¹ Shawulu, waatĩng ni shãngni yãa duseni surubi ɓɔɔ vɔɔ nungni a yuu Daayere jaadɔɔyi, a waa yuubɔrɔ firisi bii ² a sɔɔ yɛ̃ɛwu aru labini ɓe daa waa jaakalaa ɓe a Dimasikusi, aruɓe nawa kpa shɔngɓe yii dũng Laa ye, sooye kɔ veeye, wu ese yii a mani a Urushalima. ³ Aɓe de waani a dɔ̃ɔrɔng ɓe, alaɓe kpaye ni Dimasikusi ni, ɓani jãng ɓaseni ɓa zeke kɔ̃vɛ̃ puru yaa ɓenke mɔng ye a wubi ɓe ke a koolapa; ⁴ a sɔɔ wete a tipi a sɔɔ tãa yiri yãa ng gãle wu ni, "Shawulu, Shawulu, aruvi mɔng kpãreng viya?" ⁵ Shawulu kose wu ni, "Mɔko weya, Daayere?" Daayere shãng ni, "Miko Yeso, ɓe mɔng kpãreng ɓe; ⁶ yupata, mɔ ɓo vusu ɓundang, shɔng gãle mɔ viɓe mɔ daa pele ɓe." ⁷ Shɔngɓe yii kn ni Shawulu ni yii shi ananko yãa shãngni ɓa, yi tãa yiri yãa, yide ze shɔngɓɔɔ ɓa. ⁸ Shawulu yupa a tipi, alaɓe puu nung ye ɓe, de ze viɓɔɔ ɓa; yisɔɔ yiwu naa a ɓosewu vusu Dimasikusi. ⁹ Wɔ̃ng diki taati de ze mɔng ɓa, de shaa viɓɔɔ ɓa, kɔ wu ɓoo viɓɔɔ ɓa. ¹⁰ Hãmi jaadɔɔ ɓɔɔ sii ani a Dimasikusi shɔng ɓawu ni Hananiya. Daayere gãle wu a vusu zenitĩng, "Hananiyaǃ" A shãngni, "Ze pĩn, Miko mi, Daayere." ¹¹ Daayere gãle wuni, "Yupata, mɔ sɔɔ dɔ̃rɔng ɓe shɔng ɓaa ni Gbololo, a Yahuda yee mɔ yɛ̃ɛ aru shɔngɓe e a Tarisu ɓe shɔng ɓaa wuni Shawulu, aru ng gɔ̃ɔre Laa a mɔni. ¹² Ze a zenitĩng shɔngɓɔɔ shɔng ɓaa wuni Hananiya teni ng yee shĩng naa a wu yuu, aruɓe daa kpaa zeni tɔti." ¹³ Hananiya sɔɔ kaseni, "Daayere, N tãa yãa ye vɛ̃ɛni aru shɔng ɓemi, a zɔng kpãareni vɛ̃ɛni ɓe kpãare mɔ shɔng dũngni a koo Urushalima. ¹⁴ Te kaaka naa a shɔngbɔrɔ Firisiyi bii aruɓe daa maa shɔng walikãng ɓe yii ɓale mɔɔ rĩng." ¹⁵ Aruviya Daayere sɔɔ gãle wuni, "Wata, wu ɓi ng jegbaa peleni ɓe shɔng rɔɔwu aru mini, wu too ng rĩng wu waare tĩng shɔngɓe yide ze N zɔng ɓa ni kpanti yii ɓɔɔ jaa Israyila yii; ¹⁶ aruɓe N tasewu zɔng kpãareni ɓe daa kpãare jɔ aru N rĩng ɓe." ¹⁷ Hananiya sɔɔ yupa, a ɓoo vusu yee ɓi. A shĩng naa a wu yuu, a shãng ni, "Mazung Shawulu, Daayere Yeso, ɓe kese mɔ a tĩng a dɔ̃rɔng alaɓe mɔ de eni mi, wuko shong a mɔ bii aruɓe mɔ daa kpaa zeni mɔ sɔɔ yini Suru Laa ɓe." ¹⁸ A mɔng N zeke viɓɔɔ anaa peere vii sɔɔ ke a Shawulu nung, sɔɔ kpaa zeni mɔng, yupake shɔng sɔɔ pele wu batizima; ¹⁹ shaa vishang asɔɔ kpaa kaaka. Wɔ̃ng ni jaadɔɔyi a Dimasikusi ɓee diki ɓololo. ²⁰ A mɔng ɓi gaa waani yãa aru Yeso a yii jaakalaa, a shãng ni wuko Laa Jaa. ²¹ Shɔngɓe yii tãawu ke walikãng bii zaayi a sɔɔ shãng ni, "ɓemi ɓa shɔng ɓe lese shɔng a koo Urushalima shɔng ɓe yii ɓaa rĩng miko ɓaa ya? E mɔmi aruɓe daa yike shɔng wu maayi wu sɔɔ waare shɔngbɔrɔ firisiyi bii." ²² Shawulu sɔɔ kpaa kaaka a pãngni - pãngni, a sɔɔ ese yuuyɔreni a shɔng Yahudayi bii ɓe yii a koo Dimasikusi aɓe ng tase ni Yeso ko Kirisi. ²³ Atumpu diki ɓololo, shɔng