¹ Watĩng a diki ɓɔɔ ɓe Yeso sing gɔɔre Laa a mɔng ɓɔɔ. Alaɓe sɔ̃ɔre yãa ye ɓe, goro a wu titi jaadɔɔyi gãale wu ni, “Daayere, mante wo gɔ̃ɔreni Laa ta anaɓe Yɔhana mante wu jaadɔɔyi ɓe” ² Yeso gãale yii ni, “Alaɓe nɔ nang gɔ̃ɔre Laa nɔ shãng ni, "Daa, shɔng wu aa mɔ rĩng bɔrɔ ta wu wɔ̃ng tɔ̃ɔving. Mɔ roonikpanti wu ɛ ta. ³ Mɔ aa wo vishang ɓee dikidi. ⁴ Mɔ yaase wo ruvĩniyi, anaɓe wo yaase shɔngɓe yii pele wo ruvĩni ɓe. Mɔ na waare wo mɔng maaseni ɓa." ⁵ Yeso gãale yii ni, "Ɓi we a nɔ titi ɓe wu wesang ani, ɓe daa waa wu bii ni yuu titi zii a sɔɔ tɔɔ wu ni, 'Masang, kɔ̃seng gbuti bubula pĩn tati, ⁶ N masang ɓɔɔ dong ɛ hami a dɔ̃rɔng, N viɓɔɔ ɓa ani ɓe N daa aa wu ɓa'? ⁷ Hami shɔngɓe wu a vusu kose wu a shãng ni 'Mɔ na yɔ̃reng ɓa. Yɔ̃rɔng jaaka kuuni, N jaayi, yii ni mini, a yuu kɔngsi. N daa zenung ɓa ing yupa ing aa mɔ bubula ɓa.' ⁸ N gãale nɔ, kɔ de yupa ɓa a aa mɔ bubula aru ɓe mɔ ɓi wu wesang ɓa, kɔ aru mɔ vi yũsɛ tiseni yɛ̃ɛni ɓemi, ing yupa kɔtɔ wu aa mɔ gbuti bubula vɛ̃ɛni anaɓe mɔ kase ɓe. ⁹ N sɔɔ gãale nɔ tɔti, gɔɔre ta, shɔng aa mɔ kɔtɔ; bee ta, mɔng kpaa kɔtɔ; nung yɔ̃rɔng jaaka ta, shɔng pure mɔ kɔtɔ. ¹⁰ Aruviya shɔng gɔɔreni te kɔtɔ; ɓɔɔ shɔngbeeni kpaa kɔtɔ; ananko shɔngɓe na nung yɔ̃rɔng jaaka ye shɔng pure wu kɔtɔ. ¹¹ Ɓi yejaa ɓewe a nɔ titimi, wu jaa na gɔɔre jezũng, daa aa wu sɔɔkɔ aru jezũng weya? ¹² Kɔ na gɔ̃ɔre wãnka ye, daa aa wu nɛ̃ng weya? ¹³ Arugoko, nɔ ɓe nɔ shɔng nanka nɔ na zenung ani nɔ jaayi vi tɔ̃ɔving ye, nɔ Daa ɓe wu a koolapa daa aa shɔngɓe yii yɛ̃ɛ wu Suru Tɔ̃ɔving ɓa vɛ̃ɛni aruviya?" ¹⁴ Hami Yeso sing kese vĩnivĩvĩ rãmãang a shɔngɓe shang yãa ɓa bii. Alaɓe vĩnivĩvĩ rãmang ɓi keye ɓe, shɔngveeye ɓe sii shang yãa ɓa ɓemi sɔɔ shang yãa, rise mɔɔ yii vi bii zaani. ¹⁵ Shɔngɓɔɔ yii tɔɔni, "Ni kaaka Baalizabu, yubɔrɔ vĩnivĩvĩ rãmang, ing kese vĩnivĩvĩ rãmangyi." ¹⁶ Shɔngɓɔɔ yii maase wu a sɔɔ bee ke wu taseyi vi taseni a koolapa ¹⁷ Alaɓe Yeso ze yii lereni ye a gãle yii ni, “Roonikpanti ɓe na vaase ye a wu yuu ing wɔ̃ng tɔɓa a yãawe ɓa, yee ɓe na sɔɔ vaase ye a wu yuu ing wete kɔtɔ. ¹⁸ Shelan na vaase wu yuu ye, wu roonikpanti daa shii kɔtɔ ya? Aruviya Nɔ shãngni N kese vĩnivĩvĩ rãmangyi ni Baalizabu, ¹⁹ Nang kese vĩnivĩvĩ rãmangyi ni Baalizabu nɔ shɔng dũngniyi yii kese ɓe ni viya? Aru vimi, ying wɔ̃ng