¹ Alaɓini, alaɓe shɔngzengyi labong-labong yii muse ye a yãawee ɓe shĩng ke yii nale we ni dɔɔ, a gaa shãngsheni wu jaadɔɔyi shɔni ni, “Nɔ kɔɔ bii aru yisiti shɔng Farisayi, ɓe wu ko lakeni shɔng. ² Viɓɔɔ ɓa goro a kukeni ɓe shɔng daa kese ɓa a gaa gbang ɓa, viɓɔɔ ɓa tɔti a vɔ̃seni ɓe shɔng daa ze ɓa gbang ɓa ɓe. ³ Viɓe nɔ na shãng ye a tĩngri shɔng tãa a mɔng ɓenkeni, viɓe nɔ na sɔɔ ɓɔse ye a shoo a vusu jaaka shɔng shãng a yuu sɔng jaakayi. ⁴ N shãngshe nɔ, maasangyi, nɔ na zaa shɔngɓe ying nung gigiri bii ɓa, ɓe a tũmpu ɓini ying zenung peleni viɓɔɔ ɓa. ⁵ N gɔ̃ɔ nɔ yuu shoo aru shɔngɓe nɔ daa zaa ɓe. Nɔ zaa shɔng goro ɓe, a tũmpu ɓe na nung shɔng vɔɔ ye, wu kaaka naa ani wu sɔɔ loke nɔ a vusu yeeyaa. Ananko, N gãale nɔ ni, nɔ zaa wu. ⁶ Ɓa jileng maani shɔng maale a yuu kɔpɔ ziti ɓaya? Ni ɓemi walikang kɔ goro shɔng suke gn ɓa aru yini a Laa kaa bii ɓa. ⁷ Kɔ nɔ sisi yuu walikãng shɔng gãa kɔtɔ. Nɔ na zaa vɔɔ ɓa. Nɔ jãa jilengyi kɔtɔ. ⁸ N gãale nɔ, shɔngɓe na shãng N ruu bii ye a shɔng watĩng, Jaa Shɔngzeng ing shãng wu ruubi jɔ a Laa shɔngshoniyi watĩng, ⁹ vi leseni wu ko shɔng ɓe na ɓɛ̃ng ye a shɔngzengyi watiing N ɓɛ̃ɛ wu jɔ a Laa shɔngshoniyi watĩng. ¹⁰ Shɔngɓe na shãng ruu nanka ye a Jaa Shɔnzeng yuu shɔng yaase wu ruvĩni kɔtɔ, vi leseni wu ko shɔngɓe na sɔɔ shãng rubong ye a Suru Tɔ̃ɔving yuu, shɔng yaase wu ruvĩni ɓa. ¹¹ Alaɓe yii na ɛse nɔ ye a mɔng gɔ̃ɔreni, a shɔng tipi yii, ɓɔɔ shɔng kaaka naa yii watĩng, Nɔ na yɔɔre yuu ɓa aru viɓe nɔ daa shãng aru nɔ raani yuu ɓa, kɔ viɓe nɔ daa shãng ɓe, ¹² aruviya Suru tɔ̃ɔving ing mante nɔ a la ɓini viɓe nɔ daa shãng ɓe." ¹³ Amɔni shɔng goro ɓɔɔ a titi mɔɔ ɓi gãale wu ni, “Shɔng Manteni vi, gãale mazũng ta wu vaase vi vɔɔ ni mini.” ¹⁴ Yeso gãale shɔngveeye ɓi ni, “Shɔngveeye, ɓi we shĩng shɔng ɓooreni yoori kɔ shɔng ɓooni shɔng titi a nɔ yuu weya?” ¹⁵ A gãale yii ni, “Nɔ kɔɔ yuu aru kaseni vi koodanga, Aruviya shɔngzeng wu surubi wɔ̃ng ɓa a yuu toleni vi yee vɛ̃ɛni ɓa.” ¹⁶ Yeso gãaleyii yãagani, a shãng ni, “Shɔng vi yee ɓɔɔ vi kulu tɛ̃ɛnung vɛ̃ɛni, ¹⁷ a lere a wu sĩngsĩng, a shãng ni, "N daa pele viya, aruviya mɔngɓe N daa toole N vishãng ani ɓa?' ¹⁸ A shãng ni, 'Ɓemi ɓi viɓe ing daa pele ɓe. N wɔ̃ngkeng ɓooyi ing sɔɔ maa bɔrɔbɔyi, amɔngɓi ko N tooleng nɛrɛng vi ɓɔɔ gãasi vi tɔ̃ɔvingyi walikãng. ¹⁹ N sɔɔ gãale N suru ni, 'Suru, mɔ vishãng ani vɛ̃ɛni ɓe N toole mɔ ɓee saa ɓololo. Wɔ̃ke ta ɓatata, shaata, ɓoo ta, mɔ tɔ̃ɔre bii."' ²⁰ Vi leseni wu ko