Yahudayi ɓase yãa aruɓe yii daa nung wu vɔɔ ɓe. ²⁴ Shawulu sɔɔ ze yii ɓaseni yãa walikãng. Yii gaa yɔ̃rɔng koo ɓi zii ni laani aruɓe yii daa nung wu vɔɔ ɓe. ²⁵ Aruviya wu jaadɔɔyi yii sɔɔ towu ni zii a sɔɔ tuke wuni ni yãa kasi koo, a lɔrewu a vusu ɓiti. ²⁶ Alaɓe eye a vusu Urushalima ɓe, Shawulu beeke wu ɓase yuu ni gãasi jaadɔɔyi, yii walikãng yii zaa wu vɔɔ, ade azɔng ɓa ni wuɓi shɔng dũngni ɓa. ²⁷ A mɔni Baranaba sɔɔ too wu ke a sɔɔ ese wu jaarɔkeniyi bii, a sɔɔ gãleyi ke kaaɓe Shawulu ze Daayere a dɔ̃rɔng ɓɔɔ kaaɓe Daayere sɔɔ shãng yãa ni wuni, ɓɔɔ anaaɓe Shawulu sɔɔ shãng yãa aru Yeso rĩng ni kaaka bii a koo Damasikusi. ²⁸ Wu sii ni yini, yii ɓo a sɔɔ leng a vusu Urushalima. Shãng yãa ni kaaka bii a vusu Daayere Yeso rĩng ²⁹ a sɔɔ leere yãa ni shɔng Yahudayi ɓe Giresiya; a mɔni yii watĩng ni wu beni dɔ̃rɔng aru yii nung wu vɔɔ. ³⁰ Alaɓe zungɓi yii tãa ruumi ye, yii kese wu a waare wu dii Kasariya a sɔɔ shĩng wu a dɔ̃rɔng waani Tarisu. ³¹ Alaɓi ko, shɔng dũngni walikãng ɓee koo Yahuda, Galili, ɓɔɔ Samariya yii kpaa rooreni sĩngsĩng ɓɔɔ waani tĩng vɛ̃ɛni; ɓɔɔ, kn ni a vusu zaani vɔɔ Daayere ɓɔɔ yaani bii a Suru Laa, shɔng dũngni yii sɔɔ shang vɛ̃ɛni. ³² Alaɓe kn tĩng ye ananko ɓe, laɓe Bituru waa kaa koo ɓi ye walikãng, a sɔɔ lɔɔke a waa Laa shɔng tɔ̃ving yii ɓe yii wɔ̃ng a tipi Lida. ³³ Amɔng wa ko kpaa shɔngɓɔɔ wu rĩng ni Aniyasi, ɓe wɔ̃ng saa nawadɛ̃ɛro a sivɔɔ, aru wu bii ɓooni ³⁴ Bituru gãle wu ni, "Aniyasi, Yeso Kirisi gante mɔye. Yupata mɔ ling mɔ sii," a sɔɔ yupa ɓanijang ɓaseni ɓa. ³⁵ Ananko shɔngɓe yii a Lidda ɓɔɔ ɓe Sarona yii ze jaavere ɓi yii sɔɔ Daayere bii. ³⁶ Hãmi a koo Yafa sooye ɓɔɔ ani ɓe wu rĩng ni Tabita (ɓe shɔng rise ni "Dokasi"). Shɔng soromi wu dɔɔkn ni tɔ̃ving ɓɔɔ tãani shɔng nungnkɔni vɛ̃ɛni ɓe pele shɔng rangyi. ³⁷ Watĩng ke a diki wayi wete vɔɔ a sɔɔ vɔɔke; alaɓe yii sɔke wu bii ye ɓe, yii yɔɔwu a jaaka ɓee paa. ³⁸ Ɓe wɔ̃ngye Lidda maani ni Yafa, aɓe jaadɔɔyi tãa ye ni Bituru wu amɔng ɓini, yii shong shɔngzeng ziti a wubi, yii gɔ̃ɔre wu ni, "Eta wo bii ɓanijang ɓaseni ɓa." ³⁹ Bituru yupa a wani yini. Alaɓe tooye ɓe, yii sɔɔ warewu jaaka paa, soovɔɔyi walikãng yii shii awu bii ni yãa vɔɔ, a tase wu vii manidi ɓɔɔ farabi ɓe Dokasi peleyi alaɓe wu ni yini ɓe. ⁴⁰ Bituru keseyi gaa walikãng a jaaka ɓini, a tang ni gbĩngti a tipi, a gɔ̃ɔre Laa; A rinung ni vɔɔ bii, a shãng ni, 'Tabita, yupata." Sɔɔ puu nung ke, ɓe ze Bituru ye a yupa a wɔ̃ng. ⁴¹ Bituru sɔɔ awu naa a shire wu ni dɔɔ; alaɓe ɓaa Laa shɔng tɔ̃ving yãa ye ɓɔɔ soovɔɔyi, a tasewu ni surubi ni ayi bii. ⁴² Ruuɓemi shɔng tãa walikãng a koo Yafa, shɔngzeng vɛ̃ɛni yii azɔng a Daayere. ⁴³ Watĩng Bituru wɔ̃ng a koo Yafa ɓee diki vɛ̃ɛni ni shɔngɓɔɔ ɓe wu rĩngni Saminu, ɓe wookoo.