¹ Alaɓiko atũmpu saa kopi atu dɛ̃ɛro N waa paa Urushelima ni Baranaba, N too Titus ni mini. ² N waa aru ruu keseni suru ɓe Laa taseng ɓe N sɔɔ shĩng a yii watĩng poloruu tɔ̃ɔving ɓe N waayãa aru ni a shↄngɓe yii sii dũng Laa ɓa bii. N shãngyãa ni shɔngɓe yii dee tɔ̃ɔving ni kaati, aruɓe N daa zeke N de yule ɓa-kɔ N de yuu ɓa- kɔvɛ̃ ɓa. ³ Kɔ Titus ɓe wɔ̃ngni mini, ɓe wu ɓi shↄng Giriki, shɔng de shĩng wu ɓa wu ye sháa ɓa. ⁴ Maazung yi ɓe jĩngni yi e a vusu vɔ̃seni yi ze wo wɔ̃ngni ɓatata ɓe wo kpaa a vusu Yeso Kirisi. Yi kase yi risewo yi jaadɔɔ, ⁵ Wo bẽe ke wo roore yuu ayi bii a là wa, aruɓbe nungoko polo ruu tɔ̃ɔving daa wɔ̃ng ni nↄni ɓe. ⁶ Vizeniwuko shↄngɓe dee weni yii shɔng tɔ̃ɔving (kↄ viɓeweya ɓe yii pele yii wareng ɓa a bii ɓa, aruviya Laa sɛ̃ng shↄngbↄↄ ɓa)- shↄngɓe, N shãng, yii dee tɔ̃ↄving yii de pãngseng vibↄɔ ɓa a bii. ⁷ Anakaaɓɔ, yii zeke ni shↄng ang waaniyãa ɓee poloruu tɔ̃ɔving ye aru shↄngɓe shɔng de yere yii shaa ɓa yii bii, anaɓe shↄng aa Bituru waaniyãa poloruu tɔ̃ɔving a shↄngɓe yii yee shaa ye bii. ⁸ Aruviya Laa, ɓe peleshoni ni Bituru aru wu rii jaadɔɔrɔɔkeni a yuu shɔngɓe yii de yee shaa ɓa bii, pele shoni jↄ ananko ni mini aru shↄng ɓe yii sii dũng Laa ɓa bii. ⁹ Alaɓe Yakubu, Kefasi, ɓɔɔ Yɔhana, ɓe yii ruushãngni tɔ̃ɔving ani ayuu ana layinijaakayi, yii too pãnti ɓe shɔng ang ɓe ye, yii aa Baranaba ni mini kaakanaa ɓaaseniyu. Yii kase ni wo waa shↄngɓe yii sii dũng Laa ɓa bii ta yii sɔɔ waa shɔng ɓe shɔng yereyi shaa bii jɔ. ¹⁰ Yii gɔ̃ɔre vi goro ni wo yenugn aru shɔngrangyi, ɓe ɓi jɔ viɓe sing kaseke N pele ɓe ko. ¹¹ Vizeniwuko alaɓe Kefasi ɛ Antakiya ye, N shii a wu yuu a zãare wu aruviya wu wɔ̃ngni de lii ɓa. ¹² Alaɓe shↄngveeyeɓɔↄ yii sii de ɛ Yakubu bii ɓa, Kefasi sii shaa vishãng ni shↄngɓe yii sii dũng Laa ɓa ni. Vizeniwuko alaɓe shↄngveeyeɓemiyi yii ɛye ɓe, a daa a kaati asɔɔ taa bii ni gaa ni shɔngɓe yii sii dũng Laa ɓa bii. Zaa vɔɔ aru shↄngɓe yii sii kase ke yereni shaa. ¹³ Gãasi shↄng Yahuda yii sɔɔ dũng wu dↄↄ lakenishɔng jↄ. Yii shĩng Baranaba dũng yii dɔɔ lakenishɔng jɔ. ¹⁴ Alaɓe N zeye ni yii ruubii de waa ɓa ni dũngni nungoko poloruu tɔ̃ɔving ɓa, N gãale Kefasi a shɔng watĩng walikãng, “Mↄ na ɓi shↄng Yahuda mↄ sↄↄ kase mɔ kn ana shↄngɓe yii sii dũng Laa ɓa ɓa ana shɔng Yahuda ɓa, aruvi mɔ kase mɔ shĩng shↄng ɓe yii sii dũng Laa ɓa ni kaaka bii yii kn ana shɔng Yahudayi viya?” ¹⁵ Wo bibi shↄng ye wo shɔng Yahuda ɓa ana shɔng ɓe yii sii dũng Laa ɓa shɔng ruvĩni ɓa; ¹⁶ Ni ɓemi walkãng wo zeye ni shↄng kpengse shɔngɓɔɔ ɓa aru wu vipeleni ɓee rudangni ɓa naɓa aru wu gnshĩngni a Yeso Kirisi bii ɓa. Arugoko wo bibi ɓe wo azɔngye a Yeso Kirisi aruɓe wo daa kpeng aru wo gnshĩngni a vusu Kirisi ɓa aru wo shoni ɓee rudangni ɓa. Aruviya ni shoni rudangni shↄngzengɓɔɔ daa kpengse wu yuu ɓa. ¹⁷ Vizeniwuko, alaɓe wo nang bee ke wo kpengse wo yuu a vusu Kirisi, wo bibi shɔng kpaa wo ye shɔng ruvĩniyi, Kirisi wu hãmi yubɔrɔ shɔng ruvĩniyi ya? Ba tikikiǃ ¹⁸ Aruviya N nang maa viɓe N sii lese ɓe, N tase ye ni nungoko N shɔng peleni ruvĩni. ¹⁹ Aruviya ni kaa rudangni N vɔɔye aru rudangni, aruɓe N daa wɔ̃ng Laa ɓee. Shɔng jishengye ni Kirisi. ²⁰ Ɓa tↄti miko N wɔ̃ng ɓa, ɓi Kirisi wɔ̃ng ang bii. N wɔ̃ngni ni surubi a vusu gigiri bii hami N wɔ̃ng ni gn shĩngni a vusu Laa Jaa, ɓe kaseng asɔɔ aa wu yuu aru mini. ²¹ N de shĩng Laa pãnti ɓa ni kaati ɓa, aruviya shɔng nang kpaa wɔ̃ngni yato ɓolongɓo aru dũngni rudangni, taseye ni Kirisi vɔ̃ɔni wɔ̃ngye kɔvɛ̃!