¹ Arugoko, ɓe taseye ni vaaseni wu ɓooni wɔ̃keni dong ani, wo zaa vɔɔ, aruɓe nɔ shↄngɓɔↄ ɓa goro ɓe daa zenung ɓooniɓa ɓe. ² Aruviya shↄng gãale wo ruu tɔ̃ɔving ye anaɓe shↄng gãaleyi jɔ ɓe. Vizeniwuko ruushãngni ɓewe de tɔ̃ɔre shↄngɓe yii de ɓaase yuɓa a vusu gnshĩngni ɓa ana shɔngɓe yii dũngyãa ɓa. ³ Aruviya wo shↄngɓe wo azɔng ɓe wo ɓoo wu wɔ̃keni ye, anaɓe shãngni “Anaɓe N tengse ang rinign, Ying ɓoo ng wɔ̃keni." kɔ arugoko, wu vipeleni sɔ̃ɔyãa alaɓe loo tung kodanga ɓe. ⁴ Aruviya wuko shãng amↄngɓↄɔ aru diki nawatatiː “Laa sɔɔ wɔ̃ke a wu vipleniyi walikãng a diki nawatati." ⁵ Ɓɔɔ tɔti a vusu mɔng goronko shãngni, “Ying ɓoo ng mɔng wɔ̃keni ɓa” ⁶ Arugoko, yaase shↄngɓɔↄyi yii ɓoo mɔng wɔ̃keni ɓi, ɓɔɔ shↄngɓe shɔng sii waase yii ruu tɔ̃ɔving ye yii de kpaa ɓooni ɓa aruɓe yii de dũngyãa ɓa. ⁷ Arugoko Laa sɔɔ rↄↄ diki ɓɔɔ tɔti, a ɓaa wu ni “Lami” alaɓe shãng yãa ni Dawuda anaɓe shɔng zɔ̃ɔ ruɓi ye tɛ̃ɛtɛ̃ɛ ni; “Lami nↄ na tãa wu yiriyãa ye, nↄ na lake nↄ sĩngsĩng ɓa” ⁸ Aruviya na Joshuwa aa yii wɔ̃keni kↄtↄ, Laa na de sɔɔ shãng yãa ɓa aru diki ɓɔɔ ɓa. ⁹ Arugoko shɔng yaa diki Wɔ̃keni aru Laa shↄngyii. ¹⁰ Aruviya shↄngɓe na ɓoo Laa wɔ̃keni ye ng kpaa wɔ̃keni a wu yuu vipeleniyi, anaɓe Laa wɔ̃ke a wu ɓe. ¹¹ Arugoko wo pele labĩng-labĩng aruɓe wo daa ɓoo wɔ̃keni ɓi, aruɓe shɔngɓɔɔ ɓa goro ɓe daa wete a vusu zɔng dũngniyãaɓa ɓewa anaɓe yii pele ɓe. ¹² Aruviya Laa ruu surubi ani ɓɔɔ kaaka ɓɔɔ wu yãa a yuu a jãa yewa yãa-ziti. Wuko daale asɔɔ vaase suru ɓɔɔ surubi, ɓɔɔ ɓe yĩriyi ɓɔɔ pɔ̃pɔ̃rɔ kaka, ɓɔɔ zenungye wu too lerenignyi ɓɔɔ vipeleni ɓe sĩngsĩngyi. ¹³ Viɓɔɔ ɓa ɓe shↄng taake a vusu vɔ̃ↄni a Laa watĩng ɓa, vizeniwuko vii walikãng a wu tĩng gbang ɓɔɔ puuni a shɔngɓe wong aa wu viɓe wo pele walikãng nung. ¹⁴ Arugoko, ɓe taseye ni wo bↄrↄ pirisi ani ɓe tuke ni lapayi, Yeso ɓe wuko Laa Jaa, wo yiseta ni kaaka wo yãashãngni. ¹⁵ Aruviya wo bↄrↄ pirisi ɓani ɓa ɓe tãa wo nugnkↄngni ɓa aru wo jileni bii ɓa, vizeniwuko, wo shↄngɓɔɔ ani ɓe shↄng maase wu dɔ̃rɔngɓeweya walikãng ana wo ko, vigoro ɓe de pele ɓa wuko wu ruvĩni ɓa a yuu ɓa. ¹⁶ Arugoko wo waa hãmi ni kaakagn a wu ladong ɓee pãnti, aruɓe wo daa kpaa tãani nugnkɔngni wo sɔɔ kpaa pãnti ɓe daa yise wo naa ala kaseni vii.