¹ Arugoko, mazũng ɓolongɓoyi, nɔ goronko a vusu Laa ɓaani yãa. Nↄ lere aru Yeso, jaarɔɔkeni ɓↄɔ bↄrↄngbɔ pirisi ɓee wo yãashãngni. ² Wu sii shɔngnungoko a Laa bii, ɓe rɔɔ wu ɓe, anaɓe Musa wu sii jɔ shɔngnungoko a vusu Laa yee. ³ Aruviya shɔng zee Yeso bongye a jãa bongni ɓee Musa, aruviya shↄngɓe maa yee ɓe wu bɔrɔ ani a bii a jaa yee ɓi ni wu yuu. ⁴ Aruviya kɔ yee ɓeweya ɓi shↄngɓɔɔ maa ke, vizeniwuko shↄngɓe maa vi walikãng wuko Laa. ⁵ Aruviya Musa wu si shↄng nungoko ana jaashoni a vusu Laa yee, wuko wɔ̃ng shɔng aniyãa aru viɓe shɔng daa sii shãng a tĩng. ⁶ Vizeniwuko Kirisi wu ko shɔng nungoko ana Jaa ɓe wuko yubɔrɔ ɓee Laa yee. Wo ɓi wu yee wo na yise wo kaakagn ye ni kaaka ɓɔɔ tenign ɓe wo gɔre a yuu ni. ⁷ Arugoko, wɔ̃ng anaɓe Suru Ɓolongɓo shãng ɓeː "Lami, nↄ na tãa wu yiriyãa ye ⁸ nↄ na lake sĩngsĩng ɓa ana la lakeni yuu ɓa, alaɓe shↄng sii maa yii a vusu jĩngti ɓa. ⁹ Ɓemi alaɓe yebↄngwayi yii lake yuu asɔɔ maaseng, atũmpu ɓe yii zeng vipele ye ɓe saa laziti. ¹⁰ Arugoko N lese yato ni shↄng lakoo waayi. N shãngni, 'A lagandi ɓeweya yii wũngteye a yii vusu sĩngsĩng. Yii de zeng dɔ̃rↄng ɓa.' ¹¹ Wɔ̃ng anaɓe N tengse ang vusu rinignː 'Ying ɓɔng vusu yĩngsi ɓa kɔ alaɓɔɔ." ¹² Nↄ bii, mazũngyi, aruɓe nↄ shɔngɓɔɔ daa wɔ̃ng ɓani nangka sĩngsĩng ɓee anizɔng ɓa, sĩngsĩng ɓe risegn a Laa ɓee surubi animi bii. ¹³ Vizewniwuko nɔ maase we sĩngsĩng alagandi ɓeweya, aɓe shɔng na daa ɓaa kɔtɔ ni “Lami,” aruɓe shↄngɓɔɔ ɓa goro a nↄ titimi ɓe daa lake yato ɓa aru lakenishɔng ɓe ruvĩni ɓa. ¹⁴ Aruviya wo rii shɔng yãajaayi goro ɓee Kirisi ye wo na yise ye ni wo kaaka tenign a wu bii viɓe yii gaani a waa sɔ̃reni yãa. ¹⁵ Aru ɓemi ko shↄng shãng ni, “Lami, nɔ na tãa wu yiriyãa ye, nↄ na lake nɔ sĩngsĩngyi ɓa, anaɓe yii pele a la lakeniyuu." ¹⁶ Ɓiwe tãa Laa asↄɔ lake yuu weya? Ɓa shↄngɓe walikãng yii ke a tipi a vusu Masari ni Musa kaa bii ɓaya? ¹⁷ Ni shɔngɓe we lese yato ni yini ɓee saa lazit weya? Sii ɓani shↄngɓe yii pele ruvĩni, ɓe yii gigiribi wɔse a vusu jĩngti ɓaya? ¹⁸ A wee yuu tengseke ni yii daa ɓoo wu yĩngsi wɔ̃keni ɓa weya, na ɓa aru shↄngɓe yii de dũng wu yãa ɓa ɓemi ɓa? ¹⁹ Wo zeye ni yii de kpaa dɔ̃rɔng ɓooni wu yĩngsi wɔ̃keni ɓa aruɓe yii de anizɔng ɓa.