¹ Arugoko nɔ mante Laa zɔng, anaa jaa ɓe shɔng kase wu vɛ̃ɛni. ² Nɔ kn a vusu kaseni, anaa ɓe Kirisi sɔɔ kase wo a awu yuu aru woni, sununu vi ani ɓɔɔ vi shaareni ɓee Laa. ³ Vileseni wuko peleni kɔng kɔ zɔng virĩngte kɔ kaseni yuu shɔng na shãng ɓa ni a nɔ titi ɓa, aru ɓemi yii de lii ɓa a Laa shɔng kpelenke yii bii ɓa. ⁴ Nɔna yaa virĩngte ɓa, kɔ shãngni yãa wureni, ɓɔɔ tɔ nanka showa--ɓe yii walikãng de lii ɓa. Vipeleni wuko lii ke nɔ tase dɔɔreni. ⁵ Aruviya nɔ zeye shɔng peleni kɔng, shɔng rĩngte, kɔ shɔng kaseni yuu--N tɔ, shɔng dɔngni jaa naari--ying kpaa viyere ɓa a rooni kpanti Kirisi ɓɔɔ Laa ɓa. ⁶ Shɔngɓɔɔ na lakenɔ ɓa ni yãa jĩni ɓa, aruviya aru zɔng viɓemi yii ko Laa leseni yato e a yuu jaa ɓa yii tãa yãa ɓa. ⁷ Arugoko, nɔ na ɓase ɓa ni yini ɓa. ⁸ Aruviya nɔ sii a tĩngri, vizeni wuko nɔ hãmi a ɓengkeni Daayere. Nɔ kn anaa jaa mɔng ɓengkeni ⁹ (aru reni mɔng ɓengkeni too vi tɔ̃ving walikãng, ɓolongɓo, ɓɔɔ nungoko), ¹⁰ nɔ sɔɔ maase nɔ sɔɔ shĩng naa a viɓe waare Daayere a bii. ¹¹ Nɔ na ɓase yuu ɓa ni vi peleni reni ɓee mɔng tĩngri ɓa, vizeni wuko nɔ keseyi yuu bang. ¹² Aru ɓi vi yuusɛ̃ɛ shɔng wu shãng viɓe yii pele a mɔng tĩngri. ¹³ Vizeni wuko shɔng na keseye a mɔng ɓengkeni, dee ye gbang. ¹⁴ Aruviya viɓe na dee ye gbang ɓi ɓengkeni. Arugoko shɔng shãng ni, "Yupata, mɔko shɔng nungrooni, mɔ sɔɔ yuupa a mɔ vɔɔni, Kirisi daa sɔɔ puuse mɔ kɔtɔ." ¹⁵ Mɔ ze dɔɔ ɓe mɔ kn tɔ̃ving--ɓa anaa shɔng vi wureni ɓa anaa shɔng kpɛ̃ɛni. ¹⁶ Nɔ knni la ni aruviya dikiyi ɓi ɓee nankayi. ¹⁷ Arugoko nɔna wureɓa, vizeni wuko nɔ wɔ̃ngni zeni a viɓe Daayere kase ɓe. ¹⁸ Nɔ na ɓoo saa ɓa wu pele nɔ ɓa, aru shĩng shɔng a dɔ̃rɔng peleni viɓe ɓa dang ɓa. Vipeleni wuko, mɔ yini Suru Laa, ¹⁹ Nɔ shãngshe wee yãa a vusu zabura ɓɔɔ tãngni soo ɓɔɔ soo suruyi, nɔ tãngke ɓɔɔ dɔɔni a Daayere ni nɔ sĩngsĩng walikãng, ²⁰ nɔ tase dɔɔreni a vi dikikidi walikãng, a titi Daayere Yeso Kirisi rĩng, wu waa Daa Laa, ²¹ nɔ a yuu a wee bii, a vusu dɔɔreni aru Kirisi. ²² Sooyeyi, nɔ a yuu anɔ jereyi bii, anaa Daayere. ²³ Aruviya jere ko yuu bɔrɔ ɓee wu soo anaa ɓe Kirisi wu jɔ yuu bɔrɔ shɔng dũngni, ni wu yuu wuko kpengse bii. ²⁴ Vizeni wuko anaa ɓe shɔng dũngni yii a yuu a Kirisi jɔ ananko sooyeyi yii a yuu a yii jereyi a vi walikãng. ²⁵ Jereyi, nɔ kasenɔ sooyeyi, anaa Kirisi kase shɔng dũngni a awu yuu aru wuni ²⁶ aruɓe daa sɔ̃ɔke wu, sɔ̃ɔke wu ni mɛɛ ɓɔɔ yãa shãngni, ²⁷ aruɓe daa ese shɔng dũngni awu bii anaa bɔngseni, ɓani leseni kɔ tutu risi ɓa kɔ zɔng viɓɔɔ ɓa, wu wɔ̃ng kpelengke ɓɔɔ vi langseni ɓa. ²⁸ A dɔ̃rɔng goro mi ko lii kɔtɔ jereyi yii kaseyi sooyeyi anaa yii bii. Shɔngɓe na kase wu soo ye kase wu yuu. ²⁹ Aru shɔngɓɔɔ ɓa ɓe bɛ̃ɛ wu sɛ̃ɛbi ɓa, vizeni wuko wung gonteyi a sɔɔ kɔyi, anaa ɓe Kirisi gonte a sɔɔ kɔɔ mɔng gɔ̃ɔreni, ³⁰ aruviya wo ɓi wu shɔng bii yii ³¹ Aru viɓemi veeye daa yaa yeɓi ɓɔɔ yingɓi wu sɔɔ ɓaase ni wu soo ni, ziti ying sɔɔ wɔ̃ng sɛ̃ɛbi goro. ³² Vɔ̃ɔseni nungoko mi bɔrɔngbɔ--vizeni wuko N shãng yãa aru Kirisi ɓɔɔ shɔng dũngniyi. ³³ De leseɓa, kɔ nɔ shɔng ɓeweya wu kase wu soo anaa wu yuu, sooye wu sɔɔ a wu jere bɔrɔ.