¹ Hãmi shↄng teni saka vii tipiyi ɓↄↄ shↄng ruvĩniyi yii de ɛ Yeso bii ni walikãng aru yii tãa wu. ² Shↄng Farisiyi ɓↄↄ shↄng labiniyi yii wɔ̃me yãa a yii nung, a shãng ni, "Shↄngveeye ɓemi N te shↄng ruvĩniyi, ang sɔɔ shaa vishãng ni yii ni." ³ Yeso shãngshe yii yãagãni ɓemi, a shãng ni, ⁴ "Ɓi we goro a nↄ titi mi, wu mɛrɛ naa ani la maani goro na sɔɔ rĩng ye a yii titi, daa yaa la dɛ̃ɜro ɓɔɔ kop atu nuko bɛ̃ɛgorong ɓa a jĩngti, wu sɔɔ waa bɛɛ goro ɓe rĩng ɓemi wu waa laɓe daa kpaa ɓa ya? ⁵ Alaɓe na kpaa wu ye, ing yaake wu a dongdong bala wu sɔɔ pele puru yato. ⁶ Alaɓe na ɛ yee ye, ing ɓaa wu wesangyi ɓɔɔ wu shɔng yãakasi yee yii yãa mungoro, wu gãale yii ni, 'Pele puru yato ta ni mini, aruviya N kpaa mɛrɛ ɓe sii rĩng ye.' ⁷ N gãale nↄ ni, shɔng pele puru yato kɔtɔ a koolapa a yuu shↄng ruvĩni goro ɓe yaa peleni ruvĩniyi, wu jãa shɔngzeng la dɛ̃ɛro ɓↄↄ kop atu nawa dɛ̃ɛro ɓe yii de ze ɓa likɔtɔ shɔng yaa ruvĩni ɓa. ⁸ Kɔ ɓi sooye ɓewe ɓe wu kɔpɔ siliva ani kop, wu kɔpɔ goro nang rĩng kɔtɔ, daa ɓeng yaa ɓa, wu koo mɔng, wu sɔɔ bee ni sĩngsĩng goro wu waa laɓe daa kpaa ɓa viya. ⁹ Alaɓe na kpaa ye, ing ɓaa wu wesangyi ɓɔɔ wu shɔng yãakasi yee yii yãa mungoro, wu shãng ni, 'Pele puru yato ta ni mini, aruviya N kpaa kɔpɔ ɓe si rĩng ɓe ye.' , ¹⁰ Ananko, N gãale nɔ, puru yato ani a Laa shɔngshoniyi watĩng a yuu shↄng ruvĩni goro ɓe yaa peleni ruvĩni.” ¹¹ Alaɓini Yeso shãngni, “Shɔngveeye ɓↄↄ ani wu jaayi ziti, ¹² Jaa wodot ɓi gãale yeɓi ni, 'Daa. ang vina ɓe wɔ̃ngye ing maa tikiki.' Arugoko sɔɔ vaaseyi wu vina a yii nung. ¹³ Diki de waa ɓa vɛ̃ɛni a tũmpu ɓi ɓa, wu jaa wodot muse wu vina walikãng mɔng goro a waa koo ɓↄↄ fefe, amↄng ɓi ko rĩngse wu vina walikãng a wɔ̃ngni wureni. ¹⁴ Hãmi alaɓe rĩngse vina ye walikãng, nanka wɔ̃ko luu koo amɔng ɓewe ya walikãng, a sɔɔ gaa beeni vi. ¹⁵ A waa a sɔɔ kpɛ̃ɛ wu yuu a shↄng tipi ɓi goro ɓɔɔ bii a tipi ɓini, aɓe sɔɔ shong wu a jĩngti wu aa wu yãagbãlayi vishãng. 