¹ Nɔ yaa kaseni wee ta wu watĩng. ² Nɔ na yaa taseni shɔng zangtiyi tɔ̃ɔvĩng ɓa. Aruvimi ko, shɔng ɓɔyi tase Laa shɔng shonniyi tɔ̃ɔvĩng ɓani yii ze ni ɓa. ³ Nɔ ye nugn ni shɔngɓe yii dɔɔ a gãyã ana shɔng yenɔ ni yini. Nɔ ye nugn aru shɔngɓe shɔng kpãareyi aru nɔ jɔ goro ko a bii. ⁴ Nɔ aa gbare bɔrɔ a shɔng tĩng walikãng, nɔ sii rooni gbare wu wɔ̃ng kpelenkpeleng ɓani rĩngte ɓa, aruviya Laa N ɓoore shɔngɓe yii pele kɔng ɓɔɔ shɔng yee ɓe yii pele kɔngyi yoori. ⁵ Nɔ na tase nɔ yuu ɓa a mɔng kaseni saka ɓa. Nɔ roore sĩngsĩng ni viɓe anɔ naa, aruviya Laa ni wu yuu shãngni, "N yaa nɔ ɓa, kɔ N looke nɔ ɓa." ⁶ Wo roore sĩngsĩng aruɓe wo daa kpa kaaka gn shãngni, "Daayere ko N shɔng yiseni naaː N zaa vɔɔ ɓa. Ɓivi shɔngzeng daa peleng viya?" ⁷ Nɔ lere aru nɔ yubɔrɔyi, shɔngɓe yi shãngshe nɔ Laa ruu ɓe, nɔ sɔɔ shĩng nung a yii dɔɔ knni tase. Nɔ maase yii dɔɔ shĩngni gn. ⁸ Yeso Kirisi wu zɔngo dĩngsi ɓɔɔ lami ɓɔɔ dondong. ⁹ Nɔ na yɔre yuu ɓa a yuu polo manteni viyi ɓa. Aru likɔtɔ sĩngsĩng wu kpaa kaaka ni Laa ani pãnti, ɓa aru vishang ɓe daa zenung yiseni naa shɔngɓe yi kn ni ɓa. ¹⁰ Wo bagadi yãa waani ani ɓe shɔngɓe yii pele shoni a tabanaku yina shaani ɓa ani ɓa. ¹¹ Aru kpaa viyãaɓayi ɓe shɔng nunyi vɔɔ shɔng ese yubɔrɔ pirisi a vusu mɔng tɔ̃ɔvĩng, aɓe yii gigiri bii shɔng shaare a yãa gaa. ¹² Arugoko Yeso kpãre a yãa gaa ɓee bɔrɔ ɓundang, aruɓe da sɔke shɔngzengyi ni wu kpaa bii. ¹³ Arugoko wo wa wu bii ta a yãa gaa, wo ɓoose tãani yusɛ̃ ɓe tii ɓe. ¹⁴ Aruu wo mɔng wɔngni ɓee bɔrɔ ɓundang dondong ɓa mɔmi ɓa. Vipeleni wuko, wɔng bee ɓe daa e ɓe. ¹⁵ Awu kaabi ko, hãmi, wo watĩng ni ani Laa dɔɔni, dɔɔni ɓee wo reni rete yãa ɓe ze wu rĩng ye ɓe. ¹⁶ Wo na yaa peleni wee tɔ̃ɔvĩng ɓa ɓɔɔ ani wee vi ɓa, aruviya ni zɔng ani vi wa ko Laa tãa tɔ̃ɔvĩng. ¹⁷ Nɔ dũng nɔ sɔɔ ayu anɔ yubɔrɔyi bii, aruviya yii ayi yuu aru nɔ gaani suruyi ana shɔngɓe yi aa yi vi peleni a Laa tĩng. Nɔ dũngyi yãa aruɓe nɔ yubɔrɔyi yii daa pele shongni ni puru yato, ɓa ni yato leseni ɓa, ɓe daa wɔ̃ng kɔvɛ̃ anɔ bii. ¹⁸ Nɔ gɔ̃re aru woni, aru wo azɔng ye ni wo sĩngsĩng ɓolongɓo wo sɔɔ kase ke wo kn tɔ̃ɔvĩng avi walikãng. ¹⁹ N maase nɔ gn nɔ pele vimi vɛ̃ɛni, aruɓe N daa sɔɔ e nɔ bii ɓani jang ɓani ɓa. ²⁰ Hãmi Laa ɓee wɔngni lemɓa, ɓe yuse paa a yusa bɔrɔ shɔng gaani mɛrɛ, wo Daayere Yeso, ni wu kpaa ɓee mani yãa ɓee sɔ̃yã ɓa, ²¹ wu anɔ kaaka tɔ̃ɔving ɓee peleni viɓe kase ɓe, ng pele shoni a wo bii ɓe likɔtɔ, ni Yeso Kirisi kaabi, ɓe wu ɓee ko bɔngni dongo ɓɔɔ dondong. Ananko. ²² Hãmi N maase nɔ gn, mazũngyi, nɔ tii ruu maani gn ɓe N binke nɔ pota ɓemi. ²³ Nɔ ze ke shɔng yaa wo mazũng Timoti naa ye, N ze nɔ ni wuni laɓe na e ye ɓani jang ɓani ɓa. ²⁴ Nɔ jinɔ yubɔrɔyi yãa ni Laa shɔng tɔ̃ɔving shɔng walikãng. Shɔng koo Italiya ying jinɔ yãa. ²⁵ Pãnti wu wɔngni nɔ ni walikãng.