¹ Wejaayi, nɔ tãare yejaayi yãa a titi Daayere, aru ɓemi ko dang. ² "Mɔ a yara ɓɔɔ ina bɔrɔ" (wuko bɔrɔ ruudani ni vaaseni), ³ aruɓe da wɔ̃ngni nɔni dang mɔ sɔɔ rookoo a koodanga." ⁴ Daayi, nɔ na shĩng nɔ jaayi ɓa yii lese yato ɓa. Vipeleni wuko, bɔngse yii ta a manteni ɓɔɔ taseni ɓee Daayere ⁵ Fooyi, nɔ tãare nɔ yuubɔrɔyi shoo ta a bɔrɔ ani ɓɔɔ zaani vɔɔ, a tɔ̃vĩng ɓe anɔ sĩngsĩng. Nɔ tãareyi shoo anaa ɓe nɔng tãare Kirisi yãa. ⁶ Nɔna pele vi tɔ̃ving ɓa laɓe nɔ yuubɔrɔ de mile nɔni ko shee ɓa, aruɓe daa waareyi a bii ɓe ɓa. Vipeleni wuko, nɔ pele tɔ̃ving anaa Kirisi jaashoniyi, ɓe pele Laa kaseni ni wu sĩngsĩng. ⁷ Ni nɔ sĩngsĩng walikãng nɔ pele vi shooni, weni nɔng pele shooni ɓee Daayere ɓa ɓee shɔngzengyi ɓa, ⁸ aruviya wo zeye ni kɔ aruvi tɔ̃ving ɓe shɔng ɓewe ya pele ɓe, ng te dɔɔyɔɔni a Daayere, kɔ wu ɓi jaashooni kɔ wu kɔvɛ̃ɛ. ⁹ Yuubɔrɔ, nɔ pele nɔ jaashooniyi jɔ ananko. Nɔ na zayi bii ɓa. Nɔ zeye shɔng ɓe walikãng yii Yuubɔrɔ ɓɔɔ nɔ ɓee wu a koolapa, taseni kaseni yuu ɓa a wu bii ɓa. ¹⁰ A sɔ̃ɔreni yãa, nɔ wɔ̃ngni kaaka a Daayere bii ɓɔɔ maaseni wu kaaka. ¹¹ Nɔ ɓose vii ta ni sii ɓee Laa, aruɓe nɔ daa shii ni kaaka aru bang ɓe vĩnivĩvĩ rãmang daa ese wo ɓe. ¹² Aruviya wo nungni bang ɓa ɓee sɛ̃ɛbi ɓɔɔ kpaa ɓa, aru shɔng roonikooyi, aru kaaka naayi, aru kaaka ɓee mɔng tĩngri ɓe hãmi, aru nanka kaaka suru vĩnivĩvĩ rãmang ɓe yii wɔ̃ngni a koolapa. ¹³ Arugoko nɔ ɓose vi tani sii ɓee Laa, aruɓe nɔ daa zenung shiini a nanka diki ɓe, alaɓe nɔ na sɔ̃ɔre vi yãaye walikãng, shii ta gatangatang. ¹⁴ Shii ta tɔti gatangatang, ni soozũng bang ni a nɔ zũng, nɔ sɔɔ maa vi sii yato ɓolongɓo a yãaregn, ¹⁵ ɓɔɔ, ni shiini dɔɔ gnshĩngni, ɓe e a ruutɔ̃ving wɔ̃ngni ɓatata. ¹⁶ A vi walikãng nɔ too vi gnshĩngni, aru ɓe nɔ daa zenung saateni shɔng ɓe shɔng vi nanka ying ta walikãng. ¹⁷ Nɔ sɔ ɓose wayuu kpengseni ɓɔɔ yeewa Suru, ɓe wuko ruu Laa. ¹⁸ Ni zɔng gɔ̃ɔreni ɓewe ya ɓɔɔ beeni, nɔ gɔ̃ɔre a la ɓewe ya walikãng a vusu Suru. Wu e sɔ̃ɔni yãa ɓemi, nɔ shĩng nung dikidi ni tini kpãareni ni walikãng aɓe nɔ waare nɔ gɔ̃ɔreniyi a Laa shɔng kpelengkpe yii bii walikãng. ¹⁹ Nɔ sɔɔ gɔ̃ɔre aru mini, aruɓe shɔng daa ang ruu shãngni alaɓe nang puu yãa ye ɓe. Nɔ gɔ̃ɔre aruɓe N daa kese vi vɔ̃ɔseni nungoko ni kaaka bii gbang aru ruu tɔ̃ving. ²⁰ Aru ruu tɔ̃ving ko N wɔ̃ng jaashooni ɓe shɔng ɓoseng dĩngre saka a dɔɔ, aruɓe N daa kese a gaa gbang, anaa ɓe shɔng gãaleng ni N shãng ɓe ²¹ Tikikusi, ɓe zũng kaseni ɓɔɔ jaashooni gnshĩngni a vusu Daayere, daa shĩng kɔtɔ nɔ ze vi walikãng, aruɓe nɔ daa ze viɓe N pele ɓe. ²² N shong wu aru ɓemi ko, aruɓe nɔ daa ze dɔɔ ɓe wo wɔ̃ng ɓe, aruɓe da sɔɔ maase nɔ sĩngsĩng ɓe. ²³ Ɓatata wu wɔ̃ngni maazũngyi, ɓɔɔ kaseni ni gnshĩngni a Daa Laa ɓɔɔ Daayere Yeso Kirisi. ²⁴ Pãnti wu wɔ̃ngni shɔngɓe yii kase wo Daayere Yeso Kirisi walikãng ɓa ni jĩngni yãa kaseni ɓa.