¹ Watĩng ke a diki ɓↄↄ alaɓe Yeso sing mante shↄng vi a mɔng gɔ̃ɔreni ɓɔɔ waani polo ruu ni yubɔrɔ firisiyi ɓɔɔ shↄnglabiniyi yii ɛ wu bii ni shɔngbɔrɔyini, ² Yii shãng, a gãale wu ni, "Gãale wo ta ni kaakanaa vipeleni ɓewe mↄng pele viɓemiyi weya, kɔ ɓi we aa mɔ kaakanaa vipeleni ɓemi weya.” ³ A kase a sɔɔ gãale yii ni, "N yɛ̃ɛ nↄ ruu jↄↄ, nↄ sɔɔ gãaleng. ⁴ Baptizima ɓee Yɔhanaː Ke a koolapa ya kɔ ke a shↄngzengyi bii?" ⁵ Yii tɔngse a yii nung, ni, "Wo na shãng ye, 'Ke a koolapa,' ng shãngni, 'Aruvi wo de azɔng ɓa a wu ni ɓa viya? ⁶ Wo na sɔɔ shãngye, 'Ke a shɔngzengyi bii,' shↄngɓemiyi walikãng ying lɔɔle wo ni tara, aruviya yii ze ye Yɔhana wu sii ɓi shↄngzeni.” ⁷ Arugoko yii sↄↄ kase wu ni yii de ze mↄngɓe ke ani ɓa. ⁸ Yeso gaale yii ni, "N bibi N daa gãale nↄ ɓa kɔ ni kaakanaa ɓewe N pele viɓemiyi ni ɓa.” ⁹ Gãale shↄngɓiyi yãagani ɓemi, "Shↄngveeye ɓↄↄ langvi a guru, a sɔɔ aa shↄngɓe yii gaa vi guru ɓe, a sɔɔ wa koo ɓↄↄ ɓe diki ɓololo. ¹⁰ Alaɓe la tooni viguru tiseye a shↄng jaashoni a shɔngaani guruyi bii, ni yii aa wu a titi vi rɛni ɓe vusu guru. Vileseni wu ko shↄngaani viguru ɓi yii nung wu a sɔɔ langte wu naa waati. ¹¹ A sↄↄ shong jaashoni ɓↄↄ tↄti yii nung wu tɔti, a pele wu viyusɛ̃ a sɔɔ langte wu naa waati. ¹² A shong ɓɔɔ tɔti ɓee na tati yii jɛ̃lɛ wu bii tɔti, a sɔɔ lɔɔke wu a gaa. ¹³ Arugoko daayere shɔng guru ɓi shãng ni, 'N daa pele viya? N shong maajaa kↄtɔ. Kɔ yii daa aa wu bɔrɔ kɔtɔ a bii.' ¹⁴ Vileseni wu ko alaɓe shↄngaani vi guru ɓemi yii ze wu ye, yii tↄngse a yii nung, ni, 'Ɓemi wu ko jaavivɔↄ. Wo nung wu vↄɔ ta, aruɓe wu vivↄɔ daa wɔ̃ng wo ɓe. ¹⁵ Yii lɔɔke wu a kuku guru ɓi a sɔɔ nung wu vɔɔ. Ɓivi daayere shɔng guru ɓemi daa pele ni yini viya? ¹⁶ N ɛke wu lese shɔngaani vi guru ɓemiyi, wu sɔɔ aa shɔngɓɔɔ tok guru ɓi." Alaɓe yii tãa ye, yii shãngni, "Na wɔ̃ng ɓa ananko ɓaǃ" ¹⁷ Yeso mile yii kiti, a shãngni, viɓemi taseni ni viɓe shɔng binkeni viyaː 'Tara ɓe shɔng maani mɔng yii bɛ̃ɛ ɓe riiye tara yãakati'? ¹⁸ Shↄngɓe na wete ye a yuu tara ɓemi ing daale kpatakpa, shↄngɓe tara ɓemi na sɔɔ wete ye a wu yuu ing nangke wu." ¹⁹ Arugoko shↄnglaabiniyi ɓɔɔ yubɔrɔ firisiyi yii bee ke yii yiwu a la wa, aruviya yii zeye ni shãng yãagani ɓemi a yii yuu ko. Vileseni wu ko yii zaa shɔngzengyi. ²⁰ Yii mile wu tɔ̃ɔving, a shong shↄngɓɔɔ kaali ɓe riise wu yuu ana shɔng yato ɓolongɓo, aruɓe yii daa kpaa ruu leseni a wuu yãashãngni, aruɓe yii daa aa wuu a shɔng ladong ɓɔɔ shɔngkaakanaa ɓee gomna. ²¹ Yii