¹ Mazũngyi, nɔ na shiiye anɔ gn shini awo Daayere Yeso Kirisi, wo Daayere ɓe bongni, nɔ na tase sɛ̃ni weɓa. ² Nakaɓe shɔngɓɔɔ wu ɓoo nɔ mɔng yuu museni wu tuse vina jenaa ɓee gɔli ɓɔɔ fara ɓe likɔtɔ a bii, ɓɔɔ shɔng rãng na sɔɔ ɓoo nɔ bii ye jɔ ni rĩngte fara bii. ³ Nɔna mile shɔngɓe ɓoo nɔ bii ni fara bii tɔ̃ɔving ye nɔ gãle wu ye, "Wɔ̃ng ta amɔng tɔ̃ɔving," nɔ sɔɔ gãle shɔng rãng ye ni "Shii ta amɔng wa" kɔ "wɔ̃ng ta tipi," ⁴ ɓem ɓa ɓooreni shɔng yoori nɔng tase anɔ titi ɓa ya? Nɔ de wɔ̃ng ɓa hami shɔng ɓooreni shɔng yoori ni nangka lereni ɓa ya? ⁵ Wee shoo ta pĩn, mazũngyi, Laa de rɔɔ shɔng rãng ɓe koodanga mi aru yii rii shɔng vinaa a gn shin yi sɔɔ wɔ̃ng shɔng rooni koo ɓee vaaseni shɔngɓe yi kase wu ɓaya? ⁶ Ing nɔ na ɓɛɛ shɔng rãngyi yeǃ Ɓa shɔng vina ko yi kpãre nɔ ɓaya? Ɓa yiko yi waare nɔ mɔm ɓooreni yoori ɓa ya? ⁷ Ɓa yiko yi dãa tɔ̃ɔving rĩng ɓe shɔng ɓaa yãa aru ni ɓa ya? ⁸ Ing na ananko, nɔ pele walikãng viɓe rudani shãng anaɓe shɔng binke, "Mɔ kase mɔ shɔng kasiye anaa mɔ yuu," nɔ pele ye tɔ̃ɔving. ⁹ Nɔ na sɔ tase shɔngɓɔyi tɔ̃ɔving ye kago, nɔ pele ruvĩni, de tase ɓa nɔ ɓi shɔng pele ni viɓe rudangni zãreke ɓe. ¹⁰ Aru shɔngɓe na dũng rudangni ye walikãng, na sɔɔ wote ye a dɔ̃rɔng goro, wɔ̃ngye shɔng kani rudangniyi walikap. ¹¹ Aru shɔngɓe na shãng ni, "Mɔ na shɔngyee ɓe yii pele kɔng ɓa." asɔɔ shãng, "Nɔ na nung vɔɔ ɓa." Nɔ na de wɔ̃ngɓa shɔngyee ɓee peleni kɔng ɓa, ing mɔna nung vɔɔye, mɔ riiye shɔng ka rudangni ɓe. ¹² Nɔ shãng yãa nɔ sɔɔ pelevi anaa shɔngɓe shɔng daa ɓoore yi yoori ni rudani ɓee kpeni. ¹³ Aruviya ɓooreni yoori e ni gnkɔni ɓang ɓa a shɔngɓe yi tase shɔng gnkɔni ɓa. Gnkɔni tuu vɔ̃ɔ a ɓooni yoori. ¹⁴ Ɓivi kpani ɓoo weya, mazũngyi, shɔngɓɔ na tɔye ni wu gnshĩni ani, wu shooni na ɓa ani ɓa? Wu gnshĩni ɓewa daa kpensewu keya? ¹⁵ Tɔtapĩn, zũngwa kɔ naawaɓɔ ɓoose tãtã fara bii wu vishaani ɓa ani ɓa. ¹⁶ Shɔngɓɔ na sɔɔ tɔɔ yi ye, "Wata ɓatata, shita mɔ sɔɔ kpa vi walikãng." Mɔ na de awu viɓe kase ɓa, ɓi vi kpani ɓewe nɔ kpa weya? ¹⁷ A dɔ̃rɔng goro ko gnshĩni wu yuu kɔvɛ̃ɛ, na ɓa ni vi peleni ɓa, ɓi vɔɔ ni. ¹⁸ Shɔngɓɔ na tɔni, "Mɔ gnshĩni ani, N shongni ani." Taseng mɔ gnshĩni ta ɓa ni vii peleni ɓa, N sɔɔ tase mɔ N gnshĩni ni ing vii pele ni. ¹⁹ Nɔ azɔngye ni Laa goro; nɔ pele vii tɔ̃ɔving ye. Kɔ vĩni-vĩni rãmang yi azɔng ye jɔ, yisɔɔ wote ye. ²⁰ Nɔ kase nɔ ze kɔtɔ ya, shɔng wureni, ni gnshĩni ɓa ni vii peleni ɓa ɓa vii tɔ̃ɔving? ²¹ Shɔng de pele Ibirayi tɔ̃ɔving ɓa aru vii pele ni alaɓe awu jaa Ishaku a lung ani vii ɓaya? ²² Nɔ zeta wu gnshĩni wɔ̃ng kɔtɔ ni wu vi peleni yini, ni wu vii shoni wu gnshĩni wɔ̃ng ɓatata. ²³ Labiini tase sɔ̃ɔniyã a mɔngɓi ko aɓe shãng ni, "Ibirayi azɔng a Laa bii, shɔng sɔɔ ɓa wuni shɔng yato ɓolongɓo," shɔng sɔɔ ɓaa wuni Laa wosang. ²⁴ Nɔ mile ye ni aru vii peleni ko shɔngzeng yi kpa tɔ̃ɔving, ɓa ni gnshĩni ko shee ɓa. ²⁵ A dɔ̃rong goromi ko tɔti, shɔng de sɔke Raahapi soo raani kpa kpeni ni shoniyi alaɓe tee shɔngshoni ɓe asɔɔ shingyi a dɔ̃rɔng ɓɔɔ ɓaya? ²⁶ Anaaɓe bii ɓe suru ɓa ani ɓa ɓi gbiti là, ananko jɔ gnshĩni ɓa ni vii shoni ɓa ɓi vɔɔ.