¹ Ɓɔɔ tɔti anaa nɔko, nɔ sii vɔɔye anɔ nanka vipeleni ɓɔɔ ruvĩni, ² ɓe nɔ sii kn ani ɓe, anaa ɓe dɔ̃rɔng koodanga mi pele ɓe. Nɔ sii wɔ̃ng anaa roonikoo ɓee kaaka naa ɓee zãasii, suru ɓe yi pele shongni a jaa ɓe yii tãyãa ɓa. ³ Laɓe wo sii wɔ̃ng a titi shɔng mi yii walikãng, wo sii pele nanka vi leere wo gigiribi, a sɔɔ kntĩng ni leereni wo gigiribi ɓɔɔ ɓee yato. Sii a takeni wo ɓi jaa yato leseni, anaa gãasi shɔngzengyi. ⁴ Vizeni wuko Laa nugnkɔni ani vɛ̃ɛni aru wu bɔrɔ kaseni ɓe kase wo ɓe. ⁵ Laɓe wo sii vɔɔye a nanka vipeleni, sɔɔre wo ni surubi ni Kirisi ni a yãawe--aru pãnti ɓe shɔng ɓe shɔng kpengse nɔ ɓe. ⁶ Laa yuuse wo paa ni Kirisi ni a yãawe, Laa sɔɔ shĩng wo wɔ̃ngni a yãawe a mɔng koolapa a vusu Kirisi Yeso, ⁷ Aruviya a lakooyi ɓe yii daa e ke, ɓe daa tase wo bɔrɔngbɔ vinaa ɓe shɔng daa gãa ɓa ɓee wu pãnti ng tase wo ɓemi aru wu pãnti a vusu Kirisi Yeso. ⁸ Aru pãnti nɔ kpaa kpengseni a gnshĩngni, ɓemi de e ɓa ni nɔ kaabi ɓa, ɓi ani ɓee Laa, ⁹ ɓa aru vipeleni ɓa, aruɓe shɔngɓɔɔ daa gɔɔyãa ɓa . ¹⁰ Aru woɓi shɔng vipeleni ɓee Laa, takeni a vusu Kirisi Yeso wo pele vi tɔ̃ving ɓe Laa shĩng a tĩng tɛ̃tɛ̃ aru woni, aruɓe wo daa kn a vusu ɓe. ¹¹ Arugoko nɔ yeenugn ni laɓe nɔ de ze Laa ɓa a vusu gigiribi. Shɔng sii ɓaanɔ ni "Shaadĩngli" ɓe shɔng ɓaa ni "Yeenishaa" a gigiribi ɓi shɔngzeng pele ni naa. ¹² Aru a lami nɔ sii vaseni Kirisi ni, shɔng fooyi waa shɔngkoo a vusu Israyila, shɔng zangtiyi a maniyãa vaaseni, tenign ɓa ɓɔɔ nɔ Laa ɓa a koodanga ɓa. ¹³ Vizeni wuko hãmi a vusu Kirisi Yeso shɔng ɓe nɔ sii feefe ni Laa ni shɔng ese nɔ ye maani aru Kirisi kpaa. ¹⁴ Aru wuni wu yuu ɓi wo lemɓa, aruviya pele wo a yãawe goro. Ni wu sɛ̃ɛbi wãngke vaaseni yãakasi ɓe sii vase wo ɓe. ¹⁵ Yaa ruudani ni gaa ɓɔɔ wu ladani ɓɔɔ yii vipeleni aruɓe daa take shɔngzeng goro a wo titi ziti, wu ese lemɓa. ¹⁶ Kirisi sɔɔre shɔngzeng walikãng zãngzãng a vusu bii goro ni Laa ni aru wu jisheni, kese vɔɔ ɓe sii vase wo ɓe. ¹⁷ Yeso e a waa yãa ruu tɔ̃ving ɓee ɓatata anɔ bii shɔngɓe nɔ feefe ɓɔɔ ɓatata a shɔngɓe yii maani. ¹⁸ Aruviya aru Yeso wo walikãng wo vi yiseni a vusu Suru goro a Daa bii. ¹⁹ Hã̃mi tɔti, shɔngɓe yii dũng Laa ɓa tɔɓa fooyi ɓa ɓɔɔ shɔngzangtiyi. Aru ɓemi nɔ hãmi shɔng koo ni Laa shɔng ɓolongɓo ɓɔɔ shɔng yee ɓee Laa yii. ²⁰ Nɔ maa a yuu lonitung jaarɔɔkeniyi ɓɔɔ shɔng zeni yii, Yeso ni wu yuu wuko tara tungjaka. ²¹ A wuko shɔng kese maani mɔng walikãng a yãawe sɔɔ bɔng anaa mɔng gɔ̃ɔre kpelengkpe a vusu Daayere. ²² A wuko shɔng sɔɔ maanɔ a yãawe anaa mɔng wɔ̃ngni Laa a vusu Suru.