Laa gãale wu ni, 'Shɔng vi wureni, zii ɓemi shɔng too mɔ suru kɔtɔ, viɓe mɔ sɔɔ gonte ɓemi daa wɔ̃ng we ɓe weya?' ²¹ Ɓemi ɓi viɓe shɔngɓɔɔ daa wɔ̃ng ɓe na toole kaa vɔ̃seni ye aru wu yuu wu ɓa shɔng vinaa a Laa kaa bii ɓa.” ²² Yeso gãale wu jaadɔɔyi ni, “Arugoko N gãale nɔ, nɔ na yɔre yuu ɓa aru nɔ surubi, aru viɓe nɔ daa shaa. Kɔ aru nɔ bii, viɓe nɔ daa tuse, ²³ Aruviya surubi jãa vishãng kɔtɔ, bii sɔɔ jãa farayi kɔtɔ. ²⁴ Nɔ lereta a yuu gãagãayi, yii ruu vi ɓa kɔ yii gbãa vi ɓa. Yii jaaka tooleni ɓa kɔ ɓoo ɓa, ɓi Laa shaare yii. Nɔ de jãa jenungyi ɓa fefe ɓayaǃ ²⁵ Ɓi we a nɔ titi mi a wu yuu yɔreni daa pãng diki goro kɔtɔ a wu wɔ̃ngni koodanga we ya? ²⁶ Nɔ na daa zenung pele ni vii tɔkɔlɔng ɓemi ɓa, aruvi nɔ yɔre yuu aru gãasiyi viya? ²⁷ Lere ta a yuu kɔɔni tɔnkɔrɔng- kaaɓe yii bong ɓe. Yii pele vii shoni ɓa, kɔ yii lɛng ɓa. Ni ɓemi walikãng N gãale nɔ, kɔ kpanti Sulemanu ni wu bongni walikãng de tuse fara ɓa ana goro ɓemiyi ɓa. ²⁸ Laa na daa tuse wusi jĩngti fara kɔtɔ, ɓe wɔ̃ng lami, ɓuru shɔng sɔɔ shoshe a kuru yaa, daa tuse nɔ fara ɓa nukoviya, nɔ shɔng tɔkɔlɔng gn shĩngniǃ ²⁹ Nɔ na bee ɓa viɓe nɔ daa shaa kɔ viɓe nɔ daa ɓoo ɓa, nɔ na sɔɔ yɔre yuu ɓa. ³⁰ Aruviya yãakooyi ɓee koodanga yii bee viɓemiyi ko, nɔ Daa sɔɔ ze ye nɔ kaseyi kɔtɔ. ³¹ Nɔ bee Laa roonikpanti, shɔng sɔɔ pãnse nɔ viɓemiyi. ³² Kpatakpa lava, nɔ na zaa vɔɔ ɓa, aruviya nɔ Daa wu puru yato ani vɛ̃ɛni wu aa nɔ roonikpanti. ³³ Maale nɔ vi yee yita aɔ aa vi jeni. Nɔ gonte nɔ yuu duku saka ɓe daa lese ɓa-kaa vɔ̃seni a koolapayi a mɔngɓe daa lese ɓa, mɔngɓe shɔngɓɔɔ daa ɛ ɓa maani ɓa, ɓɔɔ tɔti shangshang daa lese ɓa. ³⁴ Aruviya mɔngɓe nɔ kaa vɔ̃seni ani ɓe, nɔ sĩngsĩng jɔ amɔng ɓi ko. ³⁵ "Nɔ maa dii gbayi nɔ sɔɔ yaa nɔ yaa ɓengni, ³⁶ Nɔ wɔ̃ng ana shɔngzeng ɓe ying gaa yii yubɔrɔ alaɓe na zuse ye amɔng bitɔ̃reni gbaare, aruɓe na ɛ ye sɔɔ nung yɔ̃rɔng ye, ɓani jang ɓaseni ɓa yii daa pure wu yɔ̃rɔng. ³⁷ Zuuku ɓi jaa shoniyi ɓe yii yubɔrɔ na ɛ ye ing kpaa yii nung gangti. Nungoko N gãale nɔ, ni wu ing maadii wu aa yii vishãng alaɓe wɔngse yii ye a tipi a yuu teburu, wu sɔɔ ɛ wu aa yii vishãng. ³⁸ Alaɓe yubɔrɔ na ɛ ye a la gaani ɓe ziti ni zii, kɔɔ a la gaani ɓe tati, na kpaa yii ye a gn shĩngni, zuuku ɓi jaashoniɓiyi ɓe ko. ³⁹ Nɔ too vimi, na yubɔrɔ yee ze labe shɔngɓɔɔ daa ɛ wu yee ye, na yaa wu yee ɓa shɔngɓɔɔ wu wɔ̃nke wu ɓɔɔ ɓa. ⁴⁰ Nɔ bibi nɔ wɔ̃ng ni gn shĩngni aruviya nɔ de ze laɓe Jaa Shɔngzeng daa ɛ ɓa." ⁴¹ Bituru shãng ni, "Daayere, mɔng