¹ Arugoko likɔtɔ wo weshoo a viɓe wo tãa ɓe, aruɓe wo daa waa ɓa fefe amɔni ɓa. ² Aruviya ruu ɓe shɔng shãng ni Laa shɔngshoniyi bii na wɔ̃ngye vi tenign, ɓɔɔ peleni ruvĩniyi ɓeweya ɓɔɔ shɔngɓe yii dũngyãa ɓa yii nang kpaa yii vidɔɔyɔni, ³ wɔng kpaa dɔ̃rɔng yuuni nukovi wo naa ɓɛ̃ɛ kpengseni bɔrɔ ɓemi ye viya? Ɓemi wuko kpengseni ɓe Daayere sii gãale wo a sɔɔ tase wo nungoko ni kaa shɔngɓe yii tãa ɓe. ⁴ A zɔng gorong ko Laa tase ni kaa vitaseniyi ɓↄɔ vii ãaniyãa ɓɔɔ vizanibiyi zɔngzɔng, ɓɔɔ ni kaa vaaseni viani ɓee Suru Laa anaɓe kase ɓe. ⁵ Aruviya ɓa aru Laa shɔngshoniyi Laa shĩng koodanga wu e ɓa, aru viɓe wong shãng ɓemi. ⁶ Vizeniwuko shɔngɓɔ a mɔngɓɔ shãngye, ni, "Ɓi we shɔngzeng, ɓe mɔ shĩng wu a sĩngsĩng weya? Kɔ jaa shɔngzeng, ɓe mɔ kɔɔ wu weya? ⁷ Mɔ pele shɔngzeng wu wɔng tɔkɔlɔng a mɔ shɔngshoniyi dɔɔ; Mɔ aa wu bongni ɓɔɔ bɔrɔ a bii. ⁸ Mɔ shĩng vi walikãng a wu tuudɔɔ." Aruviya aru wuko Laa shĩng vi walikãng a wu naa. Laa de yaa viɓɔɔ ɓa goro ɓe ɓa a wu naa ɓa. Vizeniwuko hãmi wo de ze viɓɔɔ ɓa walikãng ɓe a wu naa ɓa. ⁹ Vizeniwuko wo ze shɔngɓe shɔng shĩng wu wɔ̃ng tɔkɔlɔng a Laa shɔngshoniyi dɔɔ ɓee la pota, Yeso, ɓe shɔng aa wu bongni ɓɔɔ ani bɔrɔ aru kpãareni ɓɔɔ wu vɔɔni, aruɓe ni Laa ani pãnti daa tãa vɔɔni aru shɔngɓeweya walikãng. ¹⁰ Aruviya liise Laa kɔtɔ, aruɓe vi walikãng yii wɔ̃ngke aru wuko ɓɔɔ ni wu kaa bii ko, aru wu ese wu jaayi vɛ̃ɛni a wu bongni. Liise wu kɔtɔ wu shĩng yii shɔng kpaani kpengseni wu wɔ̃ng ɓatata ni wu kpãareniyi. ¹¹ Aruviya yii zĩngzini shɔngɓe sɔɔke vi ɓɔɔ shɔngɓe shɔng sɔɔkeyi ɓe yii mɔng keni gorong ko. Arugoko de tãa yusɛ̃ɛ ɓa wu ɓaa yii ni mazũngyi ɓa. ¹² A shãngni, “N waase mↄ rĩng a mazũngyi bii, N tãng soo aru mɔni a titi shɔng mɔɔniyi bii." ¹³ Ɓɔɔ tɔti “N azɔng a wu bii”, ɓɔɔ tɔti, “Milepĩn, Miko mi N bibi ɓɔɔ wejaayi ɓe Laa ang yii”. ¹⁴ Arugoko, ɓe taseye ni jaayi goro a vusu gigiribi ɓɔɔ kpaa, wu jↄ gorong ko a vusu dɔ̃rɔng ɓemi, aruɓe ni dɔ̃rɔng vɔɔni daa lese shɔngɓe wu kaaka nungni vↄɔ ani, ɓe wuko, vĩnivĩvĩ rãamãng ¹⁵ Viɓemi watĩng kearuɓe daa yaanaa shↄngɓe aru zaani vɔɔ yii wɔ̃ng jaashongni. ¹⁶ Aruviya nungoko ɓa Laa shɔngshoniyi ko yise yii naa ɓa, vizeniwuko Ibirayi wu shãariyi. ¹⁷ Arugoko wɔ̃ngse wu ɓatata wu wɔ̃ng ana zũngɓiyi a dɔ̃rɔngyi walikãng, aruɓe daa wɔ̃ng shɔngnugnkɔngni ɓɔɔ bɔrↄngbɔ pirisi nungoko a dɔ̃rɔng vii Laa, ɓɔɔ aruɓe daa shĩng yaaseni ruvĩni wu wɔ̃ng ɓatata aru shɔngzengyi. ¹⁸ Aruviya Yeso ni wu yuu ɓoo kpãareni asɔɔ kpaa maaseni, daa zenung tɔti kɔtɔ wu yise shↄngɓe shↄng maaseyi naa.