nɔ shɔng ɓooni yooriyi. ²⁰ Nang kese vĩnivĩvĩ rãmangyi ni Laa jenaa, amɔni roonikpanti ɓee Laa ɛ ye a nɔ bii. ²¹ Alaɓe shɔng kaaka na gaa wu yee kpanti ye tɔ̃ɔving, wu vi yee kpeng ye, ²² Alaɓe shɔng kaaka ɓɔɔ jãa wu yãa ye, shɔng kaaka mi na raa wu vii gaani bii ɓe sii shĩng gn ani ye ing sɔɔ ɓung shɔngɓi vi yeeyi. ²³ Shɔngɓe wu na ɓa ni mini ɓa wu ɓing shɔngpong, shɔngɓe na sɔɔ muse viɓa ni mini ɓa saate vi. ²⁴ Alaɓe vĩnivĩvĩ suru na ke ye a shɔngɓɔɔ bii, tuuke a mɔngɓe mɛ̃ɛ ɓa ani ɓa wu sɔɔ bee mɔng ɓe daa wɔ̃ke ɓe. Na de kpaa ɓa, ing shãng ni, 'N zuse N yee ɓe N ke ani ɓe.' ²⁵ Alaɓe zuse ye, a kpaa yeeɓi kooni yiriri shɔng gonte ye ɓatata. ²⁶ Amɔni ing waa ke wu sɔɔ sɛɛ vĩnivĩvĩ rãmang ɓɔɔ yii nawa tati ɓe yii jãa wu kɔtɔ ni nanka yii sɔɔ ɛ ke walikãng a wɔ̃ng a mɔni. Amɔni shɔngɓi wu kpãareni ɓe hami ing jãa ɓee shɔni kɔtɔ.” ²⁷ Watĩng ke, alaɓe shãng viɓemiyi ye, sooye ɓɔɔ too yãa a vusu mɔɔ a gãale wu ni, “Zuuki ɓi jang jaa ɓe yee mɔ ɓe ɓɔɔ ming ɓe mɔ maa ɓe.” ²⁸ Sɔɔ shãng ni, "Vi shãngni wu ko, Zuuku ɓi shɔngɓe yii tãa ruu Laa a sɔɔ yise ke." ²⁹ Alaɓe mɔɔ de shang ni ɓe, Yeso gaa shãngni, "Lakoo ɓemi ɓi nanka lakoo. Ying bee vi taseni, amɔng vi taseni ɓɔɔ ɓa ɓe shɔng daa taseyi ɓa naɓa vi taseni ɓee Yunana ɓa. ³⁰ Aruviya anaɓe Yunana wɔ̃ng vi taseni a shɔng Nenevayi bii, jɔ ananko Jaa Shɔngzeng ing wɔ̃ng vi taseni a shɔng lakoomi bii. ³¹ Sookpanti ɓee lɔngbong ing yupa a diki ɓooni yoori ni shɔngveeyi ɓee lakoomi wu sɔɔ lese yii, aruviya ɛ a yãakati koodanga ɓɔɔ aru wu tãa Sulemanu kpɛ̃ɛni, zepĩn, shɔngɓe jãa Sulemanu wu a mɔmi. ³² Shɔngveeyi ɓe Neneva ying yupa a diki ɓooni yoori ni shɔng lakoomi yii sɔɔ lese yii, aruviya yii daa yii peleni ruvĩini alaɓe Yunana waase yii yãa, zepĩn, shɔngɓe jãa Yunana wu a mɔmi. ³³ Shɔngɓɔɔ ɓa goro, ɓe naa ɓeng yaa ye, daa shĩng a mɔng gĩni kɔ wuu vɔ̃se a dii ɓiti ɓa, shɔng shĩng a la shĩngni yaa, aruɓe shɔngɓe yii naa ɓoo ye yii daa ze ɓenkeni. ³⁴ Mɔ nung wu ko vii zeni bii. Alaɓe mɔ nung na tɔ̃ɔving, bii walikãng ing sɔɔ yini ɓenkeni. Alaɓe mɔ nung na ɓa tɔ̃ɔving ɓa, mɔ bii walikãng ing yini tĩngri. ³⁵ Arugoko, mɔ shĩng nung aruɓe mɔ ɓenkeni daa wɔ̃ng ɓa tĩngri ɓa. ³⁶ Mɔ bii walikãng na yii ye ni ɓenkeni, mɔng ɓɔɔ na ɓa a vusu tĩngri ɓa, alaɓi ko mɔ bii walikãng ing wɔ̃ng anaɓe ɓenkeni