¹ Ɓa nɔ shɔng walikãng yii rii shɔng manteni ɓa, mazũngyi, aruviya nɔ, zee ye wo shɔngɓe wo mante vii shɔng ɓoore wo yoori vɛ̃ɛni. ² Aruviya wo wote a dɔ̃rong vɛ̃ɛni. Shɔngɓe na de wote ɓa aru wu ruu shãngni ɓa, wu ɓii shɔng tɔ̃ɔving, zenung ye wu yise wu yuu. ³ Hami wona shĩng viye a gbantang yãa aruɓe yida tãwo, wɔng zenung kɔtɔ wo taseyi viɓe yida pele. ⁴ Nɔ zee tɔti aru tuusiyi, yi bɔng kɔtɔ bɔrɔ zãasi sɔɔ riwu, shɔng rayi ting ni vii tɔkɔlɔng wu waa mɔng ɓe shɔng zaani kase ɓe.. ⁵ Jɔ ananko, rɛte ɓi vii tɔkɔlɔng, sɔɔ bɔngse yuu vɛ̃ɛni. Mile pĩ tɔti anaɓe yaa tɔkɔlɔng daa zenung kɔtɔ wu shaare bɔrɔ jĩnti. ⁶ rɛte jɔ yaa ko, koodanga ɓee nangka vipeleni ɓe shɔng shĩng a wo titi shɔng bii. Rɛte lese bii walikãng, shaare viɓe surubi ani ɓe, wu sɔɔ shĩng shɔng a yaa ɓe sɔ̃yãa ɓa. ⁷ Aruviya vii jĩnti ɓeweya, jenung, ɓe yii yɔɔni buru ɓɔɔ vii takeni ɓe yii a mɛɛ shɔngzeng zenung dũni kɔtɔ ni yini. ⁸ Shɔngzeng ɓɔɔ daa zenung gaani rɛte ɓa. Wu ɓi vi nangka ɓe wɔ̃ke ɓa, zĩng awu bii vɛ̃ɛni. ⁹ Ni wuko wo dɔɔ Daayere ɓɔɔ wo Daa, tɔni wuko wo lese shɔngzengyi, ɓe Laa pele yii awu bii ɓe. ¹⁰ A vusu yãa ɓi ko shĩni pãnti ɓɔɔ leseni kee ani. Mazũngyi, viɓen de lii ɓa wu waating ɓa. ¹¹ Toomɛɛ kese mɛɛ tɔ̃ɔving kɔtɔ ni mɛɛ ɓe là kɔtɔ ya? ¹² Mazũngyi, Là sĩnri ye jaa gbee kɔtɔ ya? kɔ là zaare, wu ye sɛ̃ɛri? kɔ mɛɛ tãyeng da kese mɛɛ tɔ̃ɔni kɔtɔ. ¹³ Ɓiwe kpɛ̃ɛ kɔtɔ kɔ ze viye anɔ titi weya? Shɔng ɓi wu tase wu wɔ̃ngni tɔ̃ɔving awu vii peleni a rooni yuu ɓe kpɛ̃ɛni. ¹⁴ Nɔ wɔ̃ngni làni gn kani ɓɔɔ kaseni wɔ̃ngni viɓɔ anɔ sĩngsĩng ni, nɔ na bongse yuu ɓa ni lakeni wee a yuu nungoko ɓa. ¹⁵ 15 Ɓem ɓa kpɛ̃ɛni ɓe lɔɔ a lapa ɓa. Wuko, ɓi vii koodanga, ɓa vii suru ɓa, vĩnivĩni rãmang. ¹⁶ Aruviya a mɔng ɓe lani sĩngsĩng ɓɔɔ kani gn ani, wunteni ani ɓɔɔ manteni ruu nanka walikãng. ¹⁷ Kpɛ̃ɛni ɓe ke a lapa ɓe shooni wuko kpelekpe, wɔ̃ni ɓatata kaseni, rooni yuu, lereni tɔ̃ɔving, taseni nugn kɔngni ɓɔɔ reni tɔ̃ɔving, sengni shɔng ɓa, ɓɔɔ tase nungoko. ¹⁸ Reni vii tɔ̃ɔving shɔng ru a vusu wɔ̃ngni ɓatata a titi shɔngɓe tɔ̃ɔre koo.