¹ Yeso gãale wu jaadↄↄyi tɔti, “Shↄng vi yee ɓↄↄ wu shɔng gaani wu vina ani, shↄng gãale wu ni shɔng gaani vina ɓemi de lese wu vina ni. ² Arugoko shɔng vina ɓi ɓaa wu yãa a sɔɔ gãale wu ni, 'Ɓi vi N tãa a mɔ yuu viya? Gãaseng dɔɔ viɓe mↄng gaa ta, aruviya mɔng watĩng ɓa ni N gaani vi ɓa.' ³ Shɔng gãani vi ɓi shãngshe wu yuu ni,” “N daa pele nukoviya, aɓe yubɔrɔ de teng shoni gaani vini? N kaaka gbãani tipi tↄɓa, N sɔɔ tãa yusɛ̃ɛ gɔ̃reni vi kɔtɔ. ⁴ N ze viiɓe N daa pele ye, aruɓe alaɓe shɔng na zɔ̃ng ye a shoni gaani vi, shↄngzengyi yii daa teng a yii yee ɓe.' ⁵ Alaɓi ko shɔng gaani vi ɓi ɓaa wu yubɔrɔ wu shↄngɓe ing dũng yi kↄpↄyi ɓe, a yɛ̃ɛ shɔng shɔɔni ni, 'N yubɔrɔ N dũng mↄ dɛ̃ɛ ya? ⁶ "A shang ni, baka nung olivi la maani.' "A gãale wu ni, "Too mↄ vi bini ta, wɔ̃ng ta ɓani jang ɓaseni, mɔ binke la ziti ɓↄↄ kop.' ⁷ "Shɔng gaani vi ɓi sↄↄ gãale shɔngɓↄↄ tɔti ni, 'Shɔng dũng mↄ dɛ̃ɛ ya? "A shãng ni, waa vi maani la maani.' A gãale wu ni, too mɔ vi bini ta, mↄ binke la dɛ̃ɛro.' ⁸ Yubɔrɔ ɓi dↄↄ shɔng gaani vi ɓe wu ɓa shɔng yato bɔlɔngbɔ ɓami aruviya taase wu dɔɔ kpɛ̃ni. Aruviya wejaa kodangayi yii kpɛ̃ɛ a yii dɔɔ knni ni yii shɔng bii yii a jãa jaa zeniyi. ⁹ N gãle nↄ ni, nɔ pele wesangyi ta ni kaa vina ɓe ɓa ɓe wɔ̃ngni yato bɔlɔngbɔ ɓa aruɓe alaɓe na sɔ̃ɔ yãa yee, yii daa te mɔ a yii yee wɔ̃ngni ɓe daa sɔɔyãa ɓa. ¹⁰ shↄngɓe wu na shɔng shĩngni gn a yuu vi tↄↄkↄlɔng, ing wɔ̃ng kɔtɔ shɔng shĩngni gn a vi bɔrↄ, shↄngɓe wu na ɓa shɔng yato bolongbo a yuu vii tↄkɔlɔng ɓa, da wɔ̃ng ɓa shɔng yato bolongbo a vii bɔrↄ ɓa. ¹¹ mↄ na ɓa shɔng shĩngni gn amɔng shoni ni vii naa ɓe ɓa tɔ̃ɔving ɓa, ɓiwe daa aa mɔ vii naa ɓe nungoko we ya. ¹² mↄ na ɓa shɔng shĩngni gn amↄng shoni ni shↄngɓɔɔ vii naa ɓaa, ɓiwe daa amↄ mɔ saka yuu we ya? ¹³ Jaashoni ɓɔɔ daa dũng yubɔrɔyi ziti ɓa, kↄ wu bɛ̃ɛ goro wu sɔɔ kase goro, na wɔ̃ng ye ananko ing aa yuu a goro bii wu sɔɔ ɓɛ̃ɛ goro ɓↄↄ. Mↄ daa zenung dũngni Laa ɓa ɓɔɔ vi naa ɓa." ¹⁴ Hãmi shɔng Farisiyi, ɓe yii kase saka; yii tãa rumiyi walikãng, a sɔɔ riise wu shↄng vii wureni, ¹⁵ A gãale yii ni, “Nↄ taase nↄ yuu bolongbo a shↄngzengyi watĩng, Laa sɔɔ ze nↄ sĩngsĩngyi ye. Viɓe shↄng bongse a