¹ Aruviya ruudani ɓi yĩngsi vi tɔ̃ɔvĩng ɓe da e ko shee, ɓa tikiki viɓiyi ko ni yii yuu ɓa. Shɔngɓe yii e Laa bii yii da zenung wɔ̃ngni shɔng tɔ̃ɔvĩng ɓa ni vi shareni zɔng goro ɓe pirisiyi ese saa ɓɔɔ saa ɓemi ɓa. ² Na ɓa ananko ɓa, shɔng na de zii yãa ani vi shareni ɓa ya? Aruu shɔng na sɔke shɔng gbãreniyi bii dɔɔ goro yina de sɔɔ kpaa lereni ruvĩni ɓee sĩngsĩng tɔɓa. ³ Ni vi shareni waayi walikãng yeni nugn ani saa ɓɔɔ saa aru ruvĩni. ⁴ Aruviya daa wɔ̃ng ɓa kpaa napo kɔ jaa yii too ruvĩni ni kati ɓa. ⁵ Alaɓe Kirisi e koodanga, shãng ni, "Vi shareni ɓɔɔ ani viyi mɔ de kase ɓa, bii ɓe mɔ gonte aru mini; ⁶ ani vi shareni ɓɔɔ ani vi ruvĩni mɔ de kase yii ruu bii ɓa. ⁷ N sɔɔ shãng ni, 'Zepĩn, miko mi-anaɓe shɔng binke aruu mini a vibinkeni lingni-N pele viɓe mɔ kase, Laa." ⁸ Shãng shɔɔni ni, "Sii ɓa vi shareni, kɔ vi ani, kɔ vi ani shareni walikãng ɓa, kɔ ani vi ruvĩni mɔ kase ɓa. Kɔ mɔ kase yii ruu bii kɔtɔ ɓa." Ɓemi yiɓi vi shareni ɓe shɔng aa ni dɔɔ kn ni ruudani. ⁹ Sɔɔ shãng ni “Ze pĩn, mikɔ mi N pele viɓe mɔ kase ɓe.” Loke dɔɔ knni ɓee shɔɔni ni gaa aruɓe daa gonte ni kaaka dɔɔ kn ni ɓee ziti. ¹⁰ Ni kaseni waa, shɔng sɔke wo ye ni ani vi ɓee Yesɔ Kirisi wu bii dɔɔ goro aru shɔng walikãng. ¹¹ A la gandimi walikãng pirisi shiike asɔɔ pele shooni, wu aa vi shareni ɓi ɓɔ ɓɔ-vi shareni ɓe daa zenung sɔkeni ruvĩni ɓa. ¹² Alaɓe Kirisi a vishareni ye la' goro aru ruvĩni, wɔ̃ng a Laa kaa nashang. ¹³ N gaa ke laɓe shɔng daa riise wu shɔngpongyi wu vi dɔɔ naa ni ɓe. ¹⁴ Aru ni kaa ani vi dɔɔ goro shĩng shɔngɓe shɔng sii sɔke yiye tɔ̃ɔvĩng dondong. ¹⁵ Suru tɔ̃ɔving shãngshe wo kɔtɔ. Shãng shɔɔni ni, ¹⁶ "Ɓemi ɓi wuko yãa mani ɓe N pele ni yini a tũmpu diki waayi, Daayere shãng. N shĩng N ruudani ayi sĩngsĩng, N sɔɔ binke ayi lereni gn." ¹⁷ Asɔɔ pãng tɔti ni, "N ye nugn tɔɓa ayi yuu ruuvĩni ɓɔɔ yii kara dũngni ruudani ɓa." ¹⁸ Hãmi amɔng ɓe yaseni ruuvĩni na ani, mɔng ani vi shareni tɔɓa aru ruuvĩni ɓa. ¹⁹ Arugoko, mazũngyi, wɔ kaaka gn ani wo bo bɔrɔ mɔng tɔɔving ani aruu Yesɔ kpaa. ²⁰ Ɓemi wuko polo ɓɔɔ dɔknni surubi ɓe gonte ke ni dɔ̃rɔng fara gĩni mɔng, wuko, ni wu kaa gigiri bii. ²¹ Aruviya wo bɔrɔ pirisi