¹ Yakuubu, shɔng dũngni Laa wo Daayere Yeso Kirisi, yãa kopi tu ziti ɓe yi sate miː N jinɔ yãaǃ ² Nɔ ze ni puru yato walikãng, mazũngyi, alaɓe nɔ na kpaa yuyɔreni ye zɔkɔ-zɔkɔ. ³ Nɔ ze ye nɔ maaseni gn shĩngni ese maani gn. ⁴ Nɔ wɔ̃ng ni gn maani aru ɓe nɔ da bɔngke a sɔɔ wɔ̃ng ɓatata, nɔng kaa rãng viɓɔ ɓa. ⁵ Aruviya shɔngɓe na kase kpɛ̃ɛni, wu yɛ̃ɛ ta Laa bii. Wuko ã shɔng kɔvɛ ɓa ni gɔ̃ɔni shoo shɔngɓe yɛ̃ɛ ɓa, a wu sɔɔ awu ɓa. ⁶ Aruviya wu sɔɔ yɛ̃ɛta ni gn shĩni, ɓa ni lereni awu sĩngĩng ɓa. Aruviya shɔngɓe na lereye wu ana zãsi ɓe wun a yuu waapo ɓe zãsi toore wuni kaɓɔ kaɓɔ ɓe. ⁷ Shɔng wa na lere ɓa ning da kpa viɓɔ kɔtɔ a Daayere bii ɓa; ⁸ na ɓi shɔng yato ziti, ɓe shi ɓa a vii goro ɓa. ⁹ Zũng ɓe wu shɔng rãng wu vãare ni wu borɔ ladong, ¹⁰ shɔng vina jɔ awu tɔkɔlɔng ladong, aruviya ing tuuke anaa reni wisi. ¹¹ Aru lá yupa ni wãni ɓe shaare wisi, wu reni tɛ̃ɛ a tipi, wu lini lesei. A dɔ̃rong goromi ko, shɔng vina ing lese awu titi kĩngni. ¹² Zuuku ɓi shɔng maanign a maaseni. Alaɓe na dase maaseniye ɓe, ing kpa vigini yuu ɓee surubi, ɓe shɔng vaase shɔngɓe yi kase Laa ɓe. ¹³ Shɔngɓɔɔ na tɔɔ ɓa alaɓe shɔng maase wu ye ni, "Ni ɓi Laa maasemi ɓa," aruviya Laa maase shɔng ɓa ni ruu nangka ɓa, kɔ wuni wu yuu wu maase shɔngɓɔ ɓa. ¹⁴ Aruviya shɔng kpa maaseni aru kaseni ruu yato, ɓe too wu a kati asɔɔ ɓoole wu ɓe. ¹⁵ Alaɓe na kase ruu yato ye, sɔɔ yé ruvĩni, alaɓe ruvĩni na bongye ɓe, sɔɔ yé vɔɔni. ¹⁶ Shɔng lake nɔ ɓa, mazũngyi. ¹⁷ Vi ani tɔ̃ɔving ni vi dang walikãng ke a lapa. Loo a Daa bii ɓe ɓenke ke ɓe. Awu bii kɔseni kɔnung susuru ɓe daa sɔɔɓa ɓe. ¹⁸ Laa rɔɔ ke wu yé shɔngzeng ni wu ruu nungoko, aruɓe wo da wɔng wu jaa reni shɔng ting ɓee wu takeni walikãng. ¹⁹ Nɔ ze vimi ye, mazũng ɓe ing kaseɓe yiiː shɔng walikãng yi wɔ̃ng shɔng tãni tɛti, shɔng shãngni ning lereni, ɓa shɔng leseni yato kɔvɛ ɓa. ²⁰ Aruviya leseni yato shɔngzeng ese wani Laa ruu tɔ̃ɔving ɓa. ²¹ Arugoko nɔ daa peleni ruvĩni ɓɔɔ borɔ ruu nangka vi peleni, Ni rooreni yu nɔ te ruu Laa, ɓe da zenung kɔtɔ wu kpengse nɔ surubiyi. ²² Nɔ na wɔ̃ng ɓa shɔng tãni ruu ko she ɓa nɔ wɔng shɔng peleni, nɔ lake nɔ yuu ɓa. ²³ Aru shɔngɓe na wɔ̃ngye shɔng tãni ruu ko shee ɓa shɔng peleni ɓa, shɔngɓi anaa shɔng ɓe na zee wu yuu ye a vi mile ni yuu. ²⁴ Na mile wu yuu ye wu sɔɔ suuke wu wating ɓani ɓaseni jãng ɓa. ²⁵ Aruviya shɔngɓe na mile rudani ɓe ɓatata ɓɔɔ ɓe shĩng shɔng wɔ̃gn ɓani zani vɔɔ ɓami ye, na kn tĩng yeni, na ɓa shɔng tãni ko shee ɓe sɔɔ suuke ɓa, shɔng mi ing wɔ̃ng shɔng kpani zuuku awu dɔɔ kn ni. ²⁶ Shɔngɓe na tɔye wu ɓi shɔng dũngni na de sɔɔ yi wu rete ɓa, lake wu yuu wu dũngni wɔ̃ngye nangka. ²⁷ Dũngni ɓe ɓolongɓo ɓe de lese ɓa a Laa waating ɓɔɔ wo Daa wuko yiseni jeevɔɔ ɓɔɔ soovɔɔ yi naa ayi kpãare ni, ɓɔɔ yini yuu ɓa ni leseni koodanga ɓa.