shɔngzengyi watĩng, ɓa ananko ɓa a Laa watĩng. ¹⁶ Rudani ɓɔɔ bini shↄngzeniyi sii dɔng ɓatata a waa laɓe Yɔhana ɛ. Viɓe yii lawa a ɛ hãmi, shɔng waa polo ruu ɓe Laa roonikpanti ye, shɔng walikãng yii bee ke yii boose yuu a vusu. ¹⁷ Vi leseni wu ko de kpãa ɓa lapa ɓↄↄ koodanga yii tuuke ɓa ɓe dãani labini rudani wu rii vi nanka ɓa. ¹⁸ Shↄngɓe weya na daa wu sooye naa ye sↄↄ yɛ̃ɛ ɓↄↄ ye pele kↄng ye, shↄngɓe na sɔɔ yɛ̃ɛ sooye ɓe shɔng daa wu na ye pele kↄng ye. ¹⁹ Hãmi shↄng vi naa ɓↄↄ ani ɓe tuuse fara bii yiri ɓɔɔ lini fara puru sɔɔ tãa wu tɔↄving vi naa dikidi. ²⁰ Shↄng naa gɔ̃ↄreni ɓↄↄ ani ɓe shɔng ɓaa wu ni Lazaru ɓe wɔ̃ng a wu yɔ̃rↄng yee, wu bii riisi ko walikãng, ²¹ sɔɔ gaa ke wu shaa viɓe daa lɔɔ a shɔng vi naa ɓi yuu teburu. Kɔ zaayi yii ɛke yii bale wu riisiyi. ²² Watĩng ke alaɓe shↄng naa gɔ̃ↄreni mi vↄɔye, shɔng shoni too wu a waare wu Ibirayi kaabi. Shↄng vii naa ɓi sɔɔ vↄↄ jↄ shↄng sɔɔ gbãa wu ke, ²³ a vusu Hadisi, wu a titi kpãareni, a too nung ning lapa a ze Ibirayi fefe ɓɔɔ Lazaru a wu kaabi, ²⁴ A kaa yãa ni kaaka a shãng ni, 'Daa Ibirayi, tãng nugn kɔ̃ngni ta mↄ shↄng Lazaru, aruɓe daa lungse wu jenaa a vusu mɛɛ wu zãngkeng lɛtɛ, aruviya N a vusu kpãareni a lɛtɛ yaa.' ²⁵ Vi leseni wu ko Ibirayi gãale wu ni, 'Wejaa, ye nugn ta alaɓe mↄ wɔ̃ng a koodanga mↄ kpaa vi tɔ̃ↄvingyi, Lazaru bibi kpaa vĩnivĩvĩ viyi. Hãmi shɔng maase wu sĩngsĩng ye a mɔng, mↄ bibi mↄ jɔ a vusu kpãareni. ²⁶ Ko ɓa aru ɓeng ko ɓa, shↄng shĩng borongbo vi vaaseni ɓɔↄ kɔtɔ a wo titi, aruɓe shↄngɓe na kase ke wu tuuke wu waa mɔ kaabi daa zenung ɓa, shɔngɓɔɔ tɔti ɓa ɓe daa zenung tuukeni a mɔ kaa bii wu ɛ wo bii ɓa.' ²⁷ "Shɔng vi naa ɓi shãngni, ' N gɔ̃ↄre mɔ Daa Ibirayi, ni mɔ shong wu a maadaa yee- ²⁸ Aruviya mazũngyi ani maani-aruɓe daa waa kɔse yii yãa, aruɓe yii daa kpaa ɛni mɔng kpãareni ɓemi ɓa.' ²⁹ Vi leseni wu ko Ibirayi gãale wu ni, 'Yii Musa ɓↄↄ shↄngzeniyi ani; yii wa tãa yii ruu ta.' ³⁰ Shↄng vi naa ɓi sↄↄ riise wu ni, 'Ɓa, Daa Ibirayi, shↄngɓↄↄ na daa wa yii bii kɔtɔ ɓe yupa a yusa, ying yaa yii ruvĩni kↄtↄ.' ³¹ Vi leseni wu ko Ibirayi gãale wu ni, 'Yina daa tãa Musa ɓɔɔ shɔngzeniyi ɓa, kɔ shↄngɓↄↄ yupa kↄtↄ a yusa ying tãa wu ɓa.