¹ 1Yeso boo a sɔɔ tuuke ni vusu Yariko. ² Zepĩn, shɔngɓɔɔ a mɔni wu rĩngni Zakiyosi. Wu ɓi yubɔrɔ shɔng teni saka vitipi wu tɔti shɔng vinaa. ³ Ɓeke wu ze kɔ Yeso ko weya, aɓe de kpaa wu zeni ɓa aru mɔɔ ɓa, aruviya wu ɓi shɔng dɔka de bong ɓa. ⁴ Arugoko yuu a yii tĩng a wa vɔ̃ng yuu la sikamo aruɓe daa ze wu ɓe, aruviya Yeso sing tuukeni dɔ̃rɔng wa ko. ⁵ Alaɓe Yeso ɛ mɔng ɓi ye ɓe, a peng nung ni paa a sɔɔ gãale wu ni, “Zakiyosi, lɔɔ ta ɓanijangɓaseniɓa, aruviya lami N lɔɔ a mↄ yee ko.” ⁶ Arugoko ɓanijangɓaseniɓa lɔɔ tipi aruɓe daa tee wu ni puru yato. ⁷ Alaɓe shↄngzengyi walikãng yii ze vimi ye, yii walikãng wɔ̃ɔmeyãa, ni, “Waa ye wu lɔɔ a shↄng ruvĩni yee.” ⁸ Zakiyosi yupa a sɔɔ gãale Daayere ni, "Zepĩn, Daayere, N vaase ing vinaa a titi N sɔɔ aa shↄngrangyi, N naa sii ɓɔɔ shɔngɓɔɔ viɓɔɔ kɔto, N sɔɔre yii wu waa dɔɔ dɛ̃ɛro." ⁹ Yeso gãale wu ni, "Lami kpengseni ɛ yee ɓemi ye, aruviya shɔngɓemi wu jↄ Ibirayi jaa ko. ¹⁰ Aruviya Jaa Shↄngzeng ɛke aru wu bee wu sɔɔ kpengse shↄngɓe sii yii rĩng ye”. ¹¹ Laɓe yii tãa viɓemiyi ye, watĩng ni yãa shãngni a sɔɔ gãale yii yãagani, aruviya sii kpaaye ni Urushelima, yii sɔɔ lereni Laa roonikkpanti kpaa ye ɓanijangɓaseniɓa. ¹² Arugoko sɔɔ gãale yii ni, "Shↄng tɔ̃ↄving ɓↄↄ ani ɓe waa tipi ɓↄↄ fefe aru wu tese wu yuu roonikpanti wu sↄↄ zuse ke. ¹³ A ɓaa wu jaashoniyi kopi yãa a sɔɔ aa yii minasi kopi a sɔɔ gãale yii ni, 'Pele numↄ ta wu wa laɓe N daa zuse ɓe.' ¹⁴ "Vi leseni wu ko wu shↄng kooyi yii bɛ̃ɛ wu a sɔɔ shong shɔng a wu tũmpu, ni, 'Wong zenung yaani shↄngveeye ɓemi ɓa wu pele kpanti a wo yuu ɓa. ¹⁵ Watĩng ke alaɓe zuse ye ɓe, a tũmpu ɓe tee roonikpanti ye ɓe, a kɔse yii yãa yii ɓaare wu jaashoniyi ɓe aa yii saka yãa ta, aruɓe daa ze pãngni saka ɓe yii kpaa a nungmɔɔ ɓe yii pele ɓe. ¹⁶ "Shↄng shɔɔni ɛ wu tĩng, a shãngni, 'Daayere, mↄ minasi kopi ɛse ɓɔɔye a yuu paa kopi.' ¹⁷ "Shↄng tɔ̃ↄving gãale wu ni, Nbɛɛ, jaashoni tɔ̃ɔving. Ɓe mↄ wɔ̃ngye shɔng shĩngnign a yuu vitↄkɔlɔng ɓemi, mↄng kpaa kaakanaa a yuu ɓundangyi kopi.” ¹⁸ “Shↄngɓe ziti ɛ, a shãngni, 'Daayere, mɔ mina, kpaa ɓɔɔye a yuu paa maani. ¹⁹ "Shↄng tɔ̃ↄving gãale wu ni, 'Kpaa kaakanaa ta a yuu ɓundangyi maani. ²⁰ Goro ɓↄↄ ɛ, ni, 'Daayere wu ko mↄ mina mi, ɓe N shĩng tɔ̃ↄving a vusu fara, ²¹ aruviya N zaa mɔ kɔtɔ, aru mↄ ɓi shɔng kasenivi vɛ̃ɛni. Mↄ tee viɓe mↄ de shĩng ɓa, mɔ sɔɔ too a mↄngɓe mↄ de ruu ɓa. ²² Shↄng tɔ̃ↄving ɓi gãale wu ni, 'N boore mɔ yɔri ni mↄ yãa shãngni, nanka Jaashoni. Mↄ ze ye ni N ɓi shɔng kasenivi vɛɛni, N too vii a mↄngɓe N de shĩng ɓa, N sɔɔ kaavi a mↄngɓe N de ruu ɓa. ²³ Na ananko aruvi mↄ de shĩngsheng saka