¹ Aru ɓemiko N, Bulusi, ɓe a gãyã ɓee Kirisi Yeso aru nɔko ɓe nɔ de ze Laa ɓa -- ² N ɓaa weni nɔ tãa ruu vi peleni pãnti Laa ɓe ang aru nɔni ye. ³ Shɔng taseng vi vɔ̃ɔseni a zeni, a ɓe N binke pota. ⁴ Laɓe nɔna ɓaleye aru viɓemi, nɔng ze N kpɛ̃ɛni kɔtɔ a vusu vi vɔ̃ɔseni aru Kirisi. ⁵ Sii a lakoo ɓɔɔ yii vi vɔ̃ɔsemi sii de tase ɓa a shɔngzeng jaayi ɓa. Vizeni wuko hãmi shɔng keseye a Suru a wu jaarɔɔkeniyi kpelengkpe ɓɔɔ shɔng zenitĩngyi. ⁶ Vɔ̃ɔseni nungoko mi ni shɔng ɓe yii de ze Laa ɓa yiɓi shɔng roonikoo ko jɔ, ɓɔɔ naasɛ̃ɛng ɓee bii, yii vase vaaseni a vusu Kirisi Yeso aru ruu tɔ̃ving. ⁷ Aru N rii jaashoni ɓee ruu tɔ̃ving mi a Laa ani pãnti ɓe ang aru vipeleni wu kaaka. ⁸ Ang bii -- N zeye miko je tɔkɔlɔng a titi Laa shɔng kpelengkpe yii walikãng--shɔng a pãnti mi, aru waaseni shɔngɓe yii de ze Laa ɓa vinaa ɓe shɔng bee ɓa ɓee Kirisi. ⁹ N sɔɔ ese ɓengkeni shɔng ɓeweya aru kaseni --- vi vɔ̃ɔseni Laa a lakooyi, ɓe take vi walikãng. ¹⁰ Kaseni ɓemi wɔ̃ngni zeni a shɔng dũngni aruɓe shɔng roonikooyi ɓɔɔ shɔng kaaka naa a mɔng wɔ̃ngni koolapa ɓe da eke wu ze vi takeni vɛ̃ɛni ɓee kpɛ̃ɛni Laa. ¹¹ Ɓemi waatĩng anaa ɓe kaseni dongdong ɓe sɔ̃ɔre yãa a vusu Yeso Kirisi wo Daayere. ¹² Aru a vusu Kirisi wo kpaa kaaka vinaa ni kaaka bii ni aru wo gn shĩngni a wuni. ¹³ Arugoko N gãalenɔ nɔ na vɔɔse bii ɓa aru N kpãareni ɓe aru nɔni, ɓe ɓi nɔ bɔngseni. ¹⁴ Aru viɓemi ko N tɛ̃ɛng gbĩnti a Daa bii, ¹⁵ ɓe awu bii ko yee ɓeweya a koolapa ɓɔɔ koodanga ɓaayi rĩng. ¹⁶ N gɔ̃ɔre ni wu a mɔ, anaa wu ani bɔngni, wu maase nɔ sĩngsĩng ni kaaka a wu Suru, ɓe a mɔ vusu shɔngzeng. ¹⁷ N gɔ̃ɔre ni Kirisi wu wɔ̃ng a sĩngsĩng a gnshĩngni aruɓe nɔ daa yidĩngli asɔɔ lotung a wu kaseni, ¹⁸ aruɓe nɔ daa zeke, ni Laa shɔng kpelengkpe yini walikãng, ɓivi yengteni, ɓɔɔ ranteni, ɓɔɔ biini, ɓɔɔ shooni, ¹⁹ ɓɔɔ nɔ sɔɔ ze kaseni Kirisi, ɓe jãa zeni kɔtɔ, aruɓe nɔ daa yini ni yiseni Laa ni walikãng. ²⁰ Hãmi a wu kaabi ko ɓe pele viɓe jãa ɓe wo gɔ̃ɔre kɔ a leere walikãng, a wu kaaka ɓe pelevi a wo bii ɓe, ²¹ ni wu kaa bii ko bɔngni a vusu mɔng gɔ̃ɔreni a vusu Kirisi Yeso a waa lakoo walikãng dongdong ɓɔɔ dongdong. Ananko.