¹ N shang ni jaa gaani viyere, alaɓe wu dong wejaa, wu zɔnggoro ni foo, kɔ ɓe wɔ̃ngye wuko shɔngviyee. ² Vizeniwuko wu dong a shↄng gaani yee naa wuwa laɓe yeɓi tise ɓe. ³ Jↄ ananko, alaɓe wo dong wejaayi, shↄng maa wo dɔɔ a tɔkɔlɔng dɔɔknni ɓee koodanga. ⁴ Vizeniwuko alaɓe la tiseye, Laa shong wu Jaa, yeni sooye, shↄng yewu a dɔɔ rudangni ⁵ aruɓe daa raa shↄngɓe yii dong a dɔɔ rudangni, aruɓe wo daa kpaa teni ana jaayi. ⁶ Ɓɔɔ aru nↄ ɓi jaayi, Laa sɔɔ shong wu Jaa Suru a wo sĩngsĩngyi, ɓe kaa yãa, “Abba, Daa”. ⁷ Aruɓe nↄ daa wɔ̃ng tↄɓa foo ɓa, vizeniwuko nↄ ɓi jaa, nɔ na ɓi jaa, nɔ ɓi jaagaani viyere aru Laa. ⁸ Vizeniwuko a la wa, alaɓe nɔ de zee Laa ɓa, shɔng riise nɔ ana fooyi a shɔngɓe, ni yii ani kaakabiyi, ɓa ana laayi ɓa. ⁹ Vizeniwuko hãmi ɓe nɔ ɛye nɔ zee Laa, vishãngni wuko Laa ko zee nɔ, aruvi nɔng zuse tũmpu a mɔng viɓe yii kaaka ɓa ɓɔɔ nanka vitɔkɔlɔng ɓe dɔknniyi viya? Nↄ kaseke shɔng riise nɔ foo tↄti ya? ¹⁰ Nↄ shĩng nung a diki yii ɓↄɔ polo sheleyi ɓↄↄ layi ɓɔɔ saayiǃ ¹¹ N zaa vɔɔye aru nɔni aru N kpãareni ni nɔni na wɔ̃ngye kɔvɛ̃. ¹² N gɔ̃ɔre nↄ, mazũngyi, nↄ wɔ̃ng ana mini, aruviya N wɔ̃ngye jɔ ana nɔko. Nↄ de peleng ruvĩni ɓↄɔ ɓa. ¹³ Vizeniwuko nↄ zeye ni ɓi aru vↄↄ sɛ̃ɛbi ko N waase nↄ yãa poloruu tɔ̃ɔving a tĩng. ¹⁴ Ɓɔɔ ɓe wɔ̃ngye ng yuyↄreni ɓee bii shĩng nɔ a vusu maaseni, nↄ de mileng ɓa tɔkɔlɔng kↄ nↄ ɓɛ̃ng kɔtɔ ɓa. Viɓe nↄ pele wuko nɔ teng weni N ɓi Laa shↄngshoni, weni N sii ɓi Yeso Kirisi ni wu yuu. ¹⁵ Nↄ zuuku hãmi a mɔngɓe weya? Aruviya N shangshe nɔ ye ni, nɔ na sii zɔ̃ɔ nɔ nung kɔtɔ asɔɔ ang. ¹⁶ Arugoko hãmi, N rii nɔ shɔngpong ye aruɓe N gãale nↄ ruu nungoko ya? ¹⁷ Yii kase yii shaa nɔ yuu ni kaaka, vizeniwuko ɓa aru vi tɔ̃ↄving ɓa. Yii kaseke yii ziinɔyãa aru ɓe nɔ da kase yii vɛ̃ɛni ɓe. ¹⁸ Likↄtↄ shɔ̃ng dũng viɓe tↄↄving ɓe, ɓɔɔ ɓa alaɓe N a nↄ bii ko shee ɓa. ¹⁹ Maa jaayi kpatakpa, N tãa kpãareni ɓe jaa yeeniye aru nɔni naɓa shɔng kpaa Kirisi ye a nɔ bii ɓa. ²⁰ Na ɓi N kaseni nang kpang yuu ye a nɔ bii hãmi aruɓe N daa kↄseng yãa shangni, aruviya N yɔreyu ye aru nↄni. ²¹ Nɔ gãaleng ta, nɔ ɓe nↄ kaseke nɔ wɔ̃ng a dɔɔ rudangni, nↄ de weeshoo ɓa a viɓe rudangni shãng ɓaya? ²² Aruviya shɔng binke ni Ibirayi wu jaayi ziti, goro ɓɔɔ ɓi sooye foo jaa, goro ɓɔɔ ɓi jaasooye ɓee yee ɓe. ²³ Goro ɓi jaasooye foo yee wu ni dɔ̃rɔng sɛ̃ɛbi, vizeniwuko goro ɓɔɔ ɓi sooye ɓe yee wu ni dɔ̃rɔng vaaseni. ²⁴ Shɔng zenung kɔseni viɓemiyi kɔtɔ ana vivɔ̃ɔseni, aruviya sooye ɓemi yii wɔ̃ng ana maaniyãayi ziti. Goro a yii titi ke a Kɔpɔ Sinai sɔɔ yee jaayi a vusu wɔ̃ngni foo. Ɓemi wuko Hajara. ²⁵ Hãmi Hajara wɔ̃ng ana Kɔpɔ Sinai a vusu Araba; sɔɔ wɔ̃ng ana Urushelima ɓee hãmi, aruviya wu a vusu wɔ̃ngni foo ni wu jaayi. ²⁶ Vizeniwuko Urushelima ɓe a lapa wu wɔ̃ngni kɔvɛ̃, ɓɔɔ wu ko wo naa. ²⁷ Aruviya shɔng binke ni, "Pele puruyato ta, sooye tɔ̃ɔri ɓe sii wu jaa ɓa; kaayãa ta mɔ sɔɔ langyãa puruyato, mɔko ɓe mɔ ɓa a vusu kpãareni ɓee jaa yeni ɓa; aruviya jaayi ɓee sooye ɓe sii wu a bĩni jãa sooye ɓe wu jere sii ani ni shangni" ²⁸ Vizeniwuko Nɔ ko, mazũngyi, ana Ishaku, nɔ ɓi jaa vaaseni. ²⁹ A la wa shɔngɓe shɔng yee wu ni dɔ̃rɔng sɛ̃ɛbi kpãare shɔngɓe shɔng yee wu ni dɔ̃rɔng Suru. Jɔ ananko hãmi. ³⁰ Vizeniwuko ɓivi labiniyi yii shãng viya? "Langte jaa sooye foo ta ni wu jaani. Aruviya jaa sooye foo daa vaase viyere ɓa ni sooye ɓee wu wɔ̃ngni kɔvɛ̃ ɓa." ³¹ Arugoko, mazũngyi, wo ɓa sooye foo jaayi ɓa, vizeniwuko wo ɓi sooye ɓe wu wɔ̃ngni kɔvɛ̃ ɓee.