¹ Alaɓi ko shãngshe yii yãagani aruɓe yii daa gɔ̃ɔre Laa dikidi yii na sɔɔ yↄↄ ɓa, ² ni, "Shɔngɓooniyɔri ɓɔɔ ani a ɓundang ɓɔɔ ɓe zaa Laa ɓa sɔɔ aa shɔng bↄrↄ ɓa a bii ɓa. ³ Hãmi Soovɔɔ ɓↄↄ ani a ɓundang ɓi, ɓe ɛ wu bii dikidi, ni, "Yiseng naa ta ing kpaa kpensengseni ang shɔngpɔng yuu.' ⁴ Aruviya diki waa ye ɓololo ɓe de kase ɓa wu yise wu naa ɓa, a tũmpu diki ɓɔɔyi a gãale wu yuu ni, 'Ɓe wɔ̃ng ye N zaa vↄɔ Laa ɓa kɔ N aa shↄngzeng bɔrɔ a bii, ⁵ ni ɓemi walikãng aruɓe soovↄɔ ɓemi yↄreng ye vɛ̃ɛni, N yise wu naa kↄtↄ N kpengse wu, aruɓe daa yɔreng ɓa ni wu ɛlɛni dikidi ɓa.'" ⁶ Alaɓi ko Daayere shangni, "Tãa viɓe shↄngɓooniyɔri ɓe shãng ruu nungoko ɓa mi shãng mi. ⁷ Hãmi Laa daa zenung ɓa wu kpengse wu jaayi ɓe rɔɔyi ɓe yii kaa yãa vɔɔ a wu bii zii bↄↄ la ɓa ya? Daa shiile kↄtↄ a yii yuu ya? ⁸ N gãale nↄ ni ing kpengse yii ɓanijangɓaseniɓa. Jɔ ananko, alaɓe Jaa shɔngzeng na ɛ ye daa kpaa shĩngnign kↄtↄ a koodanga ya?” ⁹ Alaɓi ko sɔɔ shãng yãagani a yuu shɔngɓe yii azɔng ye a yii yuu ni yii ɓi shɔng yato ɓolongɓo ɓɔɔ shɔngɓe yii sɛng shɔng gãasiyi ɓe, ¹⁰ "Shↄngzeng ziti yii waa jaaka Laa yii gɔ̃ↄre Laa-goro ɓi shɔng Farisi goro ɓↄↄ tɔti ɓi shↄng teni saka vi tipi. ¹¹ Shↄng Farisi yupa a gɔ̃ↄre Laa aru viɓemiyi aru wu yuu, 'Laa, N dↄↄre mↄ ye aruviya N ɓa ana shↄng gãasiyi ɓa-shↄngɓↄↄyi, shↄngɓe yii ɓa shɔng yato ɓolongɓo ɓa, shↄng kɔngyi-kɔ ana shɔng teni saka vi tipi ɓemi ɓa. ¹² N zii yãa ɓee diki ziti a diki nawa tati ɓeweya. N aa goro a titi kopi ɓe N kpaa ɓe walikang. ¹³ Shↄng teni saka vi tipi ɓi, yupa a shii fefe, a de peng nung ɓa ni paa ɓa, a nung wu dangn, a shãngni, 'Laa, tãng nugn kɔ̃ngni, N shɔng ruvĩni.' ¹⁴ N gãale nↄ ni, shↄngɓemi waa wu yee a kpengni ɓa ana shↄng goro waa ɓa, aruviya shↄngɓe na toose yuu ye shↄng lɔɔre wu yuu ni dii, shↄngɓe na sɔɔ roore wu yuu ye shↄng bongse wu” ¹⁵ Shↄngɓↄↄyi yii sing ɛse wu jaa wãrãtiyi aruɓe daa liiyi ɓe, vi leseni wu ko alaɓe wu jaadↄↄyi yii ze ye, yii kɔse yii yãa. ¹⁶ Yeso sɔɔ ɓaa yii yãa, ni, "Yaa wejaa kpatakpa ta yii ɛng bii, nɔ na sɔɔ zãare yii ɓa. Aruviya Laa roonikpanti ɓi yii ɓe ko. ¹⁷ Nungoko N gãale nↄ, shↄngɓeweya na de te Laa roonikpanti ɓa ana wejaayi ɓa daa zenung booni ɓa." ¹⁸ Shↄng ladong ɓɔɔ yɛ̃ɛ wu, ni, "Shɔngmantenivi tɔ̃ↄving, ɓi vi N daa pele N kpaa surubi ɓe daa sɔ̃ɔ yãa ɓa viya?" ¹⁹ Yeso gãale wu ni, "Aru vi mɔng ɓang ni shɔng tɔ̃ↄving viya? Shↄngɓɔɔ ɓa tɔ̃ↄving ɓa naɓa Laa ko shee ɓa. ²⁰ Mↄ ze rudaniyi ye, mↄ na pele kↄng ɓa, mↄ na nung shↄng vↄↄ ɓa, mɔ na ɓɔɔ ɓa, mↄ na shãng viɓe ɓa ananko ɓa, mↄ aa mɔ daa ɓɔɔ naa bɔrɔ a bii." ²¹ Shɔng ladong ɓi shãngni, "Viɓemiyi walikãng N dũngyi ye viɓe yii labe N dong jesang ɓe." ²² Alaɓe Yeso tãa ye ɓe, A gãale wu ni, “vi goro yaase mↄ. "Daa wɔ̃ng kɔtɔ ɓatata mↄ maale mↄ vi naa walikãng mↄ sɔɔ daake shↄngrangyi, mↄng sɔɔ kpaa vivɔ̃sɛni a vusu koolapa-mↄ sɔɔ ɛke, mↄ dũng.” ²³ Vi leseni wu ko alaɓe shɔng ladong ɓi tãa viɓemiyi ye, wu yato lese vĩnivĩvĩ, aruviya wu vi naa ani vɛ̃ɛni. ²⁴ Alaɓe Yeso, mile wu ye a shãng ni, "Kpãa kↄtɔ shↄngɓe yii vinaa ani yii ɓoo roonikpanti ɓee Laaǃ ²⁵ Aruviya ing kpãa ɓa gbangkurumi wu ɓoo nung jeleng ɓa, anaɓe ing kpãa shɔng vinaa wu ɓoo roonikpanti ɓee Laa.” ²⁶ Shↄngɓe yii tãa vĩmi yii shãngni, "Na ananko ɓi we daa kpeng weya?" ²⁷ Yeso kose yii ni, viɓe kpãa shↄngzengyi kɔtɔ daa kpãa Laa ɓa.” ²⁸ Bituru shãngni, "Hãmi, wo yaa viɓe ɓi wo ɓe ye walikãng wo sɔɔ dũng mↄ ye." ²⁹ Yeso sɔɔ gãale yii ni, "Nungoko, N gãale nɔ shↄngɓↄↄ ɓa goro ɓe yaa yee, kɔ soo, kɔ zũngɓiyi, kɔ yejaayi, kɔ jaayi, aru roonikpanti ɓee Laa, ³⁰ ɓe daa kpaa ɓa vɛ̃ɛni viɓe jãa ɓemi a la ɓemi ɓa, ɓɔɔ tɔti saa ɓe yii daa ɛ, surubi ɓe daa sɔ̃ↄ yãa ɓa." ³¹ A tũmpu ɓe muse kop atu ziti ɓemiyi ye a wu bii, a gãale yii ni, "Zepĩn, wↄng waa hãmi paa Urushelima, aruɓe viɓe shɔngzeniyi yii binke a yuu Jaa Shↄngzeng daa watĩng ke walikang ɓe. ³² Aruviya shↄng aa wu a shɔngɓe yide ze Laa ɓa naa, ying sɔɔ baase wu, yii sɔɔ pele wu viyusɛ, yii tule wu sãari a bii. ³³ A tũmpu ɓe yii nung wu ye ɓe, ying nung wu vↄɔ, wu sɔɔ yupa tɔti a tũmpu diki tati.” ³⁴ Yii de too viɓɔɔ ɓa ko goro ɓa, ruu ɓemi sɔɔ vɔ̃ɔ a yii bii, yii de sɔɔ too viɓe shɔng shãngke ɓa. ³⁵ Watĩng ke alaɓe, Yesↄ kpaa ye maan ni Yariko, shↄng nungbãati ɓɔɔ wɔ̃ng a yãa dɔ̃rↄng ing gɔ̃ↄre vi, ³⁶ a tãa mↄↄ yii de tuukeni a wu kaa bii, a yɛ̃ɛ ke ɓivi ing watĩng viya. ³⁷ Yii gãale wu ni, Yeso shɔng Nazara ing tuuke. ³⁸ Arugoko shↄng nungbãati kaa yãa ni kaaka, ni, “Yeso, Jaa Dawuda, tãng nugn kↄngni ta”. ³⁹ Shↄngɓe yii sing kn a tĩng yii kɔse wu yãa ni wu zĩng yãa ta. A bɛ̃ɛ a nung a sɔɔ kaa yãa tɔti ni kaaka, “Jaa Dawuda, tãng nugn kↄngni ta.” ⁴⁰ Yeso shii kirikirik a sɔɔ kɔ yãa ni shↄng ɛse wu ta a wu bii. Alaɓe shↄng nungbãati kpaaye maani, Yeso yɛ̃ɛ wu ni, ⁴¹ "Mↄ kase N pele mↄ viya? A gãale wu ni, "Daayere, N kase N ze mɔng!” ⁴² Yeso gãale wu ni, "Kpaa mɔng zeni ta. Mↄ shĩngnign gante mↄ ye." ⁴³ Ɓanijangɓaseniɓa kpaa mɔng zeni a sɔɔ dung wu ke, de dↄↄ Laa ni. Alaɓe shↄngzengyi walikãng, yii ze vimi ye, yii aa Laa bongni.