¹ Eta hami, Nɔ shɔng viyee, nɔ kaa yãvɔɔ ni yãa lani aru yato viiki ɓeng enɔ bii. ² Nɔ viyee pũngye, nɔ fara zãrang sɔɔ shaye. ³ Nɔ gɔɔli ɓɔɔ siliva lese ye yii leseni ko daa wɔ̃ng yãa ani a nɔ yuu. Ing sha nɔ bii ana yaa. Nɔ tɔle nɔ viina gɓa ye aru diki sɔɔni yãa. ⁴ Ze ta, vidɔɔ yɔni ɓe nɔ zãre shɔng shooni ɓe yi anɔ kulu yide kaani anɔ yuu. Kaani ɓe shɔng kaani vii nagɓa ɓo Daayere shɔngɓe roo koo shoo ye. ⁵ Nɔ wɔngye a yee saka yee tɔ̃ɔre ni bii a koodanga. Nɔ sĩngsĩng bongye aru diki yeeni. ⁶ Nɔ lese asɔɔ nung shɔng tɔ̃ɔving yii vɔɔ. Yide puure nɔ yãa ɓa. ⁷ Sãa lemɓa ta, mazũngyi, wu wa diki Daayere eni. Nɔ ze kaa ɓe shɔng gba lani ga wu vii reni ɓe a kulu ni wɔ̃ngni lemɓa wu ga diki mɛɛ shɔɔni ɓɔɔ mɛɛ yãala. ⁸ Nɔko, nɔ bibi, nɔ na lemɓa. Nɔ maa sĩngsĩng ta aru Daayere Laa eni kpaye. ⁹ Nɔ na wɔ̃mɛ yãa ɓa, mazũngyi, a we yuu ɓa, aruɓe shɔng daa lese nɔ ɓa. Mile pĩ, shɔng yoori ɓooni shii a yɔ̃rɔng. ¹⁰ Shĩng nung ta, mazungyi, aru kpãreni ɓɔɔ lemɓa ɓee shɔng zeni, ɓɔɔ shɔng ɓe yii shãng Daayere rĩng. ¹¹ Mile pĩ, Nɔ ze shɔng ɓe yii maa gn ana shɔng pãnti yii. Nɔ tãa Ayuba maani gn kɔtɔ, nɔ sɔɔ ze viɓe shing ke Daayere pele ye, ana ɓe wu ɓi shɔng taseni nugn kɔngni ɓɔɔ kaseni. ¹² A vii walikãng, mazungyi, nɔ teng ɓa, kɔ ni koolapa ko koodanga kɔ zɔng teni ɓeweya. Vipele ni wuko, nɔ ananko wu wɔ̃ng ananko, nɔ ɓa ananko ɓa wu wɔ̃ng ɓa ananko ɓa. aru ɓe nɔ daa wete ɓa titi shɔng ɓooni yoori ɓa ɓe. ¹³ Shɔng ɓɔɔ anɔ titi ni wu a kpãreni ya? Wu gɔ̃ɔre Laa. Shɔng ɓɔɔ anɔ titi wu a puuru yato ya? wu gbãre Laa. ¹⁴ shɔng vɔɔ anɔ titi ni ya? wu ɓaa yuubɔrɔ Jaaka Laa yii yãa, yii gɔ̃ɔre Laa awu yuu. Yii bɔɔlewu nung a bii ni Daayere ring. ¹⁵ Gɔ̃ɔreni shingni gn daa gangte shɔng vɔɔ kɔtɔ. Daa Laa daa yuse wu paa. Na pele ruvini kɔtɔ, Laa daa yase wu ruvĩni kɔtɔ. ¹⁶ Nɔ shãnshe wee nɔ ruvĩni ta, nɔ sɔɔ gɔ̃ɔre wee Laa aruɓe shɔng daa gante nɔ ɓe. Gɔ̃ɔreni shɔng yato ɓolonɓo kaka ani vɛ̃ɛni. ¹⁷ Iliya ɓi shɔngzeng ana woko. Gɔ̃ɔre ni yato goro ni mɛɛ na sã ɓa, mɛɛ de sã ɓa a tipi ɓa ɓee saa tati ɓɔɔ shele maangoro. ¹⁸ Iliya sɔɔ gɔ̃ɔre ke. Koolapa a ese mɛɛ kiti, koodanga sɔɔ a vishang. ¹⁹ Mazungyi, shɔngɓe na yaa dɔrɔng nungoko ye, shɔngɓɔ na sɔɔrewu ye, ²⁰ shɔngwa wu ze ke ni shɔngɓe na sɔɔre shɔngɓɔ ye a wu ruvĩni ɓe pele ke, kpense wu ye a vɔɔ, sɔɔ kuu ruvĩni ye vɛ̃ɛni.