¹ Ɓulusi, jaarɔɔni ɓee Kiristi Yeso ni Laa kaseni, a waa Laa shɔng kpelengkpe ɓe a Afisa, ɓe yii azɔng a Kiristi Yeso. ² Pãnti ɓi nɔ ɓee ni wɔ̃ngni ɓatata ɓee Laa wo Daa ɓɔɔ Daayere Yeso Kirisi. ³ Dɔɔreni ɓi Laa ɓee ɓe wuko Daa ɓee wo Daayere Yeso Kirisi, ɓe awo zuuku ni zuuku ɓee suru ɓe a koolaapa ɓe a vusu Kirisi. ⁴ Laa rɔɔwo a wu bii alaɓe gaa loni tung koodanga, ni wo wɔ̃ng kpelengkpe ɓa ni ruvĩni ɓa awu nung ni kaseni. ⁵ Laa shĩng wo ke aruɓe daa te wo wu rise wo ana jaayi ni Yeso Kirisi kaabi, anaɓe wu vi kaseni tɔ̃ɔving tase ɓɜe. ⁶ Wo teni wuko tase dɔɔni ɓee wu bɔrɔngbɔ pãnti ɓe aa wo kɔvɛ̃ a vusu shɔngɓe kasewu Goro ɓemi. ⁷ A vusu Yeso Kirisi wo kpaa kpengseni ni wu kaa kpaa ɓɔɔ yaseni ɓee wo ruvĩni, anaɓe wu vinaa ɓee pãnti taseɓe. ⁸ Wuko shangshe pãnti ɓemi aru woni ni wu kpɛ̃ɛni ɓɔɔ zeni walikãng. ⁹ Laa tase wo vivɔ̃seni ɓee wu kaseni ye, anaɓe waare wu a sĩngsĩng ɓe, ɓɔɔ viɓe tase a vusu Kirisi, ¹⁰ ni wu zeni wu gongte alaɓe la yeeye ɓe, wu ese viyi walikãng a yãawe, viyi walikãng a vusu koolapa ɓɔɔ a koodanga, a shongzeng goro bi, wuko Kirisi. ¹¹ A vusu Kirisi shɔng a wo viyere, ɓe shĩng wo ye a wu vipeleni ɓe pele vi peleni walikãng anaa ɓe kase ɓe. ¹² Laa rɔɔwo anaa shɔng rooniladong aruɓe, shɔng ɓe nɔ shɔɔni tegn ye a Kirisi, ng wɔ̃ng aru dɔɔni a wu bɔngseni. ¹³ A vusu Kirisi, nɔ bibi tɔti, aleɓe nɔ na tãa ruu nungoko ye ruu tɔ̃ving nɔ kpengseni, nɔ azɔng ye a wuni shɔng sɔɔ shĩngshe nɔ naa ye a vaaseni Suru Laa, ¹⁴ ɓe wuko a dɔ̃rɔng wo viyere, wu e raani yuu viɓe ɓi wo ɓee, aru dɔɔni wu bɔngseni. ¹⁵ Aru viɓemi, N tãa nɔ ruu gnshĩngni ye a vusu Daayere Yeso ɓɔɔ nɔ kaseni aruu Laa shɔng kpelengkpe yii walikãng, ¹⁶ N de yaa dɔɔreni Laa ɓa alaɓe N shĩng nɔ ang gɔ̃ɔreni. ¹⁷ N gɔ̃ɔre ni Laa ɓee wo Daayere Yeso Kirisi, Daa ɓee bɔngni, wu anɔ suru kpɛ̃ɛni ɓɔɔ zenitĩng a wu vusu zeni. ¹⁸ N gɔɔre ni nɔ nung sĩngsĩng wu puuyi, aruɓe nɔ daa ze tenign ɓe ɓaanɔ yãa ɓɔɔ vinaayi ɓee bɔngseni viyere a titi Laa shɔng ɓolongɓo yii walikãng. ¹⁹ Ang gɔ̃ɔreni ng gɔ̃ɔre nɔ ze viɓe wu kaaka jãa gãasi kaaka ɓe a wu wu shɔng ɓe azɔng, anaa vipeleni ɓee wu kaaka maareni. ²⁰ Ɓemi ɓi kaaka naa ɓe pele a vusu Kirisi alaɓe yuuse wu paa a vɔɔni a shĩngwu a wɔ̃ngse wu a naashang a koolapa. ²¹ Wɔ̃ngse Kirisi feefe a jãa gãasi roonikoo ɓɔɔ maareni ɓɔɔ kaaka naa ɓɔɔ yiseni, ɓɔɔ rĩng walikãng ɓe shɔng a ke. Kirisi ng rookoo, ɓa a lakoo mi ko shee ɓa, tɔ a lakoo ɓe daa e ɓe. ²² Laa shĩng vi walikãng a Kirisi ɓuudɔɔ a sɔɔ a shɔng dũngni ɓe wuko wɔ̃ng yuu vi walikãng. ²³ Shɔng dũngni wuko wu gigiribi, ɓe wu yini ɓe yise vi walikãng.