Vaa 4

1 Yãdɔng ɓɔɔ yuvaseni ke a mɔwe anɔ titi weya? Yide ke ɓa anɔ lereni sĩnsĩng ɓe yii nungbang anɔ nung ɓaya? 2 Nɔ kase ke, nɔ kpaa ɓa. Nɔ nung vɔɔ asɔɔ pele nungkn, nɔ sɔɔ kpaa ɓa. Nɔ nung bang a pele yãdɔng. Nɔ de Kpa ɓa aruviya nɔ de yɛ̃ɛ ɓa. 3 Nɔ yɛ̃ɛ ke nɔ sɔɔ kpaa ɓa aruviya nɔ yɛ̃ɛ a dɔ̃rɔng nangka, aruɓe nɔ da rĩnse a dɔ̃rɔng ɓe de lii ɓa. 4 Nɔ shɔng peleni kɔngǃ Nɔ de zeɓa wosang ni koodanga ni ɓa shɔngɓe de kase Laa ɓa ɓeya? Ananko shɔngɓe na kase wosang ni koodanga risewu yuu ye Laa shɔngpong. 5 Kɔ nɔ tooni labini Laa shãng kɔvɛ̃, "Suru ɓe awo bii ɓi ɓee gn kaani ya"? 6 Aruviya Laa a pãnti vɛ̃ɛni, aru labini tɔni, "Laa wɔ̃ng pong ni shɔng tooseni yuu, asɔɔ a shɔng rooreni yuu pãnti." 7 A yuu ta a Laa. Mɔ bɛ̃ɛ vĩnivĩvĩ, daa yu kɔtɔ a yamɔ. 8 Nɔ eta a Laa bii mani, wu bibi daa sɔɔ e kɔtɔ anɔ bii. Sɔke nɔ naa ta, shɔng ruvĩni yii, nɔsɔɔ rise nɔ sĩngsĩng ɓolongɓo, nɔ shɔng yato ziti yii. 9 Nɔ pele viiki yato, nɔ lese yato, nɔsɔɔ kaa yãvɔǃ Nɔ ya nɔ yãbang wu rii viiki yato nɔsɔɔ ya nɔ puru yato wu rii mɔng tĩnri. 10 Nɔ roore nɔ yuu ta a Daayere bii, wusɔɔ pemɔ ni paa. 11 Nɔna shãng yãa nangka ɓa aru shɔngbɔɔ ɓa, zũngyi. Shɔngɓe na shãng yãa nangka ye aru zũngɓi kɔ ɓoore zũngɓi yoori shãng yãa nangka ye a yuu rudani a sɔɔ ɓoore rudani yoori. Nɔna ɓoore rudani yoori ye, mɔ ɓa shɔng peleni rudani ɓa, ɓi yoori ɓooni. 12 Shɔngzeng goro ɓe shɔng awu rudani ɓɔɔ yoori ɓooni. Ɓi shɔngɓe daa zenung kpenseni wu sɔɔ nung vɔɔ. Mɔko we, ɓe mɔ ɓoore mɔ shɔng yãa kaasi yee yori weya? 13 Weshoo ta hami, shɔngɓe mɔ tɔɔni, "Lam kɔ ɓuru wɔ̃ng wa koo ɓem, wo pele saa a mɔngwa, wo woo kɔ wo male, wo kpaa vii vɛ̃ɛni." 14 Ɓi we ze viɓe daa waating ɓuru ye weya, ɓi vii tɔ mɔ suru viya? Mɔ ɓi viɓe e pota wusɔɔ dase ke. 15 A ɓemi, lii ke mɔ tɔɔni, "Daayere na kaseye, wong wɔ̃ng wo pele vimi ɓɔɔ ɓewa." 16 Hami mɔng gɔɔ yãa aru mɔ yuu tooseni. Mɔ yuu toosenim walikãng ɓi vii nangka. 17 Aruviya shɔngɓe na ze peleni tɔ̃ɔving ye de pele ɓa, ɓi ruvĩni.