¹ Laa naa yuse nɔ paa ni Kirisi, nɔ bee viɓe a koolapa, mɔng ɓe Kirisi wɔ̃ng a Laa kaa nashãng ɓe. ² Nɔ lere aru viɓe yii a koolapa, ɓa aru viɓe yii a koodanga ɓa. ³ Aruviya nɔ vɔɔye, shɔng vɔ̃se nɔ surubi ni Kirisi a Laa bii. ⁴ Alaɓe Kirisi na jãaye, ɓe wuko nɔ suru, nɔng sɔɔ jã jɔ ni wuni a bɔngseni. ⁵ Nɔ nung vɔɔ, hãmi, viɓe koodanga yii, - peleni kɔng, wɔ̃ngni rĩngte, kaseni vii nangka, kaseni kpãruvãvã, kaseni yuu, ɓe wuko dũngni vaa. ⁶ Aru viɓemiyi kɔ Laa leseni yato daa e a yuu jaa ɓe yii tãa mɔng ɓa. ⁷ A vii ɓemiyi ko nɔ sii knle alaɓe nɔ a vusu ni. ⁸ Hãmi nɔ kese vimiyi walikãng-leseni yato, yato rãani, nangka lereni, dãani yengti, ɓɔɔ keseni ruu nangka a nɔ yãa. ⁹ Nɔ na jĩngshe wee yãa ɓa, aruɓe nɔ loke vii gbenti shɔngvereng ye ni wu dɔɔ kn ni, ¹⁰ Nɔ sɔɔ tuse shɔng polo ɓemi ye ɓe shɔng rise wu polo a zeni dɔɔ kn ni ɓe nungsusurũ ɓee shɔngɓe take viɓi yii, ¹¹ Mɔng ɓe shɔng Giriki ɓa kɔ shɔng Yahuda yii ɓa, shɔng yeeni shaa kɔ shɔng shaa dĩngli, shɔng ɓe de Kpɛ̃ɛ ɓa, Shɔng Viva gaani, foo, shɔng wɔ̃ngni kɔvɛ̃, Kirisi wuko vii walikãng, wuko tɔti a vusu vii walikãng. ¹² Arugoko, ana Laa shɔng rɔniyi, kpelenkpe ɓɔɔ kaseni, nɔ wɔngni sĩngsĩng nugn kɔngni, tɔ̃vĩng peleni, rooreni yuu, yiseni yuu ɓɔɔ lemɓa. ¹³ Nɔ tii wɔ̃ngni ni weni, nɔ pele wee pãnti. Shɔngɓɔ wu yãagãa na ani shɔngɓɔ tok, nɔ yaaseyi ruvĩni anaɓe Daayere yaase wɔ ruvĩni jɔ. ¹⁴ Viɓe jãa vii ɓemiyi walikãng wuko, kaseni wee, wuko vii mani yãa tɔ̃ɔvĩng. ¹⁵ Nɔ yaa wɔ̃ngni lemɓa ɓee Kirisi wu te nɔ sĩngsĩng. Aruviya wɔ̃ngni lemɓa mikɔ shɔng ɓaa nɔ yãa a bii goro. Nɔ wɔ̃ng shɔng dɔreni. ¹⁶ Nɔ yaa ruu Kirisi wu wɔ̃ng anɔ bii vɛ̃ni, nɔ mante nɔ sɔɔ tase we goro-goro ni rukpɛ̃ni, tãangni soo zaabura ɓɔɔ sooyi ɓɔɔ soo suru ni taseni dɔreni anɔ sĩngsĩng a Laa bii. ¹⁷ Viɓe nɔ nang pele walikãng, a shaani yãa kɔ a vipeleni, nɔ pele walikãng a rĩng ɓee Daayere Yeso. Nɔ dɔre Laa ɓe wuko Daa ni wu kaabi. ¹⁸ Sooyeyi, nɔ roore yuu a nɔ jereyi bii, aruviya likɔtɔ dang a Daayere bii. ¹⁹ Veeyeyi, nɔ kase nɔ sooyeyi, nɔ na pele viɓe da lese yii yato ɓa. ²⁰ Jaayi, nɔ tãa nɔ yejaayi a vii walikãng, aru vimi tɔ̃ɔre Daayere kɔtɔ. ²¹ Yejaayi, nɔ na lese nɔ jaayi yato ɓa, aruɓe yii daa lese yato ɓa. ²² Fooyi, nɔ dũng nɔ shɔngyeeyi a vii walikãng, ɓa ɓee nung-zeni ɓa, ana ɓe tɔ̃reni shɔngzengyi sĩngsĩng. Ni sĩngsĩng ɓatata, nɔ zaa Daayere. ²³ Viɓe nɔ nang pele walikãng, nɔ pele ni surubi ana nɔng Daayere ɓa ni nɔng pele shɔngzengyi ɓa. ²⁴ Nɔ ze ye ni nɔng te a Daayere na nɔ vidɔɔ yɔɔni. Ɓi Daayere Kirisi ɓe nɔ dɔɔ wu ɓe. ²⁵ Aruviya shɔngɓe na pele runanka ng ɓoo yoori runanka ɓe pele ɓe. aru yuu kaseni ɓa ani ɓa.