¹ Hãmi shĩnign wuko nungoko viɓe mɔ teegn ani ɓɔɔ anizɔng a viɓe mɔ de ze ɓa ɓe. ² Aru vimi ko shɔng shĩng naa a wo yebɔngyi yuu aru yii shĩnign. ³ Ni gn shĩini wo ze ni Laa take koodanga ni wu kɔni yãa, aruɓe viɓe sii ɓa a gaa gbang ɓa shↄng pele a vusu viɓe yii a gaa gbang. ⁴ Ni gn shĩngni Habila a Laa vinagba tↄ̃ɔving ɓe jãa Kainu ɓe kↄtↄ, a ɓe shↄng tise a zewu yato ɓolongɓo ɓe, Laa shãng ruu tↄ̃ɔving awu yuu aru viɓe aa ɓe, ni gnshĩni Habila shãng yãa kↄ a laɓe vɔɔye ɓe. ⁵ Ni gnshĩngni Enɔki shɔng toowu nungkakari a ware wu koolapa de ze vↄɔ ɓa “Shↄng de kpawu ɓa aruviya Laa toowu, “A labe sii shↄng de toowu pĩn ɓa, shↄng aa yãa ni pelevi tɔ̃ɔving a Laa bii. ⁶ Na ɓa ni gnshĩngni ɓa, kpã kↄtↄ wo roore wu sĩngsĩng. Aruviya liikɔtɔ shↄng ɓe na tↄye ni e Laa bii wu azɔng ni Laa wuko shɔng shoreni viidɔɔyɔni shɔng ɓe yii bewu ɓe. ⁷ Ɓi ni Nuhu gnshingni ɓe shɔng aa wu bↄrↄ ruu waani a viɓe de kn tĩng pĩn ɓa ni zani vↄɔ Laa a gonte tuusi ɓe da kpengse wu yee ɓe. A laɓi ko Laa lese koodanga asↄɔ wↄ̃ng sewu jaa rooni koo ɓee shɔng yato ɓolongɓo ɓɔɔ gnshingni. ⁸ Ni gnshĩni Ibirayi, alaɓe shↄng ɓaawu yãa ɓe, dũng yãa shãangni a waa mↄng ɓe daa te viyere ani ɓe. Ke a wake, de ze mɔng ɓe ng waa ɓa. ⁹ Ni gnshĩni wɔ̃ng a tipi ɓee vaaseni anaa shↄngzanti. Wↄ̃ng a tengteni ni Ishaku ɓↄɔ Yakuubu, ɓɔↄ jaa roonikoo ɓee vaaseni. ¹⁰ Aruviya ng mile ɓungdaang ɓe wu tung, shɔng gĩni ɓɔɔ maani ɓi wu ko Laa. ¹¹ Ni gnshingni Saratu wu sii sooye tↄ̃ↄri, a kpaa kaaka jaa toseni. Vimi pele ke alaɓe sii rii sobↄrɔ ye, shɔng zewu anaa shɔng gnshĩni shɔng goro ɓe vaase wu ɓe. ¹² Arugoko, shↄng goro ɓemi- shɔng sii zewu anaa shɔngɓe de vɔɔni--sɔɔ wɔ̃ng anaa shɔng yeni wu jetãari popopi anaa seng a lapa ɓɔɔ anaa sɛ̃ɛli ɓe shɔng daa gãaɓa a yãa wapo. ¹³ Ni gnshĩngni shↄng ɓemi walikãng yii vↄle, yi de te vaaseniyi ɓa. Yii zeke aa jiyi yãa fefe, yii ze yii yuu anaa shɔng zanti ɓɔɔ foo a koodanga. ¹⁴ Aru shɔngɓe ying shãng zɔng viiwa yii tase a gaa gbang ni ying ɓee yee wɔ̃ngni. ¹⁵ Na yii lere aru koo ɓe yii ke ani ɓe, yina kpa dɔ̃rɔng ɓee sɔɔni kɔtɔ. ¹⁶ Anaa ɓe hãmi, yii kase hãmi koo tɔ̃ɔving, wuko, yee ɓe a koolapa. Arugoko Laa ng tãa yuusɛ̃ɛɓa shɔng ɓaawu ni yii Laa ɓa, aruɓe gongte ɓundang aru yini. ¹⁷ Ni gnshingni Ibrayi, alaɓe shɔng maawu ɓe, aa Ishaku. Ɓiwu jaa goro ko she ɓe aa ɓe, wuko shɔngɓe tee vaaseni. ¹⁸ Shɔng shãng aru Ibrayi kɔ ni, "Ni Ishaku kaabi ko shɔng ɓaamɔ shãari rĩng." ¹⁹ Ibrayi lereni Laa ng zenung kɔtɔ wu yuse Ishaku paa a vɔɔ naa, asɔɔ shãng a yãa gãani ning, aru vimi kɔ tee