¹ Arugoko, anaɓe shɔng kĩnte wo ye ni mɔɔ ɓee shɔng ani yãayi vɛ̃ɛni mi, wo shĩng vi kpiteni ta ni kati ɓɔɔ ruvĩni ɓe shĩng woteni. Wo sɔɔ yuni maanign vi yuni ɓe shɔng shingshe wo a tĩng mi. ² Wo wee shoo ta a Yeso bii, wuko kpare wo shĩngni gn asɔɔ sɔ̃re yãa walikãng. Aru puru yato ɓe shɔng shĩngshe wu a tĩng ɓe, a maa nugn vɔɔni a yuu la, de tãa yusɛ̃ ɓa, asɔ wɔ̃ng a Laa ladong kpanti ɓee nashang. ³ Arugoko nɔ lere aru wuni, shɔngɓe maa nugn kpãareni a shɔng ruvĩni naa aru wu yuu, aruɓe nɔ daa yɔɔ ɓa asɔɔ bete sĩngsĩng ɓa. ⁴ Nɔ de bɛ̃ɛ kɔ nɔ nung bang a yuu ruvĩni a wa tɛ̃ni kpaa bii ɓa; ⁵ nɔ sɔɔ suuke maanign ɓe kɔse nɔ yãa niː "Maa jaa, nɔ na too Daayere gɔ̃ni shoo ɓa ni showa ɓa, kɔ mɔ lese yato na gongte mɔ ye ɓa. ⁶ Aruviya Daayere gɔ̃ɔ shɔngɓe kase ɓe shoo ko, sɔɔ ɓoore wu jaa ɓe teyi yoori." ⁷ Nɔ maagn kpãreni ana gɔ̃ni shoo. Laa dũng ni mɔ ni ana wu jaayi. Ɓi jaa bɔwe yeɓi gɔ̃wu shoo ɓa weya? ⁸ Shɔngna gɔ̃ mɔ shoo ɓa, ɓe shɔng walikãng yi pele, mɔ wɔ̃ngye ana jaa yuyereɓa mɔ ɓa wu jaa ɓa. ⁹ Ɓɔɔ tɔti, wo daayi ɓee koodanga yi gɔ̃ wo shoo kɔtɔ wo sɔɔ ayi bɔrɔ a bii. Ɓivi daa shĩngke wo daa rɔɔre wo yuu ɓa a Daa ɓee suruyi bii wo sɔɔ wɔ̃ngni suru ɓa viyaǃ ¹⁰ Wo daa yii gɔ̃wo shoo ɓee la pota ayi lereni tɔ̃ɔving. Laa gɔ̃wo shoo jɔ aru wo tãni tɔ̃ɔving, aruɓe wo da vasevi a wu vusu wɔ̃ngni kpelenkpe. ¹¹ Puru yato ɓa a la gɔ̃ni yushoo ɓa, a shɔng viki yato ko shee. A tũmpu ɓiko kese reni wɔ̃ngni lemɓa ɓee yato ɓolongɓo aru shɔngɓe yii mantevi ye ɓe. ¹² Arugoko nɔ shiire nɔ naa ɓe lɔ ni dii ɓɔɔ nɔ jĩleni gbĩngti. ¹³ Nɔ gonte nɔ dɔ̃rɔng ta gbololo aru nɔ dɔɔ, aruɓe viɓe gbenka da kpa kaaka wusɔɔ gangte ke. ¹⁴ Nɔ bee wɔngni lemɓa ni shɔng walikãng, ɓɔɔ wɔ̃ngni tɔ̃ɔving, aruu na ɓa ni wuko ɓa wong ze Daayere ɓa. ¹⁵ Nɔ kn kpɛɛni aruɓe shɔngɓɔ daa wɔng ɓa ni Laa pãnti ɓa, nɔ na sɔɔ yaa wɔngni viki yato ɓa wu bɔng ke wu ese yuyɔre ni ɓa, aruɓe shɔngzeng vɛ̃ɛni yida lese ɓa ni ɓa, ¹⁶ shɔngɓɔ na wɔ̃ng ɓa shɔng pele ni kɔng kɔ shɔng leseni Laa rĩng, ana Isuwa ɓa, ɓe aru pii vishang goro maale wu naa jaasang. ¹⁷ Nɔ ze ye ni a tũmpu ɓini, alaɓe kaseke wu kpaa yeɓi zuuku, shɔng bɛ̃ wu, aruviya de kpaa dɔ̃rɔng ɓe da dawu ruvĩni ɓa, kɔ alaɓe bee ni tɛ̃ni mɛɛnung. ¹⁸ Aru nɔ de e ɓa kɔpɔ ɓe shɔng daa liiwu kɔtɔ ɓa, kɔpɔ ɓee yaa shaani, mɔng tĩngri, gbitĩngbi ɓɔɔ zãasi. ¹⁹ Nɔ de e ɓa a mɔng langni yãa gboo ɓa, kɔ aru yiri yãa ɓe shãng ruu ɓe shĩngke shɔngɓe yii tãa yii gɔ̃re ni yii de kase tãni yãa shãngni ɓɔɔ tɔɓa. ²⁰ Aru yii de tign viɓe shɔng kɔseyi yãa ɓaː "Ni kɔ ɓi viva lii kɔpɔ ɓi, shɔng loole wu ni tara." ²¹ Mɔng ɓi wɔ̃ng vi bii zani ɓe shĩngke Muusa shãngni, "N zaa vɔɔye bii sɔɔ zang ye. ²² Mɔng ɓe nɔ e wuko, kɔpɔ Sihiyona ɓɔɔ bɔrɔ ɓundang ɓee Laa ɓe surubi ani, Urushelima ɓe koolapa, ɓɔɔ ɓe labong labong kopi shɔng shoniyi a vusu puru yato nung mɔɔ. ²³ Nɔ e mɔm ɓaseni yuu ɓee jaasangyi ye, ɓe shɔng binke yi rĩng ye a koolapa. Nɔ e Laa bii, ɓe ɓoore shɔng walikãng yoori, ɓɔɔ shɔng yato ɓolonɓoyi suru ɓe shɔng riise yiye tɔ̃ɔvĩng. ²⁴ Nɔ sɔɔ e Yeso bii, shɔng gongte polo yãa mani, ɓɔɔ mɔng wangseni kpaa ɓe shãng yãa jãa Habila kpaa kɔtɔ. ²⁵ Nɔ zeke nɔ de bɛ̃ɛ shɔngɓe ng shãng yãa ɓa. Aru yina de kpeng ɓa alaɓe yi bɛ̃ɛ shɔngɓe gɔ̃yi shoo a kodanga, wo kpengni ng wɔ̃ng pota wo na riise shɔngɓe ng gɔ̃ wo yushoo a koolapa ye. ²⁶ A la' goro, wu yiri yãa zite koodanga. Hãmi vaase asɔɔ shãngni, "Ya goro tɔti N zite ɓa koodanga ko shee ɓa, N zite koolapa jɔ." ²⁷ Ruuɓemi, "Ya goro tɔti," tase zɔ̃ni viɓe shɔng daa zenung ziteni, wu ko, vishãng wuko, ɓee viɓe shɔng take ɓe, aru viɓe shɔng daa zenung ziteni ɓa daa wɔ̃ng ke. ²⁸ Arugoko, teni roonikpanti ɓe shɔng zenung ziteni ɓa, wo wɔng ta shɔng dɔreni ɓɔɔ a wɔ̃ngni a dɔ̃rɔng gbãreni Laa ni ani wu bɔrɔ ɓɔɔ zani bii. ²⁹ Aruviya wo Laa ɓi yaa shaare ni.