ani a Laa yee, ²² wo wata ni sĩngsĩng nungoko ni yini kaaka gn shĩngni, ni wo aleni sĩngsĩng kpelenkpe a yuu ruuvĩni lereni gn ɓɔɔ sɔkeni wo bii ni mɛɛ kpelenkpeleng. ²³ Wo sɔɔ yise ni kaaka tenign ɓe wo shãng ɓemi, aruviya shɔng ɓe vaaseke wu shɔng nungoko. ²⁴ Wo lere a sĩngsĩng lemlem nakaɓe wo da a wee kaaka gn wo kase wee wo sɔɔ pele vi tɔ̃ɔvĩngyi. ²⁵ Wo na yaa museni yuu ɓa a yãawe ɓa, anaɓe shɔng gãasi yii pele ɓe, vi peleni wuko, nɔ maase wee gbĩngti gorogo, ni gãasi viyi vɛ̃ɛni anaɓe nɔ ze ye diki eni kpaa ye maani. ²⁶ Aruu wɔ na watĩng ye ni peleni ruuvĩni ni gãgã alaɓe wo te zeni nungoko ye, ani vi shareni aru ruuvĩni ɓɔɔ tɔɓa. ²⁷ Dɔ̃rɔng goro ɓe don yaa wuko zaani gaani diki ɓooreni yoori ko shee, ɓɔɔ bɔrɔ rete yaa ɓe daa shaare Laa shɔngpongyi. ²⁸ Shɔngɓe bɛ̃ɛ ruudani ɓee Muusa vɔɔ ke ɓani nugn kɔngni ɓa ni ani yãa ɓee shɔngzeng ziti kɔ tati. ²⁹ A mɔ lereni shangni kpãareni ɓe jãa kaaka da wɔng nuko vi a yuu shɔngɓeyi nale Laa Jaa ni dɔɔ, ɓe yii riise kpaa yãa mani ɓa kpelenkpe ɓa-kpaa ɓe ni kaaɓi ko shɔng sɔke wu-asɔɔ dãa Suru Pãnti we ya? ³⁰ Aruviya wo ze shɔngɓe shãng ni, “Lɔngseni nung ɓing maa; N shoore yii walikãng." A mɔng ɓi tɔti, “Daayere N ɓoore wu shɔngyi yoori." ³¹ Ɓivi bii zani shɔng wete a Laa ɓe surubi ani naa. ³² Mɔ ye nugn a diki ɓe yii tuuke ɓe, alaɓe shɔng tasenɔ ye, kaaɓe nɔ tii mani gn ni nungni bɔrɔ kpãareni. ³³ Alaɓɔ shɔng dãa nɔ a tĩng mɔɔ ni kpãareni, a diki ɓɔɔ nɔ vaase kpãareni ni shɔngɓe ying kpãare ɓe. ³⁴ Aruviya nɔ kɔng gn aru shɔngɓe shɔng maayi dɔɔ a gãayã, nɔ te ni puru yato raani viɓe nɔ tole ɓe. Nɔ ze ye ni nɔ bibi nɔ tɔ̃ɔvĩng vi toleni ani ɓe sɔ̃yãa ɓa. Aruviya nɔ tãng nugn kɔngni alaɓe N dɔɔ mani a gãayã ni dĩngre saka ɓe. ³⁵ Arugoko nɔ na loke nɔ teni gn ɓa, ɓe wu bɔrɔ vidɔɔ yɔɔni ani ɓe. ³⁶ Aruɓe liikɔtɔ nɔ kpaa mani gn aru alaɓe nɔ na pele viɓe Laa kase ye, nɔng kpaa viɓe vaase ɓe. ³⁷ "Aru la wodot, shɔngɓe ng emi daa e kɔtɔ ɓani jãng ɓani ɓa. ³⁸ N shɔng yato ɓolongɓo ng wɔ̃ng ni shĩngni gn, na sɔɔ tũmpu ye, N suru ing tãawu tɔ̃ɔvĩng ɓa." ³⁹ Wo ɓe ɓa shɔngɓe yii sɔɔ tũmpu leseni ɓa, wo a titi shɔngɓe yii shĩngni gn ani yii sɔɔ kpengseyi surubi.