¹ Ɓi Malkisadi, kpanti Salem, Laa yuranko pirisi, wuko kpaa Ibirayi alaɓe de sↄɔ ni a mↄng yeeleni kpantiyi asɔɔ tɛ̃ɛre wu zuuku a bii. ² Ɓi wuko Ibirayi awu kopi a titi viɓe shaa a sii ɓe. Shɔɔni, wu riiseni rĩng wuko “Kpanti shↄng yato ɓolongɓo”; Ɓi wuko tↄti Kpanti Salem. Vishãngni wuko, "kpanti wɔ̃ngni lemɓa." ³ Yeɓi ɓa, wu yĩngtija ɓa, wu dabɔngyi ɓa, wu diki gaani ɓa kↄ wu diki sɔ̃ɔni yãa ɓa. Sɔɔ kee Laa Jaa, wuko wu Pirisi ɓee dondong. ⁴ Nↄ mile bɔrɔ bɔngni ɓe shↄngvere ɓemi wɔ̃ng ɓe shĩngke dabɔng Ibirayi awu kopi a titi viɓe shaa a sii ɓe. ⁵ Shãari Lawi ɓe te ladong pirisi yii kpaa kɔseni yãa kɔtɔ ni dɔ̃rɔng rudani aruu yii te goro a titi kopi a shↄng naa, vishãngni wuko, ayi zũngɓi naa, ɓe wɔ̃ng yii bibi, yii jɔ, Ibirayi shãari ko. ⁶ Malkisadi, ɓe wu shãari shↄng de ze ɓa ayi titi ɓa ɓe, te goro a titi kopi a Ibirayi naa, a tɛ̃re wu zuuku, shↄngɓe wuko shɔɔni kpaa vaaseniyi. ⁷ Ɓa vi lereni yãa ni shↄngbɔrↄ wu tɛ̃ɛre shɔngɓe wodot zuuku a bii ɓa. ⁸ A ruu shãngni ɓemi, shↄng vↄɔniyi yii te goro a titi kopi, a ruu mi shɔng taseni wɔ̃ngni surubi. ⁹ Ɓɔɔ, a dɔ̃rɔng shãngni yãa, Lawi, ɓe te goro a titi kopi mi, shoo goro a titi kopi jɔ ni Ibirayi kaa bii, ¹⁰ aruviya Lawi wu sii dong a bii yebɔngɓi alaɓe Malkisadi kɔseni Ibirayi ɓe. ¹¹ Hãmi kpɛ̃ni wɔ̃ngni na da wɔ̃ng kɔtɔ ni kaa Lawiyi wɔ̃ngni pirisi (aruu a vusu ɓi ko shↄngzengyi yii te ruudani), vi beeni ɓowe da shĩngke Pirisi ɓɔↄ wu yupa tok wu dɔ̃kn wu wɔ̃ng ana Malkisadi, ɓe shↄng de ze wu ɓa wu wɔ̃ngni ana Haruna dɔkn ni ɓa weya? ¹² Aru shↄng na kↄse wɔ̃ngni Pirisi ye, shɔng sɔɔ kↄse ruudani jɔ. ¹³ Aru shɔngɓe shɔng shãng ruu ɓemiyi ayi yuu yiɓi shɔng yãakoo ɓↄɔ tok ɓa, ɓe shↄng de pele vipeleni ɓa ayi yuu lɔng ɓa. ¹⁴ Hãmi taseyi ananko ni shɔng ye Dayere a vusu Yahuda, yãakoo ɓe Muusa de ɓaa ɓa dↄɔgoro aru Pirisiyi ɓa. ¹⁵ Viɓe wong shãng ɓemi keye a gaa gbang alaɓe Pirisi ɓɔↄ na yupaye ni zɔng Malkisadi bii. ¹⁶ Shɔngɓemi wɔ̃ng Pirisi, ɓa aru dũngni dɔɔ kn ni ruudani ɓa, wɔ̃ng ni kaaka naa ɓee surubi ɓe dondong. ¹⁷ Aru labini shãng yãa ye aru wuni “Mↄ ɓi Pirisi ɓe dondong ni kaa dɔɔkn ni ɓee Malkisadi” ¹⁸ Ɓa aru shɔng yaa gɓengti kɔseni yãa ni kati aru wu kaaka tɔɓa kɔ ɓa tɔ̃ↄvĩng ɓa- ¹⁹ aru ruudani de gonte viɓa walikang tɔ̃ɔving ɓa-- ɓɔɔ tɔti shↄng ese polo teni gn ɓɔɔ tok, ɓe ni wu kaa bii ko wo e maani ni Laa ni. ²⁰ De wɔ̃ng ɓa alaɓe shↄng de tengse ɓaǃ Shↄng gãasi yii rii pirisi ɓa ni tengseni ɓa, ²¹ vizeni wuko wɔ̃ng pirisi ni tengni ɓee shɔngɓe gãale wuni, “Daayere tengye daa sɔɔ kɔse wu sĩngsĩng ɓaː “Mↄ ko Pirisi ɓee dondong.” ²² Ni ruu ɓemi ko Yesɔ aa yãa maani tɔ̃ɔvĩng ɓe yuyɔreni ɓa ani ɓa. ²³ Gbenti pirisi yisi vɛ̃ɛni, aruɓe vↄɔ zãreyi wani tĩng ni shonni ni. ²⁴ Ɓe Yesɔ watĩng ni wɔ̃ngni ɓee dondong, wu wɔ̃ngni Pirisi ani ɓee dondong. ²⁵ Arugoko zenung ye wu raa shɔngɓe yii e Laa bii walikãng ni wu kaa bii, aruviya wɔ̃ng aru wu gɔ̃re Laa aru yini. ²⁶ Aru wɔ̃ng ye ɓatata wu kpaa zɔng bɔrɔ Pirisi ɓemi, ɓe wu tɔ̃ɔvĩng, wu ɓa shɔng ruvĩni ɓa, wu ɓolongɓo, shɔng zɔ̃wu ye a titi shɔng ruvĩniyi, shɔng sɔɔ awu bɔngni wu tuuke koolapayi. ²⁷ De wɔ̃ngse wu ɓa tikiki, wu aa vi shareni dikidi ɓa, ana gãasi ɓɔrɔ Pirisi yii pele ɓa, ɓee shɔɔni aru wu ruṽiniyi, wu sɔɔ pele ɓɔɔ aruu shɔng gãasiyi. Pele vimi dɔɔ goro alaɓe awu yuu ɓe. ²⁸ Aruu rudani rɔɔ bɔrɔ veeye pirisi ɓe yii bii jiile kɔtɔ. Ruu ɓee tengseni, ɓe e a tũmpu rudani, rɔɔ Jaa, ɓe shɔng riise wu ye shɔng ɓatata ɓee dondong.