¹ Hãmi kɔ ɓi yãa maani ɓee tĩng, wu dɔrɔng dũnni ani ɓe mɔng gbãareni koodanga. ² Shɔng gonte tabanaku. Jaka ɓee shɔɔni, ɓi mɔng shini yaa, lateni ani ɓɔɔ bubula amɔni, shɔng ɓani mɔng tɔ̃ɔving. ³ A tumpu fara ginni mɔng ɓee zit, ɓi tɔ jaka ɓɔɔ a tabanaku, shɔng ɓanni bɔrɔ mɔng tɔ̃ɔving. ⁴ Wu lung gɔɔli ɓee tɛ̃ɛni gãasi, a mɔni ɓɔɔ tuusi ɓee maani yãa, shɔng kuke wu kati ni gɔɔli ko kapi. A vusu ɓi tɔti gugu ɓee gɔɔli a vusu ɓee manna, Haruna wu ɓala kaaka ani, ɓɔɔ jetara yii ɓe maani yãa. ⁵ A yuu tuusi ɓee maani yãa mi, bonseni kerobim gĩn vii kuni maani yãa, wo da zenung shãngni ɓa gbang ɓa. ⁶ A laɓe shɔng gonte vimi ye ɓe, Pirisi ɓo ni jaka gaa ɓee tabanaku a wu pele wu vipeleni. ⁷ Bɔrɔ pirisi ko shee ɓo jaka ɓee ziti, ya goro a saa, ni ɓa ni kpaani ɓe aa awu yuu ɓɔɔ shɔng gaasi ruvĩni ɓe ɓa ni yii kaseni ɓa. ⁸ Suru Tɔ̃ɔving taseni ni lung shɔng tĩng dong shii anaa ɓe sii ɓe, shii a dɔrɔng mɔng tɔ̃ɔving de kese bii pĩn ɓa. ⁹ Ɓemi ɓi wuko wu taseni ɓee la' ɓe hãmi. Vii ani ɓɔɔ wɔseni kpaa ɓe shɔng ã hãmi ɓe de tisenung shɔng gbareniyi sĩngsĩng ɓa. ¹⁰ Yii yɔre ɓe yuu ni shani ɓɔɔ ɓooni, ɓɔɔ sɔɔkeni nungmɔɔ, yãa danni ɓee yii gigiri bii waa la' polo ani naa. ¹¹ Kirisi e ana bɔrɔ pirisi ɓee vii tɔ̃ɔving ɓe e ɓe. Waa bɔrɔ ɓɔɔ ɓe jãa tɔ̃ɔving tabanaku ɓe ɓa shɔngzeng pele ɓa, ɓe ɓa ɓee koodanga ɓe shɔng taake ɓe ɓa. ¹² Ɓani kpaa jaa yii kɔ ɓe jaa napoyi ɓa, ni wu kpaa bii ɓe ɓo mɔng tɔ̃ɔving ya goro aru shɔngzeng walikãng ɓɔɔ kpengni dongdong. ¹³ Aruviya kpaa jaa ɓɔɔ gu napo, ɓɔɔ kuuseni pũng mɔ napo aru shɔng ɓe yii sɔɔ tũmpu aru sɔɔkeni yii wɛ̃ɛtɛ̃ng wɛ̃ɛtɛ̃ng ɓee gigiri bii, ¹⁴ hãmi ya dɛ̃ɛya Kirisi wu kpaa jãyi, ɓe ni Suru ɓe da sɔ̃ɔyã ɓa awu yuu ɓani ruvĩni a Laa bii , sɔke wo sĩngsĩng a yuu peleni vɔɔ wu dũng Laa ɓe suru ani? ¹⁵ Aru ɓemi wuko wu wɔ shɔng tɔ̃ɔreni ɓee polo yãa maani. Ɓemi arugoko, vɔɔ te tĩing ye wu kpengse shɔng ɓe yii wɔ̃ng shɔɔni a yãa mani a yii ruvĩni, shɔng ɓe shɔng ɓaayi yãa mi yii te vaaseni ɓe Laa koorooni ɓe sɔ̃ɔyã ɓa. ¹⁶ Aru mɔngɓe vii kaseni ani, shɔngɓe na vɔye shɔng zewu ruu bii. ¹⁷ Aru kaseni da wɔ̃ng nungoko vɔɔ na vɔye, ng wɔ̃ng ɓa ni kaaka ni ɓa shɔngɓe shãng kaseni ɓi na dong ni nungpa. ¹⁸ Ɓa kɔ yãa mani shɔɔni ɓe shɔng de pele ɓani kpaa ɓa. ¹⁹ Alaɓe Muusa a yãa kɔni a rudangni a shɔng walikãng, too kpaa jaa napoyi, ɓɔɔ jayi ni mɛ̃ɛni, shenti rãni, ni ɓala bãbãra, asɔ wangse a koovibini ɓi ni shɔngzeng walikãng. ²⁰ Asɔɔ shãng ni, "ɓeng ɓi kpaa ɓee mani yãa ɓe Laa kɔsenɔ yãa aruni ɓe." ²¹ Jɔ ananko, wangse kpaa a tabanaku ɓɔɔ vii tɛ̃ɛni viyi ɓe shɔng pele a mɔng vii peleni. ²² Anaa ɓe rudanni shãngɓe, viɓe a mɔni walikãng shɔng sɔkeni kpaa ɓi ni, wɔseni kpaa na ɓa ani ɓa yaseni ruvĩni ɓa. ²³ Arugoko liikɔtɔ kɔseni ɓee viɓe yii a koolapa shɔng sɔke ni kpaa vi shareni ɓee viyãaɓa. Ni kaaɓɔ, viɓe yii a koolapa yii bibi liikɔtɔ shɔng sɔke yii ni tɔ̃ɔving vi shareni. ²⁴ Aruviya Kirisi de ɓo mɔng bɔrɔ tɔ̃ɔving ɓee shɔng maa ni naa ɓa, bee wuko vi kɔseni ɓe nungoko goro. viɓe pele ɓo koolapa bibi, wu ke hãmi a Laa watĩng aru wo ni. ²⁵ De waa mɔng wa ɓa aru wu awu yuu vɛ̃ɛni ɓa, anaɓe bɔrɔ pirisi, ɓe ɓo bɔrɔ mɔng tɔ̃ɔving saa ɓɔɔ saa ni kpaa ɓɔɔ. ²⁶ Viɓi na ananko, na sɔɔ kpãreni a dɔɔ la gandimi alaɓe shɔng loo tung koodanga. Keeye hãmi a tũmpu diki ɓemiyi aru wu wɔse ni kati ni wu kpaa a dɔɔ vii shareni ɓee wu yuu. ²⁷ Anaɓe shɔng shĩngshe shɔngzeng wu vɔɔ ya goro, a tũmpu ɓini shɔng ɓoore wu yoori, ²⁸ jɔ ananko, Kirisi awu yuu yaa goro aru wu too shɔngzeng vɛ̃ɛni yii ruvĩni, ng ke tɔti ɓee ziti, ɓa wu kpãare ruvĩni ɓa aru kpengseni shɔng ɓe ying gaa wu ɓe.