zuuku, a yaa yii shↄng sɔɔ too wu a waare wu koolapa. ⁵² Arugoko yii gbãare wu asɔɔ zuse Urushelima ni puruyato vɛ̃ɛni. ⁵³ Yii watĩng ni wɔ̃ngni a jaakalaa, a aa Laa Zuuku.