¹ Shↄng vi wureni Galatiyayi! Ɓi we pele nɔ gãng weya? A nↄ watĩng ko shↄng tase Yeso ɓe shɔng ɓa wu na a la gbang. ² Ɓemi ɓi vi goro ko shee ɓe N kase N mante a nↄ bii: Nↄ tee Suru aru vipeleni ɓe rudani ya kɔ ni tãani gn shĩngni? ³ Nↄ jãamɛ kɔtɔ ya? Ɓe nↄ gaani Suru, nↄ kase hãmi nↄ sɔ̃ɔre yãa ni bii ya? ⁴ Nↄ kpãare vi vɛ̃ɛni aru vi kɔvɛ̃ ya-na wɔ̃ngye ananko ɓa aru viɓɔɔ ɓa ya? ⁵ Shɔngɓe a nɔ Suru a sↄↄ pele vi zaani bii a nↄ titi peleni vipeleni ruudani kↄ ni tãani gn shĩngni ya? ⁶ Anaɓe Ibirayi "azↄng a Laa shↄng sɔɔ gãa wu a shↄng tɔ̃ving,” ⁷ a dɔ̃rↄng goro ɓemi ko, nↄ zeke, ni shↄngɓe yii shĩng gn yii ko Ibirayi jaa yii. ⁸ Aɓe labini, ze ye tɛ̃tɛ̃ ni Laa daa kpengse shↄngɓe yii de ze Laa ɓa ni shĩngni gn, waase Ibirayi polo ruu tɔ̃ving tɛ̃tɛ̃, ni, “A mɔ bii ko shↄng koodanga yii walikãng ying kpaa zuuku." ⁹ Arugoko hãmi, Shↄngɓe yii shɔng shĩngni gn yii kpaa zuuku ni Ibirayi ni, ɓi shↄng shĩngni gn. ¹⁰ Shↄngɓe ying a kaaka a yuu vipeleni ruudani yii a vusu leseni; anaɓe shɔng binke ni, "Leseni ɓi shↄngɓe na de dũng viɓe shɔng binke a labini ɓe ruudani ɓemi ɓa, a sɔɔ pele ɓa.” ¹¹ Hãmi a gaa gbang ni shↄngɓɔↄ ɓa goro shɔng kpengse wu a Laa watĩng ni ruudani ɓa, aru viya, "Shↄng tɔ̃ving ying wɔ̃ng ni shĩngni gn.” ¹² Ruudani ɓa aru shĩngni gn ɓa, “Shↄngɓe na pele vipeleni ruudani ng wɔ̃ng jɔ ni yini” ¹³ Kirisi rawo yuu a yuu leseni ɓee ruudani ni wɔ̃ngni leseni aru wɔ̃ngni- anaɓe shɔng binke ni, “Leseni ɓi shↄngɓe shↄng taawu a yuu la”- ¹⁴ aruɓe zuuku ɓee Ibirayi daa e shↄngɓe yii de ze Laa ɓa bii a vusu Kirisi Yeso, aruɓe ni shĩngni gn wo daa tee vaaseni ɓee Suru. ¹⁵ Maazungyi, N shãng yãa pĩn anaa shↄngzeng. Laɓe shɔngzeng maniyãa na wɔ̃ng ye ɓatata ni ruudani, shↄngɓↄɔ ɓa ɓe daa too ni kati kↄ wu pãngse ɓↄↄ a yuupa ɓa. ¹⁶ Hãmi vaaseni ɓe shↄng shãngshe Ibirayi ni wu shãari. De tↄɔ ɓa ni, "ni wu shãariyi ɓa”, tase shɔng vɛ̃ɛni, tase ke shɔng goro ko shee, "ni mɔ shãari, ɓe wuko Kirisi. ¹⁷ Viɓe N shãng hãmi wuko: Ruudani, ɓe e a saa 430 (labãti ɓɔɔ bãti atu kop) a wa tĩng, de shĩng ɓa ni kati maniyãa ɓe Laa lo tɛ̃tɛ̃ ɓa, wu lese vaaseni ɓa. ¹⁸ Aruviya viyere na e ni ruudani, de tase ni de e tɔɓa ni vaaseni ɓa. Laa a Ibirayi kɔvɛ̃ ni vaaseni. ¹⁹ Ɓi tɔti, viya, tikiki ruudani ya? Shↄng pãngse aru ruvĩni awaa laɓe shãari Ibirayi daa e shɔngɓe shɔng vaase yii ɓe. Shɔng rɔɔ ruudani ni kaa Laa jaashoniyi ni kaa naa shɔng gonteni shɔng. ²⁰ Hãmi shↄng gonteni shɔng tase ke jãa shɔng goro kɔtɔ. Laa ko goro. ²¹ Ruudani sɔɔ wɔ̃ng a yuu vaaseni Laa ya? Ɓa ananko ɓaǃ Aru shɔng na a ruudani wu a surubi, peleni ruu tɔ̃ving ng ke nungoko ni ruudani. ²² Labini Laa maa vi walikãng a dɔɔ ruvĩni aruɓe shɔng daa yaa shɔngɓe yii a zɔng Yeso Kirisi vaaseni ɓee shĩngni gn. ²³ Hãmi alaɓe shĩngni gn de e ɓa, shɔng maa wo dɔɔ a vusu ruudani, a maa wo dɔɔ awaa laɓe shɔng kese shĩngni gn. ²⁴ Arugoko ruudani wɔ̃ng wo shɔng gaani awaa laɓe Kirisi e ɓe, aruɓe wo daa kpeng aru shĩngni gn. ²⁵ Hãmi shĩngni gn e ye, wo tↄɓa a shɔng gaani na ɓa. ²⁶ Aruviya nɔ walikãng Laa jaayi aru shĩngni gn a vusu Yeso Kirisi. ²⁷ Aru nɔ shↄngɓe yii walikãng yii pele batizima ni Kirisi nↄ ɓose Kirisi ye. ²⁸ Shↄngɓɔɔ tɔɓa shↄng Ibirayi kɔ shↄng Giriki ɓa, Shↄngɓɔɔ tɔɓa shↄng foo kɔ shↄng yee ɓa, Shↄngɓɔɔ tɔɓa veeye kɔ sooye ɓa, aru nɔ walikãng goro a Kirisi Yeso. ²⁹ Nↄ na ɓi Yeso ɓe, nↄ ɓi Ibirayi shãariyi, nɔ tɔti shↄng kpaani viyere aru vaaseni.