¹ Aruviya N kase nɔ ze bɔrɔ kpãareni ɓe N kpaa aru nɔni, aruviya shɔngɓe yii a Lawudiki, ɓɔɔ aru shɔngɓe vɛ̃ɛni ɓe yide zeng watĩng ɓa a gigiri bii. ² N pele vipeleni aruɓe yii sĩngsĩng daa kpaa kaaka aɓe shɔng ese a yãawe a vusu kaseni ɓɔɔ a vusu vinayi ɓee yini taseni nungoko ɓee zeni, a vusu kpɛ̃ni ɓee vii vɔ̃sɛ̃ni ɓee Laa, wuko, Kirisi. ³ Awu bii kɔ shɔng vɔ̃se tɔ̃ving zeni ɓɔɔ kpɛ̃ni walikãng. ⁴ N shãng vimi aruɓe shɔngɓɔ daa tase nɔ kpɛ̃ni ni ɓooleni yãa shãngni ɓa. ⁵ Kɔ ɓe N ɓa ni nɔni a gigiri bii ɓa, N ni nɔni a vusu suru. N puru yato ani N ze nɔ tɔ̃vĩng dɔɔ kn ni ɓɔɔ nɔ kaaka ɓee nɔ shĩngni gn a Kirisi. ⁶ Anaɓe nɔ te Kirisi Yeso Daayere, nɔ kn ni wuni. ⁷ Nɔ shiini kaaka a wu bii, nɔ bɔng a wu bii, nɔ shii ɓatata gn shĩngni anaɓe shɔng mante nɔ ɓe, nɔ sɔɔ bɔng a dɔɔreni. ⁸ Nɔ na yaa shɔngɓɔ ɓa wu yiinɔ yuu ni manteni kpɛ̃ni ɓɔɔ jĩngni yãa ɓa, anaɓe shɔngzengyi langsi, ɓe yii ɓoose yuu tikiki vii manteni suru ɓee koodanga, yisɔ dũng Kirisi ɓa. ⁹ Aruɓe awu bii ko yini ɓee Laa wɔ̃ng a wu gigiri bii. ¹⁰ Nɔ kpaa yini ye awu bii, ɓe wuko yubɔrɔ a yuu shɔng ladongyi ɓɔɔ shɔng kaaka naa yii. ¹¹ Awu bii ko shɔng yere nɔ shaa ni yeeni shaa ɓe ɓa shɔngzeng pele a vusu zɔ̃ni sɛ̃ɛ bii ɓa, yeeni zɔng ɓee Kirisi. ¹² Shɔng gbãnɔ a yãawe a peleni baptizima, awu bii ko shɔng yuse nɔ paa ni gn shĩngni a vusu Laa kaaka, ɓe yuse wu paa a yusa. ¹³ Alaɓe nɔ vɔɔ a nɔ dɔ̃rɔng ruvĩni ɓɔɔ a vusu kara yeeni shaa, wuko rise nɔ shɔng suru a yãawe ni wuni asɔɔ yase nɔ ruvĩniyi walikãng. ¹⁴ A rĩngse binkeni ruvĩni ɓe sii nung bang ni woni niwu rudani. Too akati asɔɔ ɓaa a yuu lajisheni. ¹⁵ Wuko raare vii yaa ɓe shɔng ladong yii ɓɔɔ shɔng kaaka yii naa asɔɔ rise yii vii yusɛ̃ a gãa gbang, jãa yii kaaka ni wu lajisheni. ¹⁶ Arugoko, shɔngɓɔ na ɓoore nɔ yoori ɓa aru vishaani kɔ ruu ɓooni viɓɔ ɓa, kɔ aru la museni kɔ aru polo shele kɔ aru Diki Wɔ̃keni ɓa. ¹⁷ Ɓemi ɓe nungsusurũ viɓe ying e ɓe, gigiri bii ɓi wuko Kirisi. ¹⁸ Shɔngɓɔ ɓe na kase rooreni yuu ɓɔɔ gbãreni Laa shɔng shoni wu ɓoore nɔ yoori a mɔng kpaa ni vii. Zɔng shɔngwa ɓoo vusu viɓe ze ɓe wu sɔɔ rii vii keni ɓani lereni aruu wu lereni bii ɓa. ¹⁹ De yise yuu ɓa ɓatata ɓa. Ni ka yuu ko bii walikãng ni wu kɔ̃te bii ɓɔɔ ɓooro kaaka yii kpaa viɓe yii kase asɔɔ wɔ̃ng a yãawee; bɔng vɛ̃ɛni ni bɔngni ɓe Laa awu ɓe. ²⁰ Nɔ na vɔɔye a yawee ni Kirisi aru bɛ̃bɛ̃ suru ɓe koodanga, aruvi nɔ kase wɔ̃ngni ana shɔng koodangayi viyaː ²¹ "Nɔ na lii ɓa, kɔ nɔ na tãa ɓa, kɔ nɔ yii ɓa"? ²² Viɓemiyi walikãng ying lese kɔtɔ ni shɔngɓe pele ɓe, anaɓe ruudani ɓɔɔ manteni yii shɔngɓe. ²³ Rudani ɓemiyi kee ana vii kpɛ̃ɛni, ni vii dũngni shɔngzengyi ɓɔɔ rooreni bii ɓɔɔ kpãare ni bii. Yii a kaaka ɓa a yuu vii bii ni ɓa.