ɓa a ɓoo ɓa viya, aruɓe alaɓe N na zuse ye N daa teng saka kɔtɔ ni pãngni ni a yupa. ²⁴ Shↄng tɔ̃ↄving gãale shↄngɓe yii shiile a mɔni, 'Tee mina ɓe a wu naa ta, nↄ sɔɔ aa shↄng mina kopi.' ²⁵ "Yii gãale wu ni, Daayere, wu minasi ani kopi” ²⁶ '"N gãale nↄ ni, shↄngɓe wu vi ani shɔng pãngse wu ɓɔɔ, vileseni wu ko shↄngɓe wu vi ɓa a naa ɓa, kɔ viɓe a wu naa ɓe shↄng tee a kati. ²⁷ Vileseni wu ko N shↄngpong ɓemiyi, ɓe yii de kase ɓa N rookpanti a yii yuu ɓa ɛse yii ta a mↄmi nↄ nung yii vↄɔ ang watĩng” ²⁸ Alaɓe shãng viɓemiyi ye, a watĩng ni, waani paa Urushelima. ²⁹ Watĩng ke alaɓe kpaaye ni Betapagi ɓↄↄ Bitani, a kɔpɔ ɓe shↄng ɓaani Olivi, a shong wu jaadↄↄyi ziti, ³⁰ ni, "Waa jekoo ɓe tĩng waa ta. Alaɓe nↄ na ɓooye, nↄng kpaa jaabalagi ɓɔɔ kↄtɔ ɓe shↄng de vɔ̃ng wu ɓa. Nↄ kale wu nɔ sɔɔ ɛseng ni. ³¹ Shↄngɓɔɔ na yɛ̃ɛ nɔ ye, 'Aruvi nↄng kale viya? Nↄ shãngni, Daayere kase wu kↄtↄ”' ³² Shↄngɓe shɔng shong ɓemi yii wa a sɔɔ kpaa jaabalaji ɓi anaɓe Yeso gãale yii ɓe. ³³ Laɓe yii de kale jaabalaji ɓini, shɔng jaabalaji ɓi gãale yii ni aruvi nɔng kaleng jaabalaji viya? ³⁴ Yii shãngni, "Daayere kase wu kↄtↄ." ³⁵ Yii ɛse Yeso, a sɔɔ yɔɔle yii fara a yuu jaabalaji ɓi a shĩng Yeso a yuu paa. ³⁶ Laɓe de waani, yii tangte yii fara a dɔ̃rↄng. ³⁷ Laɓe kpaaye hãmi wu ɓoo mɔngɓe kↄpɔ Olivi shii ɓe, wu mↄↄ jaadɔɔyi walikãng yii gaa puru yato a sɔɔ dɔɔ Laa ni kaaka yiri yãa aru bɔrↄngbɔ vipeleni ɓe yii ze be, ³⁸ ni, "Zuuku ɓi kpanti ɓe ɛ a vusu Daayere rĩngǃ Wɔ̃ngniɓatata a vusu koolapa ɓɔɔ bongni a paaǃ" ³⁹ Gãasi shɔng Farisa ɓe yii a vusu mɔɔ yii gãale wu ni, "Shↄngmantenivi, kɔse mↄ jaadↄↄyi yãa ta.” ⁴⁰ Yeso kose yii a shãngni, N gãale nↄ, kɔ shɔngɓemi yii zĩngyãa kɔtɔ, tarangyi ying kaayãa kɔtↄ.” ⁴¹ Alaɓe Yeso kpaaye ni ɓundang ni, kaayãavɔɔ aru yini, ⁴² ni, na nɔ ze ye a diki ɓemi, kɔ nↄ ko, viɓe da ɛse nɔ wɔ̃ngniɓatata, vileseni wu ko hãmi yii vɔ̃ye a nɔ nung. ⁴³ Aruviya diki teni a nↄ yuu alaɓe nɔ shↄngpongyi ying maa mↄngɓe shɔng daa ke ɓa a nɔ kaa bii yii sɔɔ kĩngte nↄ, yii sɔɔ sãa nↄ kɔningkaweya. ⁴⁴ Ying nung nↄ ang sɔng lɔɔke nɔ a tipi, ni nↄ jaayi ni. Ying daa tara ɓↄↄ ɓa a yuu we ɓɔɔ ɓa aruviya nɔ de too la kpengseni ɓa”. ⁴⁵ Yeso ɓoo mɔngɔ̃ɔreni a sɔɔ gaa langteni shↄngɓe yii sing maalevi. ⁴⁶ A gãale yii ni, "Shↄng binke ni, 'N yee ing wɔ̃ng yee gɔ̃ↄreni Laa, vileseni wu ko nↄ riiseye yee shↄngɓↄↄyi.” ⁴⁷ Ananko Yeso mantevi dikidi a mɔng gɔ̃ɔreni. Yubɔrɔ Firisiyi ɓɔɔ shɔnglabiniyi yii bee ke yii lese wu, jɔ ananko shↄngɓiyi yubɔrɔyi, ⁴⁸ yii de kpaa dɔ̃rↄng peleni ɓa, aruviya shↄngzengyi walikãng yii sing wee shoo a wu yãa shãngni ɓatata.