na puuse mɔng ye shang a mɔ bii.” ³⁷ Alaɓe sɔ̃ɔre shãngni yãa ye ɓe, shɔng Farisa ɓɔɔ gãale wu ni wu ɛ shaa vishang a wu yee, arugoko Yeso ɓoo a sɔɔ wɔ̃ng. ³⁸ Bii zaa shɔng Farisa ɓi aruɓe Yeso de sɔke naa ɓa shɔni a shaa vishang ɓa. ³⁹ Daayere sɔɔ gãale wuni, “Hami, nɔ shɔng Farisa nɔ sɔke kuku jewa ɓɔɔ piyi, nɔ vusu sĩngsĩng sɔɔ yini raani shɔng vi ɓɔɔ vĩnivĩvĩ. ⁴⁰ Nɔ shɔng vi wureniyiǃ Ɓa shɔngoro ko pele vusu a sɔɔ pele kuku gaa ɓaya? ⁴¹ Nɔ aa viɓe a vusu ana vijeni, alaɓi ko vi walikãng ing wɔ̃ng wɛ̃tɛ̃ngwɛ̃ aru nɔni. ⁴² Nɔ ɓi vi nugn kɔngni shɔng Farisayi, aruviya nɔ kese vi sɔng jaa shiling ɓɔɔ ɓala tĩngri ɓɔɔ gãasi vi guruyi, vi leseni wu ko nɔ bɛ̃ɛ peleni vi nungoko ɓɔɔ kaseni Laa. Likɔtɔ nɔ pele vi nungoko ɓɔɔ kaseni Laa, ɓani ɓɛ̃ni peleni gãasi viyi ɓa. ⁴³ Nɔ ɓi vi nugn kɔngni shɔng Farisayi, aruviya nɔ kase ladong ɓee tĩng a mɔng gɔ̃ɔreniyi ɓɔɔ ani bɔrɔ yãa jini a nungmɔɔyi. ⁴⁴ Nɔ ɓi vi nugn kɔngni, aruviya nɔ ana yusayi ɓe de de ɓa ɓe shɔngzengyi yii kn a yupa ɓani zeni ɓa." ⁴⁵ Goro a titi shɔng zeni rudani gãale wuni, "Shɔng Manteni vi, viɓe mɔ shãng mi lese wo yato ye jɔ." ⁴⁶ Yeso gãale wuni, "Nɔ ɓi vi nugn kɔngni shɔng manteni rudaniyiǃ Aruviya nɔ shĩngshe shɔng kpitikpi a yuu ɓe jãa kaaka tooni kɔtɔ, nɔ bibi nɔ lii kpitikpi vimi ɓa ni nɔ jenaa goro ɓa. ⁴⁷ Nɔ ɓi vi nugn kɔngni, aruviya nɔ gbãa yusa aru shɔngzeniyi, ɓe ɓi yebongwayi ko yii nung yii vɔɔ. ⁴⁸ Arugoko nɔ ɓi shɔng yãa pãngni ɓɔɔ kaseni a yuu vi peleni ɓe yebongwayi yii pele ɓe, aruviya nungoko yii nung yii vɔɔ a sɔɔ gbãare yii yusa. ⁴⁹ Aruvimi ko tɔti, Laa kpɛ̃ɛni shãngni, 'N shongsheyi shɔngzeniyi ɓɔɔ jaarɔɔkeniyi, ying kpãareyi yii sɔɔ nung shɔngɓɔɔyi vɔɔ.' ⁵⁰ Aru vimi, shɔng ɓoore lakoomi yoori aru kpaa shɔngzeni walikãng ɓe yii tɛ̃ɛrɛ alaɓe shɔng loo tung koodanga, ⁵¹ gaa nii Habila kpaa a waa Zakariya kpaa, ɓe shɔng nung wu vɔɔ a dɔɔ lɔng yãa waani ɓɔɔ mɔng gɔ̃ɔreni. Ananko, N gãale nɔ, shɔng yii lakoomi aru viɓe yii pele ɓe. ⁵² Nɔ ɓi vi nugn kɔngni shɔngzeni rudaniyi, aruviya nɔ too vii puni ɓee zeni; nɔ bibi nɔ de ɓoo vusu ɓa ni nɔ yuu ɓa, nɔ sɔɔ zãare shɔngɓe yii kase ɓooni ɓe." ⁵³ Atũmpu ɓe Yeso yaa mɔng ɓi ye, shɔng labiniyi ɓɔɔ shɔng Farisayi yii ɓɛ̃ɛ wu ruu a sɔɔ gongse yãa ni wuni aru vi vɛ̃ɛni, ⁵⁴ a gaa ke yii yii wu ni viɓe daa shãng ɓe.