¹ N, arugoko, anaa shɔng a gãyã aru Daayere, kɔsenɔ yãa nɔ kn dang aru ɓaani yãa ɓe shɔng ɓaanɔ ɓe. ² N kɔsenɔ yãa nɔ wɔ̃ngni bɔrɔ rooreni yuu ɓɔɔ sĩngsĩng zãngzãng ɓɔɔ lemɓa, yiseni wee a kaseni. ³ Nɔ pele viɓe daa yise yuu ɓaseni Suru a maani ɓatata. ⁴ Bii goro Suru tɔti goro, tɔti anaa ɓe shɔng ɓaanɔ yãa a tenign goro a nɔ ɓaani yãa. ⁵ Daayere tɔti goro, gnshĩngni goro, batizima goro, ⁶ Laa tɔti goro ɓɔɔ Daa ɓee walikãng, ɓe wu a yuu walikãng tɔti a walikãng ɓɔɔ a vusu wakilãng. ⁷ A wo shɔng goro ɓeweya shɔng a wo pãnti a dɔɔ ɓe shɔng maa ani Kirisi. ⁸ A naa ɓe labini shãng niː "Alaɓe vɔ̃ng koolapa ye, kese fooyi a wɔ̃ngni foo, asɔɔ a shɔngzengyi ani. ⁹ "Waani koolapa" taseni viya, ɓani lɔɔ dii tipi koodanga ɓa ya? ¹⁰ Shɔng ɓe lɔɔ dii ɓi tɔti shɔngɓe ko vɔ̃ng ɓe jãa koolapayi walikãng, aruɓe daa yise viyi walikãng ɓe. ¹¹ Kirisi ɓaa shɔngɓɔɔ yii wɔ̃ng jaarɔɔkeniyi, shɔngɓɔɔ yii shɔng zenitĩngyi, shɔngɓɔɔ yii shɔng waani yãayi, ɓɔɔ shɔng gaani shɔngyi ɓɔɔ shɔng manteniyi ¹² wu vase Laa shɔng kpelengkpeyi shoni vipeleni, aru maani Kirisi bii ɓe, ¹³ pele viɓemi yii aruɓe wo daa ɓaase yuu zɔng ani ɓɔɔ zeni ɓee Jaa Laa, aruɓe wo shoo daa lo anaa shɔngɓe yii tise nung waareni ruu Kirisi ye ɓe. ¹⁴ Kirisi bɔngse wo ni paa aruɓe wo daa sɔɔ tɔɓa wejaa ɓa ɓe zãasi rikeyi tũmpu ɓɔɔ tĩng, ɓe kɔ zɔng zãasi ɓeweya toyi ni gaa ni manteni ɓɔɔ ɓee shɔng yãa kpɛ̃ɛni a yii yãa lakeni. ¹⁵ Vipeleni wuko, shãngni nungoko a kaseni, wo bɔngni paa a zɔng dɔ̃rɔng ɓeweya a wuni ɓe wu yuu bɔrɔ, ɓe wuko, Kirisi. ¹⁶ Kirisi maa bii walikãng, asɔɔ ɓaaseyi a yãawe ni zɔng yiseni naa kɔ̃ɔte ɓeweya, zɔng ɓeweya na pele shoni ye a yãawe, ɓe shĩng bii wu bɔng aruɓe daa maa wu yuu a vusu kaseni. ¹⁷ Arugoko, N shãng N sɔɔ shii a yuu ɓemi a vusu Daayere, ni nɔna paase knni tɔɓa anaa shɔngɓe yii de ze Laa ɓa yii kn ɓa anaa ɓe yii yato kase ɓe. ¹⁸ Yii zeni a tĩngri gbĩtĩngbĩ, yii ɓa a surubi ɓee Laa ɓa aru vi nungbãti ɓe a yii bii ɓe, aru yii lakeni sĩngsĩng. ¹⁹ Yii rii vi yuu sɛ̃ɛ aru viɓe yii pele ni yii yuu ɓee sũnɔ, yii sɔɔ mante kɔ zɔng vi rĩngte ɓewe ya ɓɔɔ kaseni yuu. ²⁰ Vizeni wuko ɓa viɓe nɔ mante aru Kirisi ɓa. ²¹ N mile weni nɔ tãaye aru wuni, tɔni nɔ manteye a wu bii, anaa ɓe nungoko a vusu Yeso ɓe. ²² Shɔng mantenɔ ni nɔ wɔɔse gbengti vi surubi, nɔ sɔɔ wɔɔse gbengti shɔngzeng. Ɓi gbengti shɔngzeng ɓe lese aru nanka kaseni. ²³ Shɔng mantenɔ ni nɔ paase ta a vusu suru ɓe a nɔ yato, ²⁴ nɔ sɔɔ ɓose polo shɔngzeng ɓe shɔng take a Laa zɔngbi--a tɔ̃ving nungoko ɓɔɔ ɓolongɓo. ²⁵ Arugoko, nɔ yaa yãa jĩni, nɔ shɔng ɓeweya wu shãngshe wu shɔng yãakaasi nungoko, aru wo a yãawe goro. ²⁶ Nɔ yato na lese ye nɔna pele ruvĩni ɓa. Nɔna yaa ɓa laa wu yeese nɔ a yato leseni ɓa. ²⁷ Nɔna yaase vĩnivĩvĩ rãmang dɔ̃rɔng ɓa. ²⁸ Shɔngɓe na ɓɔɔ kɔtɔ wu yaa ɓɔɔni. Vipeleni wuko, wu pele shoni, vi peleni a viɓe lii kɔtɔ ni wu naa, aruɓe daa kpaa viɓe yii daa vase ni shɔngɓe wu a kaseni ɓe. ²⁹ Nɔ na yaa shãngni yãa nanka ɓa wu ke anɔ yãa ɓa. Nɔ pele yãa shãngni ɓe lii kɔtɔ ko shee aru shɔngɓe yii kase tãani, aru nɔ yãa shãngni yii daa a pãnti a shɔng tãani yii shoo ɓe. ³⁰ Nɔ na lese Suru Kpelengkpe Laa yato ɓa, aruviya aru wuko shɔng shĩngshe nɔ naa aru diki raani yuu. ³¹ Nɔ vaaseni yato lani ni walikãng, leseni yato, yãadong, ɓɔɔ dãani yenti, ni gãasi vi nanka ɓeweya ni. ³² Nɔ pele wee tɔ̃ving, sĩngsĩng zãngzãng, yaaseni wee ruvĩni, anaa ɓe Laa yaase nɔ a vusu Kirisi ɓe.