shãng yãagani ɓemi ni wo ko shee ya, kɔ ni shɔng walikãng?" ⁴² Daayere shãng ni, “Ɓi we shɔng shii nign ɓɔɔ kpɛ̃ɛni shɔng kɔɔni vi ɓe wu yere shĩng wu a gãasi jaashoni yuu wu aa yii vishãng a la ɓatata weya? ⁴³ Zuuku ɓi jaashoni ɓe wu yere na ɛ ye ing kpaa wu de pele viɓe shɔng shĩng wu ni. ⁴⁴ Nungoko N gãale nɔ ni ing shĩng wu a wu yuu vi yee walikãng. ⁴⁵ Vi leseni wuko Jaashoni ɓemi na shãng ye a wu sĩngsĩng ni, 'N yere shilɛ wu zuseni ye,' sɔɔ gaa nungni jaashoni veeyi ni sooye ni ye sɔɔ watĩng ye ni shaani ɓɔɔ ɓooni vi sɔɔ pele wu ye a yuu, ⁴⁶ jaashoni ɓemi wu yere ing ɛ a diki ɓe ɓani wu zeni ɓa ɓɔɔ la ɓe de ze ɓa ing zĩngle wu kpatakpa ing sɔɔ shĩng wu mɔng goro ni shɔngɓe yii shĩng gn ɓa. ⁴⁷ Jaashoni ɓemi, aɓe ze wu yere vi kaseni ye na de sɔɔ gonte mɔng ɓa kɔ pele anaɓe kase ɓa, shɔng nung wuni naa vɛ̃ɛni. ⁴⁸ Shɔngɓe na de ze ɓa sɔɔ pele viɓe waa nungni ye, shɔng nung wu pota. Shɔngɓe shɔng na aa wu vi vɛ̃ɛni, shɔng bee vi vɛ̃ɛni a wu naa, shɔngɓe shɔng na aa wu vi a naa vɛ̃ɛni, shɔng yɛ̃ɛ wu aru vi vɛ̃ɛni. ⁴⁹ "N ɛ N tɛ̃ɛ yaa a koodanga, na ɓing kaseni yaa ɓi na wuye tɛ̃tɛ̃. ⁵⁰ N batizima ani ɓe ing daa pele shɔng batizima ni ɓe, N yɔre yuu ye vɛ̃ɛni ni na sɔ̃ɔ yãa ye. ⁵¹ A nɔ lereni N ɛ aru N ɛse wɔ̃ngni ɓatata a koodanga ya? Ɓa, N gãale nɔ, viɓe N ɛse wu ko vaaseni yuu. ⁵² Aruviya viɓe yii hãmi a waa tĩng shɔng kpaa shɔngzeng maani a yee goro yii yuu vaaseni-shɔngzeng tati a yuu shɔngzeng ziti, shɔngzeng ziti a yuu shɔngzeng tati. ⁵³ Yii yuu ing vaase, yejaa a yuu jaa ɓɔɔ jaa a yuu yejaa, yĩngti jaa a yuu jaa sooye, ɓɔɔ jaa sooye a yuu yĩngti jaa, shɔngkpeng sooye a wu yuu jaa soo ɓɔɔ jaasoo a yuu kpengɓi." ⁵⁴ Yeso sing shãngshe mɔɔ tɔti ni, "Alaɓe nɔ na ze yãasi ye yupa ni paa, 'Ɓani jang ɓaseni ɓa nɔ shãng ni, "Mɛɛ lapa teni,' sɔɔ watĩng ananko. ⁵⁵ Alaɓe zãasii kaa longbong na de wũngseni, nɔ tɔɔ ni, 'Nɔ shãng ni la ing too yãa kɔtɔ,' sɔɔ watĩng ananko. ⁵⁶ Shɔng yãa jĩngniyi, nɔ zenung ye nɔ shãng keni vi koodanga ɓɔɔ koolapayi, nukovi nɔ de zenung ɓa nɔ shãng viɓe ing watĩng hãmi ɓa viya? ⁵⁷ Aruvi nɔ daa ɓoo yoori viɓe tɔ̃ɔving ɓa ni nɔ yuu ɓa viya? ⁵⁸ Aruviya alaɓe nɔ na waa ye ni nɔ shɔngpong a shɔngbɔrɔ yoori watĩng, a dɔ̃rɔng waani nɔ bee tɔ̃ɔreni ni wuni aruɓe daa gɔ̃ɔke mɔ ɓa a waare mɔ shɔng yoori ɓooreni bii ɓa, aruɓe shɔng yoori ɓooni daa aa mɔ ɓa a yubɔrɔ maani dii, shɔng maani dii wu sɔɔ ɓaa mɔ dɔɔ a gãayãa. ⁵⁹ N gãale mɔ, mɔng ke ɓa naɓa mɔ shoo saka ɓi walikãng ɓa."