yɛ̃ɛ wu, ni, "Shↄngmantenivi, wo zeye mↄ shãng a sɔɔ mantevi ruu nungoko, mɔ sɔɔ tase kaseni yuu ɓa a shɔngɓɔɔ ɓa, mɔ mantevi nungoko aru dɔ̃rɔng ɓee Laa. ²² Likɔtↄ wo shoore Kaisa saka vi tipi ya, kɔ ɓa? ²³ Yeso ze yii kpɛ̃ɛni ye, a sɔɔ gãale yini, ²⁴ Nɔ taseng dinari ta. Ɓiwe nungsusuru ɓɔɔ wu rĩng a yupa weya?" Yii shãngni, "Kaisa ɓe." ²⁵ A gãale yini, "Nɔ aa Kaisa viɓe yiɓi Kaisa ɓe, nɔ sɔɔ aa Laa viɓe yiɓi Laa ɓe." ²⁶ Yii de kpaa ruu leseni ɓɔɔ ɓa a viɓe shãng a shɔngzengyi watĩng ɓa, bii zaayi a wu kaseni, yii sↄↄ wɔ̃ng sĩngsĩngsĩng. ²⁷ Alaɓe shɔng Sadukiyi ɓɔɔ yii ɛ wu bii ye, shↄngɓe yii shãngni yunipayusa ɓa ani ɓa; ²⁸ yii yɛɛ wu, ni, “Shɔngmantenivi, Muusa binke wo ni shɔngɓe zũngbi na vↄɔye wu soo ani wu jaa ɓa, zũngɓi wu too sooye ɓi, wu sɔɔ yese zũngɓi Jaa. ²⁹ Zũngɓↄↄyi ani nawatati ɓe shɔɔni sɔɔ yɛ̃ɛ soo, a vↄɔke jaa ɓa, ³⁰ ɓe na ziti wu jɔ ananko. ³¹ Ɓe tati too wu, jɔ ananko yii nawatati yii yaa wu jaa ɓa a vɔɔke. ³² A tũmpu ɓi sooye ɓi sɔɔ vɔɔke. ³³ Hãmi a yunipayusa, ing wɔ̃ng ɓiwe soo weya? Aruviya yii nawatati yii too wu ye ana yii soo." ³⁴ Yeso gãale yini, “Jaa lakoo ɓemiyi yii pele gbare a sɔɔ aa wee a gbare. ³⁵ Shɔngɓe shↄng ze yii ana shɔng ɓatatayi a lakoo waa ying tee a yunipayusa ying pele gbare ɓa kɔ yii aa wee a gbare. ³⁶ Kɔ yii daa sɔɔ vↄↄ kɔtↄ, aruviya yii hãmi goro ana Jaashonniyi ɓɔɔ Laa jaayi, ying wɔ̃ng ana jaa yunipayusayi. ³⁷ Ni shɔng yuse vↄɔ kɔtɔ, kɔ Muusa tase kɔtɔ ananko, a mɔng aru jĩngti, mↄngɓe ɓaa Daayere ni Laa ɓee Ibirayi, Laa ɓee Ishaaku ɓɔɔ Laa ɓee Yaakubu. ³⁸ Hãmi wu ɓa Laa ɓee vↄɔ ɓa, wu ɓi Laa ɓe shↄng surubiyi, aruviya shɔng walikãng yii suru ani aru wuko” ³⁹ Shↄng labini ɓɔɔyi yii kase yãa ni, "Shɔngmantenivi, mɔ kase yãaye ɓatata." ⁴⁰ Aruviya yii de bɛɛ ɓa yii yɛ̃ɛ ruuɓↄↄ tↄɓa. ⁴¹ Yeso gãale yii, aruvi yii tɔɔni Kirisi ɓi Dawuda jaa viya? ⁴² Aruviya Dawuda ni wu yuu shãng kↄtↄ a labinisoo, Daayere gãaleng Daayere, 'Wɔ̃ngta ang naa nashang, ⁴³ wuwa laɓe N riise mɔ shɔngponyiye ladong shĩngnidɔɔ.' ⁴⁴ Arugoko Dawuda ɓaa Kirisi ni 'Daayere,' na ananko daa sↄↄ wɔ̃ng Dawuda jaa nukoviya?” ⁴⁵ A shↄngzengyi walikãng shoo shãngshe wu jaadɔɔyi ni, ⁴⁶ "Nↄ shĩngnung aru shↄnglabiniyi, ɓe yii kase kĩngni ni farabi ɓe shɔngpɔlɔng a sɔɔ kase jiiniyãa tɔ̃ɔving a mɔng nungmɔɔyi ɓɔɔ bɔrɔngbɔ lawɔ̃ngni a vusu mɔngɔ̃ɔreniyi a mɔng shaani vishãng tɔ̃ɔrenibi. ⁴⁷ Yii sɔɔ doose soo vↄɔyi yee, aru taseniyuu yii sɔɔ rangte gɔ̃ↄreni Laa. Zↄng shↄngzengɓemiyi ying kpaa bɔrɔngbɔ leseni."