wu jaa tɔti. ²⁰ Tɔni ni gnshingni aru viɓe daa e tĩng Ishaku tɛ̃ɛre Yakuubu ɓɔɔ Isuuwa zuuku. ²¹ Ni gnshingni laɓe Yakuubu, alaɓe de vɔɔni tɛ̃ɛre Yuusu jaayeeyi zuuku. Yakuubu gbãareke, kpaa zeni a wu bala. ²² Ni gnshingni ko Yuusu, a laɓe wu diki sii kpaaye maani ɓe, shãng aru jaa Isrela yii yani tipi Maasari a wase yii yãa aru wu kaaka vɔɔ. ²³ Ni ginshingni Muusa, alaɓe shↄng yeewu ɓe, yeɓi yii vↄ̃ɔsewu shele tati aru jaaɓi liini. Yii de za yãa kɔni ɓee kpanti ɓa. ²⁴ Ni gnshingni Muusa, a tumpu ɓe bɔngye, ɓɛɛ ke shↄng na ɓaawu ɓa ni Firi'awuna wu jaa sooye jaa ɓa. ²⁵ Rɔɔke shↄng wu kpãare wuni shↄng Laa yini a yãwe a kaɓe naa sii daa tↄ̃ɔre bii ni shɔng ruuvĩni yini pota. ²⁶ ze kpãareni aru Kirisi wɔ̃ng anaa bɔrɔngbɔ vii naa ɓe jãa vii yee ɓee Masari kɔtɔ, aruviya teenung aru viidɔɔ yɔɔni ɓe daa kpaa a tĩng ɓe. ²⁷ Ni gnshingni Muusa ya tipi Masari. De zaa kpanti leseni yato ɓa, manugn wɔ̃ngni wu ze shↄng ɓe shↄng ze wu ɓa mi kↄtↄ. ²⁸ Ni gnshingni ko yise tukeni ɓee wangseni kpaa, aru ɓe shↄng nungni vↄɔ ɓe jaa shɔng tĩng yii daa lii shↄng Isrela yii jaa tĩng ɓa. ²⁹ Ni gnshingni yii tuke bↄrɔ yang a tipi wati. Alaɓe shↄng masari ying beke yii tuke ɓe, mɛɛ seyii walikãng. ³⁰ Ni gnshingni mↄng ɓe shↄng maa a Yeriko ziike a laɓe shↄng kãare wu ye ɓee diki nawatati. ³¹ Ni gnshingni ko sooye ranni Rahabi de vↄɔ ɓa ni shↄng ɓe yii tãare shↄng yãa ɓa miɓa aru te shↄng gangseni tipi ni yato puru. ³² N daa shãng ruu ɓɔɔ tↄni viya? La ing yeeseng kɔtɔ nang daa shãngyãa gɓintang aru Gidiyɔn ɓↄɔ Baraki, ɓɔɔ Samsↄn ɓↄɔ Jefita ɓɔↄ, Daawuda ɓɔↄ Samela ɓɔↄ gãasi shↄng zeeni vii suruyii. ³³ Ni gnshĩni ko yii jãa kpanti koo kaka a pele vii yato ɓolonɓo a te vaaseniyii ɓe. Yii ku zingãnyii yãa, ³⁴ a rinse kakka yaa a kpen a yeewa naa yii kpa kakka a laɓe yii bii tɔɔleye ɓe, yii wↄ̃ng shↄng kpara a mↄng sii, a jãa shↄng pongyii kakka ɓee tipi totok. ³⁵ Sooye yii te yii vɔɔ ni yuuni paa a yuusaa. Shↄng gãasi shↄng kpãareyi, yii ɓɛ̃ɛ keni, aruɓe yii daa kpaa yuuni paa ɓe tɔ̃ɔving ɓe . ³⁶ Shↄng gãasi yii shↄng baaseyi a wainungni, asɔɔ maayi dɔɔ ni saka gãayã. ³⁷ Shↄng loleyi ni tara. Shↄng tãaseyi ziti gãawu a nungyi vɔɔ ni yewa, yii ɓose ko ja ni mɛrɛ, a wↄ̃ng wↄ̃ni shɔng foo, shɔng rãng a ɓoo kpaareni. ³⁸ Koodanga de tɔ̃ɔreyi tɔɓa bii ɓa, yii rake a jĩnti ɓɔɔ kↄpↄ, ɓɔↄ kapuru a wↄ̃ngreni a to. ³⁹ Aruviya shɔngmi yii walikãng yii kpa ani naa a Laa bii aru yii gnshingni, yii de kpaa viɓe shɔng vaaseyi ɓe ɓa. ⁴⁰ Laa gonte wo viɓↄɔ ɓe tɔ̃ɔving ɓe, aru naɓa ni woni ɓa, ying wɔ̃ng ɓa dang ɓa.