16 ¹⁶ A bee ke wu shaa gãasi vishãng ɓe yãagbãlayi yaale aruviya shↄngɓɔɔ ɓa goro ɓe daa aa wu vishãng ɓa. ¹⁷ Alaɓe jaa wodot ɓi lere ye a sĩngsĩng tɔ̃ɔving, a shãngni, 'Maada wu jaashoni kpɛ̃ɛni yii dɛ̃ɛ yãa ɓe yii bubula ani vɛ̃ɛni we ya, miko amɔng ɓemi, N de vɔɔni ni wɔ̃ko. ¹⁸ N yupa kↄtɔ N yaa mↄng ɓemi N wa maada bii, N sɔɔ gãale wu ni, "Daa, N pele ruvĩni ye a koolapa ɓɔɔ mɔ bii. ¹⁹ N de tise nung ɓa shɔng ɓang ni mↄ jaa ɓa; shĩng ta N wɔ̃ng ana goro a mↄ titi jaashoni kpɛ̃ɛni.'" ²⁰ Arugoko jaa wodot ɓi yupa a daa mɔng ɓi a ɛ yeɓi kaa bii. Alaɓe wu dong a dɔ̃rↄng fefe. yeɓi ze wu a sɔɔ kɔng nugn a wu yuu a waa kɔ̃ɔ wu a sɔɔ dɔɔle wu ni yãa. ²¹ Jaa ɓi gãale wu ni, 'Daa, N pele koolapa ruvĩni ye ɓɔɔ mↄ bibi, N de tise nung tↄ ɓa mↄ ɓang ni mↄ jaa ɓa.' ²² Yeɓi gãale wu jaashoni, 'Nↄ ɛse farabi tɔ̃ɔving ta labũng labũng, nɔ tuse wu a bii, nɔ sɔɔ ɓoose wu vi jena, ɓɔɔ kodↄↄyi a wu dɔɔ. ²³ Nↄ sↄↄ ɛse jaa napo ɓe nↄↄ kↄtↄ ɓe nↄ nung wu vɔɔ. Wo shaa vishãng wo sɔɔ tɔ̃ↄre bii. ²⁴ Aruviya N jaa sii vↄɔ ye, wu hãmi ni surubi ni. Sii rĩng ye, wu hãmi wo kpaa wu ye.' Alaɓini yii sↄↄ gaa bii tɔ̃ↄreni. ²⁵ "Hãmi zũng ɓi bɔrɔ wu sii a gaa a jĩngti. Alaɓe kpaa ye maani ni yee, a tãa tãngni soo ɓɔɔ yãani sãng. ²⁶ A ɓaa jaashoni ɓↄↄ goro yãa a yɛ̃ɛ wu ni vimi daa wɔ̃ng viya. ²⁷ Jaashoni ɓi gãale wu ni, 'Zũngwa ɛ yee ye yaara sɔɔ ye jaa napo ɓe nɔɔ vɛ̃ɛni aruviya te wu ye ɓatata yuu yɔreni ɓa. ²⁸ Zũngɓi bɔrɔ lese yato kiti a sɔɔ bɛ̃ɛ booni yee, yeɓi sɔɔ ke gaa a pute wu. ²⁹ Wu jaa pãnti sɔɔ kase yeɓi ni, 'Zepĩn, saa waa ye bololo a mↄng ɓe N rii jaashɔni aru mɔni, N de daa mↄ kɔseni yãa ɓa a la ɓɔɔ ɓa, ni ɓemi walkãng mↄ de ang jejaa ɓa dɔɔ goro aruɓe N daa tɔ̃ↄre bii ni ing wesangyi ɓa. ³⁰ Vi leseni wu ko alaɓe mɔ jaa ɛ ye, shↄngɓe lesɛ mↄ vina a waa rĩngse ni sooye kɔngyi, mↄ yere wu jaa napo ɓe nↄɔke vɛ̃ɛni.' ³¹ "Yeɓi gãale wu ni, 'Wejaa, mɔ ni mini dikidi, viɓe ɓing maa walikãng ɓi mↄ ɓe ko. ³² Likɔtɔ ɓatata wo tɔ̃ↄre bii wo pele puru yato, aruviya zũngwa sii vↄↄ ye, wu hãmi ni surubii ni; sii rĩng ye, shↄng kpaa wu ye hãmi.